'ಕೆಜಿಎಫ್'ನಂತಹ ಸಿನಿಮಾ ಮೂಲಕ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಬಿಗ್ ಹಿಟ್ ನೀಡಿದ ನಿರ್ದೇಶಕ ನಟ ಪ್ರಶಾಂತ್ ನೀಲ್. 'ಕೆಜಿಎಫ್ ಚಾಪ್ಟರ್ 2' ಬಿಡುಗಡೆ ಬಳಿಕ ಇವರು ಹಾರಿದ್ದು, ತೆಲುಗು ಉದ್ಯಮಕ್ಕೆ. ನಟ ಪ್ರಭಾಸ್ ಜೊತೆಗೆ 'ಸಲಾರ್' ಚಿತ್ರ ನಿರ್ದೇಶನಕ್ಕೆ ಮುಂದಾಗಿದ್ದು, ಇದು ಚಿತ್ರದ ಬಗ್ಗೆ ಈಗಾಗಲೇ ರಾಷ್ಟ್ರಮಟ್ಟದಲ್ಲಿ ನಿರೀಕ್ಷೆ ಮೂಡಿದೆ. ಪ್ರಶಾಂತ್ ನೀಲ್ ಅದ್ಭುತ ಕಥೆ, ನಿರ್ದೇಶನ ಜೊತೆಗೆ ನಟ ಪ್ರಭಾಸ್ ಅವರ ಆ್ಯಕ್ಷನ್ ಥ್ರಿಲ್ಲರ್ ಸವಿಯಲು ಜನರು ಕಾತರರಾಗಿದ್ದಾರೆ. ಈ ನಡುವೆ ಚಿತ್ರದ ಅಪ್ಡೇಟ್ಗಳಿಗೆ ಕಾಯುತ್ತಿರುವ ಜನರು ಈ ಚಿತ್ರದ ಟೀಸರ್ ಯಾವಾಗ ಬಿಡುಗಡೆಯಾಗಲಿದೆ ಎಂಬ ಪ್ರಶ್ನೆಯನ್ನು ತಂಡದ ಮೇಲೆ ಹಾಕುತ್ತಿದ್ದಾರೆ.
ನಟ ಪ್ರಭಾಸ್ ಅವರ ಪೌರಾಣಿಕ ಕಥೆಯ 'ಆದಿಪುರುಷ್' ಚಿತ್ರದ ಪ್ರಚಾರದ ವೇಳೆ ಅಭಿಮಾನಿಗಳು ಅವರ ಸಲಾರ್ ಚಿತ್ರ ಟೀಸರ್ ಕುರಿತು ಹೆಚ್ಚು ಪ್ರಶ್ನಿಸಿದ್ದಾರೆ. ಚಿತ್ರ ಸೆಟ್ಟೇರಿ ವರ್ಷಗಳು ಕಳೆದಿದೆ. ಅಲ್ಲದೇ, ಚಿತ್ರವೂ ಇನ್ನೇನು ತೆರೆಗೆ ಬರಲು ಸಜ್ಜಾಗಿದ್ದು, ಟೀಸರ್ ಯಾವಾಗ ಬಿಡುಗಡೆ ಮಾಡುತ್ತೀರಾ ಎಂಬ ಒತ್ತಡವನ್ನು ಹೋದ ಬಂದ ಕಡೆಯಲ್ಲಿ ಹಾಕುತ್ತಿದ್ದಾರೆ. ಇದು ಕೇವಲ ನಟ ಪ್ರಭಾಸ್ಗೆ ಮಾತ್ರವಲ್ಲ, ನಿರ್ದೇಶಕ ಪ್ರಶಾಂತ್ ನೀಲ್ ಮತ್ತು ನಿರ್ಮಾಪಕ ವಿಜಯ್ ಕಿರಗಂದೂರಿಗೂ ಸಾಮಾಜಿಕ ಜಾಲತಾಣದಲ್ಲಿ ಈ ಒತ್ತಡ ಹೆಚ್ಚಿದೆ.
ವರದಿಗಳ ಪ್ರಕಾರ, ನಟ ಪ್ರಭಾಸ್ ಅವರ 'ಸಲಾರ್' ಚಿತ್ರದ ಕೆಲವು ಸೀನ್ಗಳನ್ನು ಅವರ ಬಹು ನಿರೀಕ್ಷಿತ ಚಿತ್ರ 'ಆದಿಪುರಷ್' ಚಿತ್ರದ ಜೊತೆ ಥಿಯೇಟರ್ನಲ್ಲಿ ಬಿಡುಗಡೆ ಮಾಡಲು ತಂಡ ಯೋಜಿಸಿದೆ ಎನ್ನಲಾಗಿದೆ. ಓಂ ರಾವತ್ ನಿರ್ದೇಶನಲದಲ್ಲಿ ಮೂಡಿ ಬರುತ್ತಿರುವ ಚಿತ್ರ ಇದೇ ಜೂನ್ 16ರಂದು ಬಿಡುಗಡೆಗೆ ಸಜ್ಜಾಗಿದೆ. ಚಿತ್ರದಲ್ಲಿ ನಟಿ ಕೃತಿ ಸನೋನ್ ಮತ್ತು ನಟ ಸೈಫ್ ಅಲಿ ಖಾನ್ ಸೇರಿದಂತೆ ಪ್ರಮುಖರು ಬಣ್ಣ ಹಚ್ಚಿದ್ದಾರೆ. ನಟ ಪ್ರಭಾಸ್ ಅವರ ಈ ಚಿತ್ರಕ್ಕೆ ಕಿಕ್ ಸ್ಟಾರ್ಟ್ ನೀಡಲು 'ಸಲಾರ್' ಚಿತ್ರ ತಂಡ ಕೂಡ ಸಜ್ಜಾಗಿದೆ ಎನ್ನಲಾಗಿದೆ.
'ಸಲಾರ್' ಚಿತ್ರ ಕುರಿತು: ನಟ ಪ್ರಭಾಸ್ ಮತ್ತೆ ತಮ್ಮ ಆ್ಯಕ್ಷನ್ ಪವರ್ ಪ್ಯಾಕ್ನಲ್ಲಿ 'ಸಲಾರ್' ಚಿತ್ರದಲ್ಲಿ ಕಾಣಿಸಲಿದ್ದಾರೆ. ಈ ಚಿತ್ರದಲ್ಲಿ ನಟ ದ್ವಿಪಾತ್ರವನ್ನು ನಿರ್ವಹಣೆ ಮಾಡುತ್ತಿದ್ದಾರೆ. ಎರಡು ದೇಶಗಳ ನಡುವಿನ ಇಬ್ಬರು ಯುವಕರು ತಮ್ಮ ಸಂಸ್ಕೃತಿಕ ಭಿನ್ನತೆ, ಹಲವು ಸವಾಲುಗಳನ್ನು ದಾಟಿ ಒಂದಾಗುವ ಚಿತ್ರಕಥೆ ಇದಾಗಿದೆ ಎಂದು ಈ ಮೊದಲು ಹೇಳಲಾಗಿತ್ತು.
ಈ ಚಿತ್ರಕ್ಕೆ ಪ್ರಶಾಂತ್ ನೀಲ್ ಆಕ್ಷ್ಯನ್ ಕಟ್ ಹೇಳಿದರೆ, ವಿಜಯ್ ಅವರ "ಹೊಂಬಾಳೆ ಫಿಲ್ಮ್ಸ್" ಬಂಡವಾಳ ಹೂಡಿದೆ. ಈ ಚಿತ್ರದಲ್ಲಿ ನಟಿ ಶೃತಿ ಹಾಸನ್ ಪ್ರಭಾಸ್ಗೆ ಜೊತೆಯಾಗಲಿದ್ದು, ಈ ನಟ ಪೃಥ್ವಿರಾಜ್ ಸುಕುಮಾರನ್ ಪ್ರಮುಖ ಪಾತ್ರದಲ್ಲಿದ್ದಾರೆ. ಈ ಚಿತ್ರ ಈಗಾಗಲೇ ಚಿತ್ರೀಕರಣ ಮುಗಿಸಿದ್ದು, ಸೆಪ್ಟೆಂಬರ್ 28ಕ್ಕೆ ತೆರೆಗೆ ಬರಲು ಸಜ್ಜಾಗಿದೆ. ತೆಲುಗಿನಲ್ಲಿ ಮೂಲ ಚಿತ್ರ ಇರಲಿದ್ದು, ಕನ್ನಡ, ತಮಿಳು, ಮಲಯಾಳಂ, ಹಿಂದಿ ಮತ್ತು ಇಂಗ್ಲಿಷ್ಗೆ ಡಬ್ಬಿಂಗ್ ಕಾಣಲಿದೆ.
ಇದನ್ನೂ ಓದಿ: ನಿಗದಿತ ಸಮಯಕ್ಕೆ ಪ್ರಭಾಸ್ ಅಭಿನಯದ 'ಸಲಾರ್' ಸಿನಿಮಾ ಬಿಡುಗಡೆ: ಚಿತ್ರತಂಡ
