ಬೀಜಿಂಗ್ : ಚೀನಾದ ಟೆಕ್ ದೈತ್ಯ ಹುವಾಯಿ ತನ್ನದೇ ಆದ ಬ್ರಾಂಡ್ ಅಡಿಯಲ್ಲಿ ಎಲೆಕ್ಟ್ರಿಕ್ ಕಾರುಗಳನ್ನು ತಯಾರಿಸಲು ಯೋಜಿಸುತ್ತಿದ್ದು, ಕೆಲವು ಮಾದರಿಗಳು ಈ ವರ್ಷದ ಅಂತ್ಯದೊಳಗೆ ಬಿಡುಗಡೆಯಾಗುವ ಸಾಧ್ಯತೆಯಿದೆ.
ಜಿಎಸ್ಎಂ ಅರೆನಾ ಮತ್ತು ರಿಚರ್ಡ್ ಯು ಪ್ರಕಾರ, ಸ್ಮಾರ್ಟ್‌ಫೋನ್ ಜಗತ್ತಿನಲ್ಲಿ ಉತ್ತಮ ಹಿಡಿತ ಸಾಧಿಸಿರುವ ಹುವಾಯಿ, ವಿದ್ಯುಚ್ಚಾಲಿತ ವಾಹನಗಳ ಕಡೆಗೆ ಗಮನ ಹರಿಸಲಿದ್ದು, ಇದು ಸಾಮೂಹಿಕ ಮಾರುಕಟ್ಟೆ ವಿಭಾಗವನ್ನು ಗುರಿಯಾಗಿಸಿದೆ.
ಕಂಪನಿಯ ಮೂಲಗಳ ಪ್ರಕಾರ, ಹುವಾಯಿ ಸರ್ಕಾರಿ ಸ್ವಾಮ್ಯದ ಚಂಗನ್ ಆಟೋಮೊಬೈಲ್ ಮತ್ತು ಇತರ ವಾಹನ ತಯಾರಕರೊಂದಿಗೆ ಮಾತುಕತೆ ನಡೆಸುತ್ತಿದ್ದು, ಅವರ ಕಾರು ತಯಾರಿಕಾ ಪ್ಲಾಂಟ್ಗಳನ್ನು ಬಳಸಿಕೊಂಡು ತಮ್ಮ ಎಲೆಕ್ಟ್ರಿಕ್ ವಾಹನಗಳನ್ನು ತಯಾರಿಸಲು ಮುಂದಾಗಿದೆ. ಜೊತೆಗೆ ಬೀಜಿಂಗ್ ಮೂಲದ ಬಿಎಐಸಿ ಗ್ರೂಪ್‌ನ ಬ್ಲೂಪಾರ್ಕ್ ನ್ಯೂ ಎನರ್ಜಿ ಟೆಕ್ನಾಲಜಿಯೊಂದಿಗೂ ಚರ್ಚೆ ನಡೆಸಿದೆ.
ಈ ನಡುವೆ, ಚೀನಾದ ಮತ್ತೊಂದು ಟೆಕ್ ಕಂಪನಿ ಶಿಯೋಮಿ ಕೂಡ ತನ್ನದೇ ಆದ ಕಾರನ್ನು ನಿರ್ಮಿಸಲು ಯೋಜಿಸುತ್ತಿದೆ. ಆದರೆ, ಈ ಕುರಿತು ಇನ್ನೂ ಸ್ಪಷ್ಟ ನಿರ್ಧಾರ ಕೈಗೊಂಡಿಲ್ಲ. ಶಿಯೋಮಿ ವಿದ್ಯುತ್ ಚಾಲಿತ ವಾಹನ ತಯಾರಿಸಲು ಮುಂದಾದರೆ, ಕಂಪನಿಯ ಸಿಇಒ ಲೀ ಜುನ್ ಅದರ ನಾಯಕತ್ವ ವಹಿಸಲಿದ್ದಾರೆ ಎಂದು ತಿಳಿದು ಬಂದಿದೆ. 2013 ರಲ್ಲಿ, ಟೆಸ್ಲಾ ಸಿಇಒ ಎಲೋನ್ ಮಸ್ಕ್ ಅವರನ್ನು ಭೇಟಿಯಾಗಲು ಲೀ ಜುನ್ ಎರಡು ಬಾರಿ ಯುಎಸ್ಗೆ ಭೇಟಿ ನೀಡಿದ್ದರು ಮತ್ತು ಈಗ ಈ ಕ್ಷೇತ್ರದಲ್ಲಿ ಅವರು ಹೆಚ್ಚಿನ ಆಸಕ್ತಿ ತೋರಿಸುತ್ತಿದ್ದಾರೆ.
ಭಾರತೀಯ ಮಾರುಕಟ್ಟೆಯಲ್ಲಿ ಸ್ಮಾರ್ಟ್ ವಾಹನಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಈಗಾಗಲೇ ಟಾಟಾ, ಮಹೀಂದ್ರಾ ಮತ್ತು ಇತರ ಆಟೋ ಕಂಪನಿಗಳು ಎಲೆಕ್ಟ್ರಿಕ್ ವಾಹನಗಳನ್ನು ಪರಿಚಯಿಸಿವೆ.
