ಕನ್ನಡ ಚಿತ್ರರಂಗದಲ್ಲಿ ಬಯೋಪಿಕ್ ಸಿನಿಮಾಗಳ ಟ್ರೆಂಡ್ ಜೋರಾಗಿದೆ. ಬೆಂಗಳೂರಿನ ಒಂದು ಕಾಲದ ಅಂಡರ್‌ವಲ್ಡ್‌ ಡಾನ್‌ ಜಯರಾಜ್‌ ಅವರ ಬದುಕನ್ನು ತೆರೆಮೇಲೆ ತರುವ ಕೆಲಸ ಶುರುವಾಗಿದೆ.
ಈ ಸಿನಿಮಾಗೆ 'ಹೆಡ್ಬುಷ್' ಎಂದು ಟೈಟಲ್‌ ಇಡಲಾಗಿದೆ. ಆರಂಭದಿಂದಲೇ ಸಿನಿಮಾ ಸ್ಯಾಂಡಲ್ವುಡ್ ಅಲ್ಲದೇ ಬೇರೆ ಭಾಷೆಗಳಲ್ಲೂ ಸದ್ದು ಮಾಡುತ್ತಿದೆ.
ಕೆಲವು ದಿನಗಳ ಹಿಂದೆ ಚಿತ್ರಕ್ಕೆ ಲೂಸ್ ಮಾದ ಯೋಗಿ ಪ್ರವೇಶಿಸಿದ್ದರು. ಇದೀಗ ವಸಿಷ್ಠ ಸಿಂಹ ಹಾಗು ನಟಿ ಶ್ರುತಿ ಹರಿಹರನ್ ಚಿತ್ರದ ಅಡ್ಡಕ್ಕೆ ಬಂದಿದ್ದಾರೆ. ಇದೊಂದು ನೈಜ ಘಟನೆ ಆಧರಿಸಿದ ಸಿನಿಮಾ. ಅಗ್ನಿ ಶ್ರೀಧರ್‌ ಕಥೆ ಮತ್ತು ಚಿತ್ರಕಥೆ ಬರೆದಿದ್ದಾರೆ. ಶೂನ್ಯ ಎಂಬ ಯುವ ನಿರ್ದೇಶಕ ನಿರ್ದೇಶನದ ಹೊಣೆ ಹೊತ್ತಿದ್ದಾರೆ.
ಹೆಡ್ಬುಷ್ ಸಿನಿಮಾದಲ್ಲಿ ಹಲವು ನೈಜ ಪಾತ್ರಗಳು ಬರಲಿವೆ. ಅಂತೆಯೇ, ಜಯರಾಜ್‌ ಪಾತ್ರವನ್ನು ಡಾಲಿ ಧನಂಜಯ ಮಾಡುತ್ತಿದ್ದಾರೆ. ಈ ಪಾತ್ರಕ್ಕಾಗಿ ಅವರು ದೇಹದ ತೂಕ ಹೆಚ್ಚಿಸಿಕೊಂಡಿದ್ದಾರೆ. ನಾಯಕಿಯಾಗಿ ಬಹುಭಾಷಾ ನಟಿ ಪಾಯಲ್‌ ರಜಪೂತ್‌ ಆಯ್ಕೆಯಾಗಿದ್ದಾರೆ.
ಟಗರು ಸಿನಿಮಾದ ಬಳಿಕ, ಧನಂಜಯ ಹಾಗು ವಸಿಷ್ಠಸಿಂಹ ಒಟ್ಟಿಗೆ ನಟಿಸುತ್ತಾರೆ ಎಂಬಂತಹ ಸುದ್ದಿಗಳು ಹರಿದಾಡಿದ್ದವು. ಆದರೆ ಅದ್ಯಾವುದೂ ನಿಜವಾಗಲಿಲ್ಲ. ಈಗ ಹೆಡ್ ಬುಷ್ ಚಿತ್ರದಲ್ಲಿ ಡಾಲಿ ಮತ್ತು ಚಿಟ್ಟೆ ಮತ್ತೆ ಒಂದಾಗುತ್ತಿದ್ದಾರೆ. ಈಗಾಗಲೇ ಬೆಂಗಳೂರಿನ ಹೊರವಲಯದಲ್ಲಿ ಶೂಟಿಂಗ್ ಆರಂಭವಾಗಿದೆ.
ಈ ಸಿನಿಮಾದಲ್ಲಿ ವಸಿಷ್ಠ ಸಿಂಹ ಸಹ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಟಗರು ಚಿತ್ರದ ನಂತರ ಧನಂಜಯ ಮತ್ತು ವಸಿಷ್ಠ ಸಿಂಹ ಒಟ್ಟಿಗೆ ನಟಿಸುತ್ತಿರುವ ಸಿನಿಮಾ ಇದು. ಹೀಗಾಗಿ ಚಿತ್ರದಲ್ಲಿ ಇವರಿಬ್ಬರ ಜುಗಲ್‌ಬಂದಿ ಹೇಗಿರುತ್ತೆ ಅನ್ನೋದು ಅಭಿಮಾನಿಗಳ ಕುತೂಹಲ.
ಶ್ರುತಿ ಹರಿಹರನ್ ಕೂಡ ಚಿತ್ರದಲ್ಲಿ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಡಾಲಿ ಪಿಕ್ಚರ್ಸ್ ಮತ್ತು ಸೋಮಣ್ಣ ಟಾಕೀಸ್ ಲಾಂಛನದಲ್ಲಿ ಡಾಲಿ ಧನಂಜಯ ಹಾಗೂ ರಾಮ್ಕೋ ಸೋಮಣ್ಣ ಸಿನಿಮಾ ನಿರ್ಮಿಸುತ್ತಿದ್ದಾರೆ.
ಇದನ್ನೂ ಓದಿ: ಸುದೀಪ್ ಅಭಿಮಾನಿಗಳಲ್ಲಿ ಕ್ಷಮೆ ಕೇಳಿದ ನಿರ್ಮಾಪಕ ಜಾಕ್ ಮಂಜು.. ಕಾರಣ?
