ವಾಷಿಂಗ್ಟನ್: ಸುಂಟರಗಾಳಿ ಅಬ್ಬರಕ್ಕೆ ಅಮೆರಿಕ ತತ್ತರಿಸಿದೆ. ಅರ್ಕಾನ್ಸಾಸ್, ಮಿಸಿಸಿಪ್ಪಿ, ಇಲಿನಾಯ್ಸ್, ಕೆಂಟುಕಿ, ಟೆನ್ನೆಸ್ಸಿ ಮತ್ತು ಮಿಸೌರಿ ಸೇರಿ 6 ರಾಜ್ಯಗಳ 30 ಕಡೆ ಶನಿವಾರ ವಿನಾಶಕಾರಿ ಸುಂಟರಗಾಳಿ ಎದ್ದಿದ್ದು, ಹಲವೆಡೆ ಅನಾಹುತ ಸಂಭವಿಸಿದೆ. ಸುಂಟರಗಾಳಿಗೆ 100ಕ್ಕೂ ಅಧಿಕ ಮಂದಿ ಸಾವನ್ನಪ್ಪಿರಬಹುದು ಎಂದು ವರದಿಯಾಗಿದೆ.
ಸುಂಟರಗಾಳಿ ಆರ್ಭಟಕ್ಕೆ ಕೆಂಟುಕಿಯಲ್ಲಿನ ಮೇಣದಬತ್ತಿ ಕಾರ್ಖಾನೆಯು ಸಂಪೂರ್ಣ ನಾಶವಾಗಿದೆ. ಸುಂಟರಗಾಳಿ ಅಪ್ಪಳಿಸಿದ ಸಮಯದಲ್ಲಿ ಮೇಣದಬತ್ತಿ ಕಾರ್ಖಾನೆಯಲ್ಲಿ ಸುಮಾರು 110 ಜನ ಕೆಲಸ ಮಾಡುತ್ತಿದ್ದರು. ಘಟನೆಯಿಂದ ಕೆಂಟುಕಿಯಲ್ಲಿ ಈಗಾಗಲೇ 50ಕ್ಕೂ ಅಧಿಕ ಜನರು ಸಾವಿಗೀಡಾಗಿದ್ದಾರೆ. ಸಾವಿನ ಸಂಖ್ಯೆಯು ನೂರರ ಗಡಿಯನ್ನು ಮೀರಬಹುದಾಗಿದೆ ಎಂದು ಕೆಂಟುಕಿ ಗವರ್ನರ್ ಆಂಡಿ ಬೆಶಿಯರ್ ಹೇಳಿದ್ದಾರೆ. ಈ ಪ್ರದೇಶದಲ್ಲಿ ತುರ್ತು ಪರಿಸ್ಥಿತಿ ಘೋಷಿಸಲಾಗಿದೆ.
ಅರ್ಕಾನ್ಸಾಸ್‌ನಲ್ಲಿ ಸುಂಟರಗಾಳಿಗೆ ನರ್ಸಿಂಗ್ ಹೋಮ್ ಹಾನಿಗೀಡಾಗಿದೆ. ಅಲ್ಲದೆ ಇಲಿನಾಯ್ಸ್‌ನಲ್ಲಿರುವ ಅಮೆಜಾನ್ ಗೋದಾಮಿನ ಮೇಲ್ಛಾವಣಿಯು ಹಾರಿಹೋಗಿದೆ. ಇಲ್ಲಿಯೂ ಕೂಡ ಕೆಲ ಸಾವು-ನೋವು ಸಂಭವಿಸಿದೆ. ಮತ್ತೊಂದು ನರ್ಸಿಂಗ್ ಹೋಮ್ ಹಾಗೂ ಟೆನ್ನೆಸ್ಸಿಯ ಟ್ರೂಮನ್‌ನಲ್ಲಿರುವ ಅಗ್ನಿಶಾಮಕ ಕೇಂದ್ರದಲ್ಲೂ ಗಣನೀಯ ಹಾನಿ ಉಂಟಾಗಿದೆ.
ಈಶಾನ್ಯ ಅರ್ಕಾನ್ಸಾಸ್‌ನಲ್ಲಿ ಅಪ್ಪಳಿಸಿದ ಅತ್ಯಂತ ಭೀಕರ ಸುಂಟರಗಾಳಿಯಾಗಿದ್ದು, ಕೆಂಟುಕಿಯಲ್ಲಿ ಸುಮಾರು 223 ಮೈಲುಗಳವರೆಗೆ ಸುಂಟರಗಾಳಿ ರೌದ್ರಾವತಾರ ತೋರಿದೆ. ಇದು ಇತಿಹಾಸದಲ್ಲಿ ಅತಿ ದೂರದವರೆಗೆ ಅಪ್ಪಳಿಸಿದ ಸುಂಟರಗಾಳಿ ಎಂದು ಸ್ಥಳೀಯ ಮಾಧ್ಯಮವೊಂದು ವರದಿ ಮಾಡಿದೆ.
ಸುಂಟರಗಾಳಿ ಭೀಕರತೆಗೆ ನಾಲ್ಕು ರಾಜ್ಯಗಳಲ್ಲಿ ಸುಮಾರು 331,549 ಗ್ರಾಹಕರು ವಿದ್ಯುತ್ ಸೌಲಭ್ಯ ಕಳೆದುಕೊಂಡಿದ್ದಾರೆ. ಇನ್ನೊಂದೆಡೆ ರಾಷ್ಟ್ರೀಯ ಹವಾಮಾನ ಸೇವಾ ಕೇಂದ್ರವು ಸುಂಟರಗಾಳಿಯೊಂದಿಗೆ ಗುಡುಗು ಸಹಿತ ಮಳೆಯಾಗುವ ಎಚ್ಚರಿಕೆ ನೀಡಿದೆ.
ಇದನ್ನೂ ಓದಿ: ವಿಜಯಪುರ: ನೇಣು ಬಿಗಿದ ಸ್ಥಿತಿಯಲ್ಲಿ ಅಪ್ರಾಪ್ತೆ ಶವ ಪತ್ತೆ.. ಪ್ರೀತಿಸುತ್ತಿದ್ದ ಯುವಕನಿಂದಲೇ ಕೊಲೆ?
