ಸ್ಯಾನ್ ಫ್ರಾನ್ಸಿಸ್ಕೋ : ಈ ವಾರದ ಆರಂಭದಲ್ಲಿ ಬಿಡುಗಡೆಯಾದ ಹೊಸ ಅಪ್ಡೇಟ್ ಇನ್ಸ್ಟಾಲ್ ಮಾಡಿದ ನಂತರ ಕೆಲ ವಿಂಡೋಸ್ 11 ಪಿಸಿಗಳಲ್ಲಿ "UNSUPPORTED_PROCESSOR" ದೋಷ ಕಾಣಿಸಿಕೊಂಡಿದೆ. UNSUPPORTED_PROCESSOR ಸಂದೇಶದೊಂದಿಗೆ ಕಾಣಿಸುವ ಬ್ಲೂ ಸ್ಕ್ರೀನ್ ಆಫ್ ಡೆತ್ (ಬಿಎಸ್ಒಡಿ) ವರದಿಗಳ ಬಗ್ಗೆ ತನಿಖೆ ನಡೆಸುವುದಾಗಿ ಮೈಕ್ರೋಸಾಫ್ಟ್ ಹೇಳಿದೆ.
ಹೊಸ ಅಪ್ಡೇಟ್ ಸಾಮಾನ್ಯ ಮಾಸಿಕ ಪರಿಹಾರಗಳನ್ನು ಒಳಗೊಂಡಿದೆ, ಆದರೆ ಇದು ಕೆಲವು ಎಂಎಸ್ಐ ಮದರ್ಬೋರ್ಡ್ಗಳಲ್ಲಿ ದೋಷ ಉಂಟು ಮಾಡುತ್ತಿದೆ ಎಂದು ವರದಿಗಳು ಹೇಳಿವೆ. "ಇದು ಮೈಕ್ರೋಸಾಫ್ಟ್ನಿಂದ ಎದುರಾದ ಸಮಸ್ಯೆಯೇ ಎಂಬುದನ್ನು ನಿರ್ಧರಿಸಲು ನಾವು ಪ್ರಸ್ತುತ ತನಿಖೆ ನಡೆಸುತ್ತಿದ್ದೇವೆ. ಹೆಚ್ಚಿನ ಮಾಹಿತಿ ಲಭ್ಯವಾದ ನಂತರ ನಾವು ಈ ಬಗ್ಗೆ ಅಪ್ಡೇಟ್ ನೀಡುತ್ತೇವೆ" ಎಂದು ಮೈಕ್ರೋಸಾಫ್ಟ್ನ ವಿಂಡೋಸ್ ಹೆಲ್ತ್ ಸೆಂಟರ್ನ ನೋಟ್ನಲ್ಲಿ ತಿಳಿಸಲಾಗಿದೆ.
ಯಾವುದೋ ಗಂಭೀರ ದೋಷದ ಕಾರಣದಿಂದ ವಿಂಡೋಸ್ ಶಟ್ಡೌನ್ ಆಗುವುದು ಅಥವಾ ಅನಿರೀಕ್ಷಿತವಾಗಿ ರಿಸ್ಟಾರ್ಟ್ ಆಗಲು ಆರಂಭಿಸಿದರೆ ಆವಾಗ ಬ್ಲೂ ಸ್ಕ್ರೀನ್ ದೋಷ ಕಾಣಿಸಿಕೊಳ್ಳುತ್ತದೆ. ಇದನ್ನು ಕೆಲ ಬಾರಿ ಬ್ಲ್ಯಾಕ್ ಸ್ಕ್ರೀನ್ ದೋಷ ಅಥವಾ STOP code ದೋಷ ಎಂದೂ ಕರೆಯಲಾಗುತ್ತದೆ. "ನಿಮ್ಮ ಕಂಪ್ಯೂಟರ್ ಗೆ ಹಾನಿಯಾಗದಂತೆ ತಡೆಯಲು ವಿಂಡೋಸ್ ಅನ್ನು ಶಟ್ಡೌನ್ ಮಾಡಲಾಗಿದೆ" ಎಂಬ ಸಂದೇಶ ಅಥವಾ ಇದೇ ರೀತಿಯ ಸಂದೇಶ ಕಾಣಿಸಿಕೊಳ್ಳುತ್ತಿದೆ ಎಂದು ಮೈಕ್ರೊಸಾಫ್ಟ್ ಹೇಳಿದೆ.
ಕಂಪನಿಯ ಪ್ರಕಾರ, ಈ ದೋಷಗಳು ಹಾರ್ಡ್ ವೇರ್ ಮತ್ತು ಸಾಫ್ಟ್ ವೇರ್ ಸಮಸ್ಯೆಗಳಿಂದಲೂ ಉಂಟಾಗಬಹುದು. ಇದಲ್ಲದೆ, ಅಪ್ಡೇಟ್ ಅನ್ನು ಇನ್ಸ್ಟಾಲ್ ಮಾಡಿದ ನಂತರ ಹಲವಾರು ರೆಡ್ಡಿಟ್ ಬಳಕೆದಾರರು ಅದೇ ರೀತಿಯ ಬಿಎಸ್ಒಡಿ ದೋಷವನ್ನು ವರದಿ ಮಾಡಿದ್ದಾರೆ. ಅವರೆಲ್ಲರೂ ಇತ್ತೀಚಿನ ಬಯೋಸ್ ಅಪ್ಡೇಟ್ಗಳೊಂದಿಗೆ ಎಂಎಸ್ಐ ಮದರ್ಬೋರ್ಡ್ಗಳೊಂದಿಗೆ ಇಂಟೆಲ್ ಸಿಸ್ಟಮ್ಗಳನ್ನು ಹೊಂದಿದ ಕಂಪ್ಯೂಟರ್ಗಳನ್ನು ಬಳಸುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.
ಆದಾಗ್ಯೂ ಮೈಕ್ರೊಸಾಫ್ಟ್ ದೋಷ ಕಾಣಿಸಿಕೊಂಡ ಕಂಪ್ಯೂಟರುಗಳಿಂದ ಇತ್ತೀಚಿನ (ಕೆಬಿ 5029351) ಅಪ್ಡೇಟ್ ಅನ್ನು ಹಿಂತೆಗೆದುಕೊಂಡಿದೆ ಎಂದು ಹೇಳಲಾಗಿದೆ. ಆದರೆ ಇದು ಇನ್ನೂ ಎಲ್ಲರಿಗೂ ಲಭ್ಯವಿದೆ. ಏತನ್ಮಧ್ಯೆ, ಮೈಕ್ರೋಸಾಫ್ಟ್ ವಿಂಡೋಸ್ 11 ನಲ್ಲಿ ತನ್ನ ಡಿಜಿಟಲ್ ಅಸಿಸ್ಟಂಟ್ ಕೊರ್ಟಾನಾ ಅಪ್ಲಿಕೇಶನ್ ಅನ್ನು ಸ್ಥಗಿತಗೊಳಿಸುವುದಾಗಿ ಘೋಷಿಸಿದೆ.
ಸ್ವತಂತ್ರ ಅಪ್ಲಿಕೇಶನ್ ಆಗಿ ವಿಂಡೋಸ್ನಲ್ಲಿ ಕೊರ್ಟಾನಾ ಅನ್ನು ತೆಗೆದುಹಾಕಲಾಗಿದ್ದರೂ, ಟೀಮ್ಸ್ ಮೊಬೈಲ್, ಮೈಕ್ರೋಸಾಫ್ಟ್ ಟೀಮ್ಸ್ ಡಿಸ್ ಪ್ಲೇ ಮತ್ತು ಮೈಕ್ರೋಸಾಫ್ಟ್ ಟೀಮ್ಸ್ ರೂಮ್ ಗಳಲ್ಲಿ ಕೊರ್ಟಾನಾಗೆ ಸಪೋರ್ಟ್ 2023 ರ ಅಂತ್ಯದಲ್ಲಿ ಕೊನೆಗೊಳ್ಳಲಿದೆ.
ಮೈಕ್ರೋಸಾಫ್ಟ್ ವಿಶ್ವದ ಅತಿದೊಡ್ಡ ಕಂಪ್ಯೂಟರ್ ಸಾಫ್ಟ್ ವೇರ್ ಮಾರಾಟಗಾರ ಕಂಪನಿಯಾಗಿದೆ. ಇದು ಕ್ಲೌಡ್ ಕಂಪ್ಯೂಟಿಂಗ್ ಸೇವೆಗಳು, ವಿಡಿಯೋ ಗೇಮ್‌ಗಳು, ಕಂಪ್ಯೂಟರ್ ಮತ್ತು ಗೇಮಿಂಗ್ ಹಾರ್ಡ್ ವೇರ್, ಹುಡುಕಾಟ ಮತ್ತು ಇತರ ಆನ್‌ಲೈನ್ ಸೇವೆಗಳ ಪ್ರಮುಖ ಪೂರೈಕೆದಾರನಾಗಿದೆ. ಮೈಕ್ರೋಸಾಫ್ಟ್ನ ಕಾರ್ಪೊರೇಟ್ ಪ್ರಧಾನ ಕಚೇರಿ ರೆಡ್ಮಂಡ್ ವಾಶ್ನಲ್ಲಿದೆ. ಇದು 60 ಕ್ಕೂ ಹೆಚ್ಚು ದೇಶಗಳಲ್ಲಿ ಕಚೇರಿಗಳನ್ನು ಹೊಂದಿದೆ.
ಇದನ್ನೂ ಓದಿ : 370ನೇ ವಿಧಿ ಮೇಲಿನ ನಿಮ್ಮ ತೀರ್ಪು ಮಾನಸಿಕ ದ್ವಂದ್ವ ಕೊನೆಗಾಣಿಸಲಿದೆ: ಸುಪ್ರೀಂ ಕೋರ್ಟ್ನಲ್ಲಿ ಕೇಂದ್ರದ ವಾದ
