ವಿಶ್ವಸಂಸ್ಥೆ: ಕೋವಿಡ್-19 ತಡೆಗಟ್ಟುವಲ್ಲಿ ಅತ್ಯಂತ ಪ್ರಬಲ ಸಂಸ್ಥೆಯಾದ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ (ಯುಎನ್ಎಸ್ಸಿ) ಕಾರ್ಯ ನಾಚಿಕೆಗೇಡಿತನದ್ದಾಗಿದೆ. ಈ ಕುರಿತು ಗೊತ್ತುವಳಿ ಅಂಗೀಕರಿಸಲು ಅಡ್ಡಿಯುಂಟುಮಾಡಿದ್ದು ಖಂಡನೀಯ ಎಂದು ಮೇ ತಿಂಗಳಿಗಾಗಿ ಯುಎನ್ಎಸ್ಸಿ ಅಧ್ಯಕ್ಷ ರಾಷ್ಟ್ರವಾದ ಎಸ್ತೋನಿಯಾ ಉಗ್ರವಾಗಿ ಪ್ರತಿಕ್ರಿಯಿಸಿದೆ.
"ನಾವು ಈ ವಿಷಯದಲ್ಲಿ ನಾಯಕತ್ವ ವಹಿಸಲು ವಿಫಲವಾಗಿದ್ದು ನಾಚಿಕೆಗೇಡಿತನವಾಗಿದೆ. ಇದಕ್ಕೆ ಹಲವಾರು ನಿರ್ದಿಷ್ಟ ಕಾರಣಗಳಿವೆ. ಆದರೆ, ಯುಎನ್ಎಸ್ಸಿ ಸೂಕ್ತ ನಿರ್ಧಾರ ತಳೆಯುವಂತೆ ನಾವು ಕಳೆದ ಒಂದು ತಿಂಗಳಿನಿಂದ ಒತ್ತಾಯ ಮಾಡುತ್ತಿದ್ದೆವು." ಎಂದು ಎಸ್ತೋನಿಯಾ ರಿಪಬ್ಲಿಕ್ನ ಯುಎನ್ಎಸ್ಸಿ ಶಾಶ್ವತ ಪ್ರತಿನಿಧಿ ರಾಯಭಾರಿ ಸ್ವೆನ್ ಜರ್ಗೆನ್ಸನ್ ಹೇಳಿದ್ದಾರೆ.
ವಿಡಿಯೋ ಕಾನ್ಫರೆನ್ಸ್ ಮೂಲಕ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಅವರು ಮಾತನಾಡಿದರು. ಎರಡರಿಂದ ಮೂರು ವಾರಗಳ ಮುನ್ನವೇ ಕೋವಿಡ್-19 ಕುರಿತಾದ ಗೊತ್ತುವಳಿಯನ್ನು ಯುಎನ್ಎಸ್ಸಿ ಅಂಗೀಕರಿಸಬೇಕಿತ್ತು. ಆದಾಗ್ಯೂ ಈಗ ಅಥವಾ ಮುಂದಿನ ವಾರವಾದರೂ ಇದು ನಡೆಯಲಿದೆ ಎಂದು ಭರವಸೆ ವ್ಯಕ್ತಪಡಿಸಿದರು.
"ಭದ್ರತಾ ಮಂಡಳಿಯ ಕೆಲ ಸದಸ್ಯ ರಾಷ್ಟ್ರಗಳ ಮಧ್ಯೆ ರಾಜಕೀಯ ಭಿನ್ನಾಭಿಪ್ರಾಯಗಳಿವೆ. ಈ ಕುರಿತು ಚರ್ಚೆಗಳು ಮುಂದುವರೆದಿದ್ದು, ಸಮಸ್ಯೆಗಳು ಆದಷ್ಟು ಬೇಗ ನಿವಾರಣೆಯಾಗುವ ವಿಶ್ವಾಸವಿದೆ." ಎಂದು ಅವರು ತಿಳಿಸಿದರು.
ಕಳೆದ ಹಲವಾರು ವಾರಗಳಿಂದ ವ್ಯಾಪಕ ಚರ್ಚೆಗಳು ನಡೆಯುತ್ತಿದ್ದರೂ ಯುಎನ್ಎಸ್ಸಿಯಲ್ಲಿ ಕೋವಿಡ್-19 ಕುರಿತಾದ ಒಂದೇ ಒಂದು ಗೊತ್ತುವಳಿಯನ್ನು ಅಂಗೀಕರಿಸಲಾಗಿಲ್ಲ. ವಿಶ್ವ ಆರೋಗ್ಯ ಸಂಸ್ಥೆ ಕುರಿತಾದ ಅಮೆರಿಕ ಹಾಗೂ ಚೀನಾ ನಡುವಿನ ಜಟಾಪಟಿಯೇ ಇದಕ್ಕೆಲ್ಲ ಕಾರಣ ಎನ್ನಲಾಗಿದೆ.
