ಕರಾಚಿ: ಭಾರತದ ಮೋಸ್ಟ್ ವಾಂಟೆಡ್ ಭೂಗತ ಪಾತಕಿ, 1993 ಮುಂಬೈ ಸರಣಿ ಬಾಂಬ್ ಸ್ಫೋಟದ ರೂವಾರಿ ದಾವೂದ್ ಇಬ್ರಾಹಿಂ ಕರಾಚಿಯಲ್ಲಿರುವುದಾಗಿ ಅಲ್ಲಿನ ಸರ್ಕಾರ ಒಪ್ಪಿಕೊಂಡಿದೆ. ಇದಕ್ಕೆ ಸಂಬಂಧಿಸಿದಂತೆ ಪಾಕ್ ವಿದೇಶಾಂಗ ಸಚಿವ ಮೆಹಮೂದ್ ಖುರೇಷಿ, ಉಗ್ರ ಸಂಘಟನೆ 88 ನಾಯಕರ ಲಿಸ್ಟ್ ರಿಲೀಸ್ ಮಾಡಿದ್ದು,ಅದರಲ್ಲಿ ಭೂಗತ ಪಾತಕಿಯ ಹೆಸರಿದೆ.
ಪಾಕಿಸ್ತಾನದಲ್ಲಿ 88 ಉಗ್ರ ಸಂಘಟನೆಗಳ ಮೇಲೆ ಮತ್ತಷ್ಟು ನಿರ್ಬಂಧಗಳನ್ನು ಹೇರಿ ಆದೇಶ ಹೊರಡಿಸಲಾಗಿದ್ದು, ಅದರ ಮುಖಂಡರಿಗೆ ಪತ್ರದ ಮೂಲಕ ತಿಳಿಸಲಾಗುತ್ತಿದೆ. ಇದರಲ್ಲಿ ಕರಾಚಿಯಲ್ಲಿರುವ ದಾವೂದ್ ಇಬ್ರಾಹಿಂಗೂ ಪತ್ರ ರವಾನೆಯಾಗಿದೆ. ಪಾಕ್ ಸರ್ಕಾರದಿಂದಲೇ ಅಲ್ಲಿನ ಉಗ್ರ ಸಂಘಟನೆಗಳಿಗೆ ಹಣ ರವಾನೆಯಾಗುತ್ತಿದ್ದು, ಇದೀಗ ಅದಕ್ಕೆ ಕಡಿವಾಣ ಹಾಕುವ ವಿಚಾರವಾಗಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಜಮಾತ್-ಉದ್-ದವಾ ಮುಖ್ಯಸ್ಥ ಹಫೀಜ್ ಸಯೀದ್, ಜೆಎಂನ ಮೊಹಮ್ಮದ್ ಮಸೂದ್ ಅಜರ್ ಮತ್ತು ಜಕಿಯೂರ್ ರೆಹಮಾನ್ ಲಖ್ವಿ, ದಾವೂದ್ ಇಬ್ರಾಹಿಂ ಸೇರಿದಂತೆ ಭಯೋತ್ಪಾದಕ ಮುಖಂಡರ ಹೆಸರು ಪಟ್ಟಿಯಲ್ಲಿದೆ. ಲಭ್ಯವಾಗಿರುವ ವರದಿಗಳ ಪ್ರಕಾರ ದಾವೂದ್ ಇಬ್ರಾಹಿಂ ಕರಾಚಿಯ ಶ್ವೇತಭವನದಲ್ಲಿ ವಾಸಿಸುತ್ತಿದ್ದು, ಮನೆ ಸಂಖ್ಯೆ 37, ರಸ್ತೆ ಸಂಖ್ಯೆ 30, ವಸತಿ ಪ್ರಾಧಿಕಾರ, ಕರಾಚಿ ಎಂದು ಉಲ್ಲೇಖಗೊಂಡಿದೆ.
ಕಳೆದ ಕೆಲ ದಿನಗಳ ಹಿಂದೆ ದಾವೂದ್ ಇಬ್ರಾಹಿಂಗೆ ಕೊರೊನಾ ಸೋಂಕು ಇರುವುದು ಕನ್ಫರ್ಮ್ ಆಗಿತ್ತು. ಅವರಿಗೆ ಅಲ್ಲಿನ ಸೇನಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗಿತ್ತು.
