ರೋಮ್(ಇಟಲಿ): ದಕ್ಷಿಣ ಧ್ರುವದ ಅಂಟಾರ್ಟಿಕಾ ಖಂಡದ ಬೃಹತ್ ಪ್ರಮಾಣದ ಮಂಜುಗಡ್ಡೆಗೆ ಬ್ರಿಟನ್ ದೇಶ ಗ್ಲಾಸ್ಗೋ ಗ್ಲೇಸಿಯರ್ ಎಂದು ಹೆಸರಿಟ್ಟಿದೆ. ಭಾನುವಾರ ಸ್ಕಾಂಟ್ಲೆಂಡ್ನಲ್ಲಿ ಆರಂಭವಾಗಲಿರುವ ಹವಾಮಾನ ಸಂಬಂಧಿ ವಿಶ್ವಸಂಸ್ಥೆಯ COP-26 ಸಮಾವೇಶದ ಅಂಗವಾಗಿ ಈ ಹೆಸರಿಡಲಾಗಿದೆ.
ಈ ಸಮಾವೇಶದಲ್ಲಿ ಸುಮಾರು 120ಕ್ಕೂ ಹೆಚ್ಚು ರಾಷ್ಟ್ರಗಳ ನಾಯಕರು ಭಾಗವಹಿಸಲಿದ್ದಾರೆ. ತಾಪಮಾನ ಹೆಚ್ಚಳ ಹಾಗೂ ಇತರ ಪರಿಸರ ಸಂಬಂಧಿ ವಿಚಾರಗಳ ಬಗ್ಗೆ ಸಮಾವೇಶದಲ್ಲಿ ಗಂಭೀರ ಚರ್ಚೆ ನಡೆಸಲಾಗುತ್ತದೆ.
ಇಂಗ್ಲೆಂಡ್ನ ಲೀಡ್ಸ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಅಂಟಾರ್ಟಿಕಾದ ಗೆಟ್ಜ್ ಬೇಸಿನ್ನಲ್ಲಿ (Getz Basin) ಹಿಮನದಿಗಳ ಸರಣಿಯನ್ನು ಪತ್ತೆ ಮಾಡಿದ್ದು, ಹವಾಮಾನ ಬದಲಾವಣೆಯಿಂದಾಗಿ ಅವುಗಳು ಸಮುದ್ರದ ಕಡೆಗೆ 1994ರಿಂದ 2018ರವರೆಗೆ ಶೇಕಡಾ 25ರಷ್ಟು ಚಲಿಸಿವೆ ಎಂದು ಪತ್ತೆ ಮಾಡಲಾಗಿದೆ.
ಇದರಿಂದಾಗ 315 ಗಿಗಾಟನ್ಗಳಷ್ಟು (ಒಂದು ಗಿಗಾಟನ್ಗೆ ನೂರು ಕೋಟಿ ಟನ್ ಸಮ) ಮಂಜುಗಡ್ಡೆ ನೀರಾಗಿ ಸಮುದ್ರ ಪಾಲಾಗುತ್ತದೆ. ಇದರಿಂದ ಸಮುದ್ರ ಮಟ್ಟ ಏರಿಕೆಯಾಗುತ್ತದೆ ಎಂದು ವಿಜ್ಞಾನಿಗಳ ತಂಡ ಆತಂಕ ವ್ಯಕ್ತಪಡಿಸಿತ್ತು.
ಬ್ರಿಟಿಷ್ ಅಂಟಾರ್ಟಿಕ್ ಪ್ರದೇಶದಲ್ಲಿ ಈ ಹಿಮನದಿಗಳಿದ್ದು, ರಿಯೋ, ಕ್ಯೂಟೋ, ಪ್ಯಾರಿಸ್ ಸೇರಿದಂತೆ ಹವಾಮಾನ ಸಮಾವೇಶಗಳು, ಒಪ್ಪಂದಗಳ ಹೆಸರುಗಳನ್ನು ಇಡಲಾಗುತ್ತಿದೆ. ಅದೇ ರೀತಿ ಈ ಬಾರಿ ಗ್ಲಾಸ್ಗೋದಲ್ಲಿ COP-26 ಸಮ್ಮೇಳನ ನಡೆಯಲಿದ್ದು, ಹಿಮನದಿಗೆ ಗ್ಲಾಸ್ಗೋ ಗ್ಲೇಸಿಯರ್ ಎಂದು ಹೆಸರಿಡಲಾಗಿದೆ.
ಭಾರತ, ಆಸ್ಟ್ರೇಲಿಯಾ ಮತ್ತು ಚೀನಾ ಸೇರಿದಂತೆ ಕಾರ್ಬನ್ ಅನ್ನು ಅತಿ ಹೆಚ್ಚಾಗಿ ಹೊರಸೂಸುವ ರಾಷ್ಟ್ರಗಳು ಈ ಸಭೆಯಲ್ಲಿ ಪಾಲ್ಗೊಳ್ಳಲಿದ್ದು, ಕಾರ್ಬನ್ ಹೊರಸೂಸುವಿಕೆಯನ್ನು ಕಡಿತಗೊಳಿಸುವಂತೆ ನಿರ್ಣಯಗಳನ್ನು ಕೈಗೊಳ್ಳುವ ಸಾಧ್ಯತೆಯಿದೆ.
ಇದನ್ನೂ ಓದಿ:ಮಾನವ ದೇಹದಲ್ಲಿ ಕೆಲಸ ಮಾಡುತ್ತಿದೆ ಹಂದಿಯ ಕಿಡ್ನಿ! ವೈದ್ಯಲೋಕದಲ್ಲೊಂದು ಅಚ್ಚರಿಯ ಶಸ್ತ್ರಚಿಕಿತ್ಸೆ
