ಕಾಂತಾರ...ಕಾಂತಾರ...ಕಾಂತಾರ. ಕನ್ನಡ ಚಿತ್ರರಂಗವನ್ನು ಉತ್ತುಂಗಕ್ಕೇರಿಸಿದ ಚಿತ್ರವಿದು. ಪರಭಾಷಿಗರನ್ನು ಚಂದನವನದತ್ತ ಸೆಳೆದ ಸಿನಿಮಾವಿದು. ಸಿನಿ ಪ್ರಿಯರು ಮಾತ್ರವಲ್ಲದೇ ಚಿತ್ರರಂಗದ ಸೂಪರ್ ಸ್ಟಾರ್ಗಳ ಮೆಚ್ಚುಗೆಗೂ ಪಾತ್ರವಾದ ಚಿತ್ರವಿದು. ಸಿನಿಮಾ ಬಿಡುಗಡೆ ಅಗಿ ಮೂರು ವಾರಗಳು ಆಗುತ್ತ ಬಂದಿದ್ದು ಕ್ರೇಜ್ ಮಾತ್ರ ಕಡಿಮೆ ಆಗಿಲ್ಲ. ದಿನ ಕಳೆದಂತೆ ಪ್ರೇಕ್ಷಕರ, ಮೆಚ್ಚುಗೆ ವ್ಯಕ್ತಪಡಿಸುವವರ ಸಂಖ್ಯೆ ಹೆಚ್ಚುತ್ತಲಿದೆ. ಈ ಸಾಲಿಗೆ ಈಗ ತುಳುನಾಡಿನ ಶಿಲ್ಪಾ ಶೆಟ್ಟಿ ಹೊಸ ಸೇರ್ಪಡೆ.
ವಿಭಿನ್ನ ಕಥಾಹಂದರವುಳ್ಳ ಕಾಂತಾರ ಚಿತ್ರವನ್ನು ರಿಷಬ್ ಶೆಟ್ಟಿ ನಿರ್ದೇಶಿಸುವುದರ ಜೊತೆಗೆ ಅತ್ಯದ್ಭುತ ಅಭಿನಯ ಮಾಡಿದ್ದಾರೆ. ಕರಾವಳಿ ಮೂಲದ ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಕಾಂತಾರ ಚಿತ್ರವನ್ನು ವೀಕ್ಷಿಸಿ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಚಿತ್ರಮಂದಿರದಲ್ಲಿ ಕಾಂತಾರ ಸಿನಿಮಾವನ್ನು ವೀಕ್ಷಿಸಿದೆ. ಓ ಮೈ ಗಾಡ್! ಎಂಥಹ ನಿರೂಪಣೆ, ಭಾವನೆ, ವೈಬ್. ಕ್ಲೈಮ್ಯಾಕ್ಸ್ ಅಂತೂ ಅತ್ಯದ್ಭುತ. ವೀಕ್ಷಕನನ್ನು ಹೊಸ ಜಗತ್ತಿಗೆ ಕರೆದೊಯ್ಯುತ್ತದೆ. ನಾನು ಸೇರಿದ ಜಗತ್ತಿಗೆ, ನಿಜವಾಗಿಯೂ ನನ್ನನ್ನು ನನ್ನ ಮೂಲಕ್ಕೆ ಕರೆದೊಯ್ತು ಈ ಸಿನಿಮಾ. ಕಥೆ ಹೇಳುವಿಕೆ, ಹೃದಯ, ನಂಬಿಕೆ ಮತ್ತು ನಿರ್ದೇಶನದ ಸಂಪೂರ್ಣ ಪ್ರಕಾಶಕ್ಕಾಗಿ ಈ ಸಿನಿಮಾವನ್ನು ನೋಡಲೇಬೇಕು. ರಿಷಬ್ ಶೆಟ್ಟಿ ನಿಮ್ಮ ಬಹುಮುಖ ಪ್ರತಿಭೆಗೆ ಹ್ಯಾಟ್ಸ್ ಆಫ್, ಈ ಯೋಜನೆಯಲ್ಲಿ ನೀವು ಅನೇಕ ಕ್ಯಾಪ್ ಗಳನ್ನು ಧರಿಸಿದ್ದೀರಿ ಮತ್ತು ಅದಕ್ಕೆ ಗರಿಗಳನ್ನು ಕೂಡ ಸೇರಿಸಿದ್ದೀರಿ. ಯಶಸ್ಸನ್ನು ಆನಂದಿಸಿ ಎಂದು ಶುಭ ಕೋರಿದ್ದಾರೆ.
ಇದನ್ನೂ ಓದಿ: 'ಕಾಂತಾರವೆಂಬ ಅದ್ಭುತ ಪಾಠ ಮಾಡಿದ ರಿಷಬ್ ಶೆಟ್ಟಿಗೆ ಫೀಸ್ ಪಾವತಿಸಬೇಕಾಗುತ್ತದೆ' - ಆರ್ಜಿವಿ ಟ್ವೀಟ್
ಮೊದಲು ಕನ್ನಡಲ್ಲಿ ಬಿಡುಗಡೆಯಾಗಿ ಭರ್ಜರಿ ಯಶಸ್ಸು ಪಡೆಯಿತು. ಬಳಿಕ ಹಿಂದಿ ಮತ್ತು ತೆಲುಗಿನಲ್ಲಿ ಡಬ್ ಆಗಿ ಹೊರ ರಾಜ್ಯಗಲ್ಲಿಯೂ ಉತ್ತಮ ಪ್ರದರ್ಶನ ಕಾಣುತ್ತಿದೆ. ಇನ್ನೆರಡು ದಿನಗಳಲ್ಲಿ ಮಲಯಾಳಂ ಭಾಷೆಯಲ್ಲೂ ಈ ಸಿನಿಮಾ ತೆರೆ ಕಾಣಲಿದೆ.
