ಕನ್ನಡ ಚಿತ್ರರಂಗದಲ್ಲಿ ಇತ್ತೀಚೆಗೆ ವಿಭಿನ್ನ ಪ್ರಯೋಗಾತ್ಮಕ ಸಿನಿಮಾಗಳು ಬರುತ್ತಿವೆ. ಈ ಸಾಲಿನಲ್ಲಿ ಡಾರ್ಲಿಂಗ್ ಕೃಷ್ಣ ನಟಿಸಿ, ನಿರ್ದೇಶನ ಮಾಡಿರುವ 'ಲವ್ ಮಾಕ್ಟೈಲ್' ಸಿನಿಮಾ ಕೂಡಾ ಒಂದು. ಚಿತ್ರಮಂದಿರದಲ್ಲಿದ್ದಾಗ ಮಾಡಿದ ಸದ್ದಿಗಿಂತಲೂ, ಓಟಿಟಿ ಅಂದರೆ ಡಿಜಿಟಲ್ ಪ್ಲಾಟ್ಫಾರ್ಮ್ನಲ್ಲಿ ಬಹಳ ಸದ್ದು ಮಾಡುತ್ತಿದೆ.
ಯಾವುದೇ ವಾಟ್ಸ್ ಆ್ಯಪ್ ಡಿಪಿ ಹಾಗೂ ಸೋಷಿಯಲ್ ಮೀಡಿಯಾ ನೋಡಿದರೂ 'ಲವ್ ಮಾಕ್ಟೈಲ್' ಸಿನಿಮಾದ್ದೇ ಹವಾ. ಸಿನಿಮಾ ಚೆನ್ನಾಗಿದ್ದರೆ ಪ್ರೇಕ್ಷಕರು ಬೆನ್ನು ತಟ್ಟುತ್ತಾರೆ ಎಂಬುದಕ್ಕೆ ಸಿನಿಮಾ ನೋಡಿದ ಅಭಿಮಾನಿಯೊಬ್ಬರು ನಿರ್ದೇಶಕ ಕೃಷ್ಣ ಅವರ ಅಕೌಂಟಿಗೆ 200 ರೂಪಾಯಿ ಕಳಿಸಿರುವುದು ಸಾಕ್ಷಿ.ಈ ಬಗ್ಗೆ ನಿರ್ದೇಶಕ ಕಮ್ ಡಾರ್ಲಿಂಗ್ ಕೃಷ್ಣ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. 'ಲವ್ ಮಾಕ್ಟೈಲ್' ಬಿಡುಗಡೆ ಆದ ವೇಳೆ, ಜನರು ಚಿತ್ರಮಂದಿರಗಳಲ್ಲಿ ಸಿನಿಮಾ ನೋಡಿ ಫೇಸ್‌ಬುಕ್‌ನಲ್ಲಿ ಇದು ಒಳ್ಳೆಯ ಸಿನಿಮ ಎಂದು ಸ್ಟೇಟಸ್ ಹಾಕುತ್ತಿದ್ದರು. ಈಗ ಓಟಿಟಿಯಲ್ಲಿ ಈ ಸಿನಿಮಾ ವೈರಲ್ ಆದ ನಂತರ ಸ್ಟೇಟಸ್ ಹಾಕುವವರ ಸಂಖ್ಯೆ ಇನ್ನೂ ಹೆಚ್ಚಾಗಿದೆ.
'ಮೊನ್ನೆ ಸಿನಿಮಾ ನೋಡಿದ ಅಭಿಮಾನಿಯೊಬ್ಬರು ನನಗೆ ಅಭಿನಂದನೆ ಸಲ್ಲಿಸಿ ಮೇಲ್‌ ಮಾಡಿದ್ದರು. ಅದರಲ್ಲಿ ಥಿಯೇಟರ್‌ನಲ್ಲಿ ಸಿನಿಮಾವನ್ನು ನೋಡದೇ ಇದ್ದದ್ದಕ್ಕೆ ಬೇಸರ ವ್ಯಕ್ತಪಡಿಸಿದ ಅವರು ನನ್ನ ಅಕೌಂಟ್‌ ನಂಬರ್‌ ಕಳಿಸುವಂತೆ ಮನವಿ ಮಾಡಿದ್ದರು. ನಾನು ಸುಮ್ಮನೆ ನೋಡೋಣ ಎಂದು ಅಕೌಂಟ್‌ ನಂಬರ್‌ ಕಳಿಸಿದರೆ, ಆ ಕಡೆಯಿಂದ ಅಭಿಮಾನಿ 200 ರೂಪಾಯಿ ಟ್ರಾನ್ಸ್‌ಫರ್‌ ಮಾಡೇಬಿಟ್ಟಿದ್ದಾರೆ. ಇಂತಹ ಅಭಿಮಾನಕ್ಕೆ ನಾವು ಬೆಲೆ ಕಟ್ಟೋದಿಕ್ಕೆ ಆಗೋಲ್ಲ. ಈ ಹಿಂದೆ ರಿಷಭ್‌ ಶೆಟ್ಟಿ ನಿರ್ದೇಶನದ 'ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ' ಸಿನಿಮಾವನ್ನು ಟಿವಿಯಲ್ಲಿ ನೋಡಿದ ಅಭಿಮಾನಿಯೊಬ್ಬರು ಅವರಿಗೆ 200 ರೂಪಾಯಿ ಪೋಸ್ಟ್‌ ಮಾಡಿದ್ದ ಘಟನೆಯನ್ನು ಸ್ಮರಿಸಬಹುದು. ಸದ್ಯ ಚಿತ್ರಮಂದಿರಗಳಲ್ಲಿ ಸೂಪರ್ ಹಿಟ್ ಆಗೋದಿಕ್ಕೆ ಕಷ್ಟ ಆಗುತ್ತಿದ್ದ ನಮ್ಮ ಸಿನಿಮಾ ಡಿಜಿಟಲ್ ಪ್ಲಾಟ್ಫಾರ್ಮ್ನಲ್ಲಿ ಮೆಚ್ಚುಗೆ ಗಳಿಸುತ್ತಿರುವುದಕ್ಕೆ ಕೃಷ್ಣ ಖುಷಿಯಾಗಿದ್ದಾರೆ. ಸಿನಿಮಾ ಮಾಡಿದ್ದಕ್ಕೂ ಸಾರ್ಥಕ ಆಯ್ತು ಎನ್ನುತ್ತಿದ್ದಾರೆ ಕೃಷ್ಣ.
