ಕ್ಯಾಲಿಫೋರ್ನಿಯಾ (ಅಮೆರಿಕ): ಮೊನ್ನೆಯಷ್ಟೇ ಮಂಗಳ ಗ್ರಹದ ಮೇಲೆ ಲ್ಯಾಂಡ್ ಆಗಿರುವ ರೋವರ್, ಒಂದು ದಿನದ ಬಳಿಕ ಕೆಲವು ಚಿತ್ರಗಳನ್ನು ನಾಸಾಗೆ ಕಳುಹಿಸಿದೆ.
ಪರ್ಸೆವೆರೆನ್ಸ್ ರೋವರ್‌ನ ಕ್ಯಾಮೆರಾಗಳು ಸೆರೆಹಿಡಿದ ಇವು ವರ್ಣರಂಜಿತವಾಗಿದ್ದು, ಈ ಹಿಂದಿನ ರೋವರ್ ಕೇವಲ ಕಪ್ಪು-ಬಿಳುಪು ಫೋಟೋಗಳನ್ನು ಕಳುಹಿಸುತ್ತಿತ್ತು. ನಾಸಾ ಇಂಜಿನಿಯರ್‌ಗಳು ಮತ್ತು ವಿಜ್ಞಾನಿಗಳ ಪರಿಶ್ರಮದ ಫಲವಾದ ರೋವರ್, ಮುಂದಿನ ದಿನಗಳಲ್ಲಿ ಹೆಚ್ಚೆಚ್ಚು ಮಾಹಿತಿಗಳನ್ನು ರವಾನಿಸಲಿದೆ ಎಂಬ ವಿಶ್ವಾಸ ನಾಸಾದ್ದಾಗಿದೆ.
ಇದನ್ನೂ ಓದಿ: ಮಂಗಳನಲ್ಲಿ ರೋವರ್ ಲ್ಯಾಂಡಿಂಗ್: ಭಾರತೀಯ ಮೂಲದ ವಿಜ್ಞಾನಿಯ ಮಹತ್ವದ ಪಾತ್ರ
ಮಂಗಳನ ಅಂಗಳದಲ್ಲಿ ಪರ್ಸೆವೆರೆನ್ಸ್ ಹೆಸರಿನ ರೊಬಾಟಿಕ್‌ ರೋವರ್ ಅನ್ನು ಯಶಸ್ವಿಯಾಗಿ ನಾಸಾ ಇಳಿಸಿದೆ. ಮಂಗಳ ಗ್ರಹದಲ್ಲಿನ ಸೂಕ್ಷ್ಮಾಣು ಜೀವಿಗಳ ಕುರುಹು, ಅಲ್ಲಿನ ಮಣ್ಣು ಹಾಗೂ ವಾತಾವರಣದ ಬಗ್ಗೆ ಅಧ್ಯಯನ ನಡೆಸಲು ಈ ರೋವರ್ ಸಹಾಯಕವಾಗಲಿದೆ. ಮಂಗಳ ಅಂಗಳ ತಲುಪಿದ ಬಳಿಕ ಅಲ್ಲಿನ ಮೊದಲ ಫೋಟೋವನ್ನು ರೋವರ್ ಕಳುಹಿಸಿತ್ತು.
ಇನ್ನು ಭಾರತೀಯ-ಅಮೆರಿಕ ಮೂಲದ ಡಾ.ಸ್ವಾತಿ ಮೋಹನ್ ಅವರು ಮಂಗಳ ಗ್ರಹದಲ್ಲಿ ರೋವರ್ ಲ್ಯಾಂಡ್ ಮಾಡುವ ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದರು.
