ಲಖನೌ, ಉತ್ತರಪ್ರದೇಶ: ಹೆಂಡತಿ ತೊರೆದು ಹೋದ ಕಾರಣದಿಂದ ಮನನೊಂದ ವ್ಯಕ್ತಿಯೊಬ್ಬ 14 ತಿಂಗಳ ಅವಳಿ ಹೆಣ್ಣು ಮಕ್ಕಳನ್ನು ಕೊಂದು, ತಾನು ಆತ್ಮಹತ್ಯೆಗೆ ಒಳಗಾಗಿರುವ ದಾರುಣ ಘಟನೆ ಉತ್ತರ ಪ್ರದೇಶದ ಬದೋಯಿಯಲ್ಲಿ ನಡೆದಿದೆ.
ಓಂ ಪ್ರಕಾಶ್ ಯಾದವ್ (27) ಸಾವನ್ನಪ್ಪಿದ ತಂದೆ. ಆಶಿ ಮತ್ತು ಪ್ರಿಯಾಶಿ ಎಂಬ 14 ತಿಂಗಳ ಮಕ್ಕಳಿಗೆ ಹಾಲಿನಲ್ಲಿ ವಿಷ ಬೆರಸಿ ಹತ್ಯೆ ಮಾಡಲಾಗಿದೆ ಎಂದು ಎಸ್ಎಚ್ಒ ಅಜಿತ್ ಕುಮಾರ್ ಶ್ರೀವಾತ್ಸವ್ ತಿಳಿಸಿದ್ದಾರೆ.
ಯಾದವ್ ಹೆಂಡತಿ ಕಣ್ಮರೆಯಾಗಿರುವ ಕುರಿತು ನವೆಂಬರ್ 21ರಂದು ಪೊಲೀಸ್ ಪ್ರಕರಣ ದಾಖಲಿಸಿದ್ದ. ಸಣ್ಣ ಮಕ್ಕಳನ್ನು ತೊರೆದು ಆಕೆ ಹೊರಟು ಹೋಗಿದ್ದು, ಆತನನ್ನು ಒಬ್ಬಂಟಿಯಾಗಿ ಮಾಡಿದ್ದಳು. ಇದರಿಂದ ಆತ ತೀವ್ರ ಮಾನಸಿಕ ಸಮಸ್ಯೆಗೆ ಗುರಿಯಾಗಿ ಇಂತಹ ನಿರ್ಧಾರ ಕೈಗೊಂಡಿರುವ ಸಾಧ್ಯತೆ ಇದೆ ಎಂದು ಶ್ರೀವಾತ್ಸವ ತಿಳಿಸಿದರು.
ಮಕ್ಕಳಿಗೆ ವಿಷವಿಕ್ಕಿದ ಬಳಿಕ ಯಾದವ್ ಮೊದಲಿಗೆ ಮನೆಯಲ್ಲಿಯೇ ನೇಣಿಗೆ ಶರಣಾಗುವ ಪ್ರಯತ್ನ ನಡೆಸಿದ್ದ. ಬಳಿಕ ನಿರ್ಧಾರ ಬದಲಾಯಿಸಿ ಇಂದು ಬೆಳಗ್ಗೆ 7ಕ್ಕೆ ಮನೆ ತೊರೆದು, ಅಲ್ಲಿಂದ 500 ಮೀ ದೂರವಿರುವ ಗಣೇಶ್ ಚಂದ್ರ ಲೌಡರ್ ಇಂಟರ್ ಕಾಲೇಜ್ನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಬೆಳಗ್ಗೆ ಕಾಲೇಜಿನಲ್ಲಿ ಓಡಾಡುವಾಗ ಈತನ ನಡೆ ಬಗ್ಗೆ ಯಾರಿಗೂ ಅನುಮಾನ ಬಂದಿಲ್ಲ. ಕಾಲೇಜ್ ಆರಂಭವಾದ ಬಳಿಕ ಆವರಣದಲ್ಲಿ ಈತನ ಶವ ಪತ್ತೆಯಾಗಿದ್ದು, ಕುಟುಂಬಸ್ಥರಿಗೆ ಮಾಹಿತಿ ನೀಡಲಾಯಿತು. ಮನೆಗೆ ಹೋಗಿ ಪರಿಶೀಲಿಸಿದಾಗ ಅವಳಿ ಮಕ್ಕಳ ಮೃತ ದೇಹವೂ ದೊರೆಯಿತು. ಇದಾದ ಬಳಿಕ ತಕ್ಷಣಕ್ಕೆ ಈ ಕುರಿತು ಸಂಬಂಧಿಕರು ಪೊಲೀಸರಿಗೆ ಮಾಹಿತಿ ನೀಡಿದರು.
ಮೂವರ ಮೃತ ದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು, ತನಿಖೆ ನಡೆಯುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇದನ್ನೂ ಓದಿ: ಹಣದ ಮಾಲೆಯನ್ನೇ ಕದ್ದೊಯ್ದ ಕಳ್ಳ: ಚಲಿಸುತ್ತಿದ್ದ ವಾಹನದೊಳಗೆ ನುಗ್ಗಿ ಹಿಡಿದ ಮದುಮಗ- ವಿಡಿಯೋ
