ಬಹುಭಾಷಾ ನಟ ಆಶಿಶ್ ವಿದ್ಯಾರ್ಥಿ ಕಳೆದ ತಿಂಗಳು ಅಸ್ಸಾಂನ ಫ್ಯಾಷನ್ ಉದ್ಯಮಿ ರೂಪಾಲಿ ಬರೋವಾ ಅವರನ್ನು ವಿವಾಹವಾಗುವ ಮೂಲಕ ಸುದ್ದಿಯಾಗಿದ್ದರು. 60ನೇ ವಯಸ್ಸಿನಲ್ಲಿ ನಟ ಎರಡನೇ ವಿವಾಹವಾಗಿದ್ದು, ಅವರಿಬ್ಬರ ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದವು. ಇದೀಗ ಈ ಜೋಡಿ ಒಟ್ಟಿಗೆ ಕಾಲ ಕಳೆಯಲು ಬಹಿರಂಗಪಡಿಸದ ಸುಂದರ ಸ್ಥಳವೊಂದಕ್ಕೆ ತೆರಳಿದ್ದಾರೆ. ಅಲ್ಲಿ ಕ್ಲಿಕ್ಕಿಸಿದ ಫೋಟೋವೊಂದನ್ನು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
"ಪ್ರೀತಿಯ ಸ್ನೇಹಿತ, ನಿಮ್ಮ ಪ್ರೀತಿ ಮತ್ತು ಹಾರೈಕೆಗಳಿಗೆ ಧನ್ಯವಾದಗಳು. ಈ ಸುಂದರವಾದ ಸೆರೆಹಿಡಿಯುವಿಕೆಗೆ ಥ್ಯಾಂಕ್ಸ್" ಎಂದು ಆಶಿಶ್ ಪೋಸ್ಟ್ಗೆ ಕ್ಯಾಪ್ಶನ್ ಬರೆದಿದ್ದಾರೆ. ನವವಿವಾಹಿತರು ಕ್ಯಾಮರಾಕ್ಕಾಗಿ ಸಂತೋಷದಿಂದ ನಗುತ್ತಿರುವುದನ್ನು ಫೋಟೋದಲ್ಲಿ ಕಾಣಬಹುದು. ಚಿತ್ರಗಳಿಗೆ ಆಶಿಶ್ ಅಭಿಮಾನಿಗಳು ಪ್ರೀತಿಯ ಸುರಿಮಳೆಗೈದಿದ್ದಾರೆ. ಕಾಮೆಂಟ್ ಮೂಲಕ ಮೆಚ್ಚುಗೆ ಸೂಚಿಸಿದ್ದಾರೆ.
ಆಶಿಶ್ ವಿದ್ಯಾರ್ಥಿ ಅವರು 20 ವರ್ಷಗಳ ಹಿಂದೆ ಬಂಗಾಳಿ ನಟಿ ರಾಜೋಶಿ ಅವರನ್ನು ವಿವಾಹವಾಗಿದ್ದರು. ಅವರು ಪ್ರಸಿದ್ಧ ರಂಗಭೂಮಿ ಕಲಾವಿದೆಯಾಗಿದ್ದಲ್ಲದೇ ಗಾಯಕರೂ ಆಗಿದ್ದಾರೆ. ಹಾಗೆಯೇ ಅವರಿಗೆ ಒಬ್ಬ ಮಗನೂ ಇದ್ದಾನೆ. ಆದರೆ, ಕೆಲವು ವರ್ಷಗಳ ಹಿಂದೆ, ಭಿನ್ನಾಭಿಪ್ರಾಯದಿಂದ ದಂಪತಿ ಬೇರ್ಪಟ್ಟರು. ಅಂದಿನಿಂದ ಒಂಟಿಯಾಗಿದ್ದ ಅವರು ಈಗ ಮತ್ತೆ ಮದುವೆಯಾಗಿದ್ದಾರೆ.
ಇದನ್ನೂ ಓದಿ: Rakshit Shetty: ಕನ್ನಡ ಚಿತ್ರರಂಗದಲ್ಲಿ ವಿನೂತನ ಪ್ರಯೋಗಕ್ಕೆ ಮುಂದಾದ 'ಸಪ್ತ ಸಾಗರದಾಚೆ ಎಲ್ಲೋ'; ಏನದು ಗೊತ್ತಾ?
ಈ ಬಗ್ಗೆ ಮಾತನಾಡಿರುವ ನಟ ವಿಡಿಯೋವೊಂದನ್ನು ಹಂಚಿಕೊಂಡಿದ್ದರು. "ನಾನು ಮತ್ತು ರೂಪಾಲಿ ಒಂದು ವರ್ಷದ ಹಿಂದೆ ಭೇಟಿಯಾದೆವು ಮತ್ತು ನಾವು ಆ ದಿನದಿಂದ ಚಾಟ್ ಮಾಡಲು ಪ್ರಾರಂಭಿಸಿದೆವು. ನಾವಿಬ್ಬರು ಒಬ್ಬರಿಗೊಬ್ಬರು ಜೊತೆಯಾಗುವುದನ್ನು ಕಲ್ಪಿಸಿಕೊಂಡೆವು. ಪರಿಣಾಮವಾಗಿ ರೂಪಾಲಿ ಮತ್ತು ನಾನು ಮದುವೆಯಾಗಲು ನಿರ್ಧರಿಸಿದೆವು. ಅವರಿಗೆ 50, ನನಗೆ 57, 60 ಅಲ್ಲ. ಆದರೆ ವಯಸ್ಸು ಮುಖ್ಯವಲ್ಲ. ನಮ್ಮಲ್ಲಿ ಪ್ರತಿಯೊಬ್ಬರೂ ಯಾವ ವಯಸ್ಸಿನಲ್ಲದರೂ ಸಂತೋಷವಾಗಿರಬಹುದು." ಎಂದು ಹೇಳಿದ್ದರು.
ಆಶಿಶ್ ಬಹುಭಾಷಾ ನಟ: ಆಶಿಶ್ ವಿದ್ಯಾರ್ಥಿ ಕನ್ನಡ ಸೇರಿದಂತೆ ಸುಮಾರು 11 ಭಾಷೆಗಳಲ್ಲಿ ಖಳನಟನಾಗಿ, ಕ್ಯಾರೆಕ್ಟರ್ ಆರ್ಟಿಸ್ಟ್ ಆಗಿ, ಪೋಷಕ ನಟರಾಗಿ ಬಣ್ಣ ಹಚ್ಚಿದ್ದಾರೆ. ಅವರ ನಟನೆಗೆ ರಾಷ್ಟ್ರ ಪ್ರಶಸ್ತಿ ಸೇರಿದಂತೆ ಹಲವು ಪ್ರಶಸ್ತಿಗಳು ಕೂಡ ಲಭಿಸಿವೆ. ಕನ್ನಡದಲ್ಲಿ ದುರ್ಗಿ, ಕೋಟಿಗೊಬ್ಬ, ಎಕೆ-47, ವಂದೇ ಮಾತರಂ, ಸೈನಿಕ, ನಂದಿ, ಆಕಾಶ್, ನಮ್ಮಣ್ಣ, ತಂದೆಗೆ ತಕ್ಕ ಮಗ, ಸುಂಟರಗಾಳಿ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ.
ಅವರು ಇತ್ತೀಚೆಗೆ ‘ರೈಟರ್ ಪದ್ಮಭೂಷಣ’ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದಾರೆ. ಇದಲ್ಲದೇ ‘ರಾಣಾ ನಾಯ್ಡು’ ವೆಬ್ ಸಿರೀಸ್ನಲ್ಲಿಯೂ ವಿಲನ್ ಪಾತ್ರದಲ್ಲಿ ನಟಿಸಿ ಗಮನ ಸೆಳೆದಿದ್ದಾರೆ. ಸದ್ಯ ಆಶಿಶ್ ಯೂಟ್ಯೂಬ್ ಚಾನೆಲ್ ಕೂಡ ನಡೆಸುತ್ತಿದ್ದಾರೆ. ಅವರು ದೇಶಾದ್ಯಂತ ಸಂಚರಿಸುತ್ತಿದ್ದು ಆಗಾಗ ಉತ್ತಮ ವ್ಲಾಗ್‌ಗಳನ್ನು ಪೋಸ್ಟ್ ಮಾಡುತ್ತಿದ್ದಾರೆ.
ಇದನ್ನೂ ಓದಿ: Adipurush ಬಿಡುಗಡೆಗೆ ಕ್ಷಣಗಣನೆ: ಮುಂಗಡ ಬುಕ್ಕಿಂಗ್ನಲ್ಲಿ ಕೆಜಿಎಫ್, ಪಠಾಣ್ ದಾಖಲೆ ಮುರಿಯಲಿದೆಯಾ ಆದಿಪುರುಷ್?
