ಮಜೌಲಿ (ಅಸ್ಸೋಂ): ಮಜೌಲಿಯಲ್ಲಿ ಬುಧವಾರ ಸಂಜೆ ಹೃದಯಾಘಾತವಾಗಿ ಬಾಲ ಕಲಾವಿದೆ ಸಾವನ್ನಪ್ಪಿದ್ದಾರೆ. ಈ ದುರದೃಷ್ಟಕರ ಮತ್ತು ಅಕಾಲಿಕ ಮರಣವು ದ್ವೀಪದ ಜನರನ್ನು ದುಃಖಿತರನ್ನಾಗಿಸಿದೆ. ಮಜೌಲಿ ದ್ವೀಪದ ಆರೋಗ್ಯ ಕ್ಷೇತ್ರದಲ್ಲಿನ ಕಳಪೆ ಮೂಲಸೌಕರ್ಯಗಳ ಬಗ್ಗೆ ಸರ್ಕಾರ ನಿರಾಸಕ್ತಿ ವಹಿಸಿದೆ ಎಂದು ಜನರು ಆರೋಪಿಸಿ ಆಕ್ರೋಶಗೊಂಡಿದ್ದಾರೆ.
ಮಜೌಲಿಯ ಜನಪ್ರಿಯ ಗಾಯಕಿ ತೇಜಸ್ವಿತಾ ಬೋರಾ (14) ಮೃತ ಬಾಲಕಿ. ಮಜೌಲಿಯಲ್ಲಿ ನಡೆದ ಸಂಕರ್ದೇವ್ ಜಯಂತಿ ಉತ್ಸವದಲ್ಲಿ ತಮ್ಮ ಪ್ರದರ್ಶನಕ್ಕೂ ಮೊದಲು ತೀವ್ರ ಹೃದಯಾಘಾತಕ್ಕೆ ಒಳಗಾದರು. ಉತ್ಸವದ ಸ್ಥಳದಲ್ಲಿ ಆಕ್ಸಿಜನ್ ಸಿಲಿಂಡರ್‌ಗಳು ಲಭ್ಯವಿಲ್ಲದ ಹಿನ್ನೆಲೆ ಆಕೆಯನ್ನು ತಕ್ಷಣವೇ ಗೋರ್ಮುರ್‌ನಲ್ಲಿರುವ ಶ್ರೀ ಪಿತಾಂಬರ ದೇವ ಗೋಸ್ವಾಮಿ ಜಿಲ್ಲಾ ಸಿವಿಲ್ ಆಸ್ಪತ್ರೆಗೆ ದಾಖಲಿಸಲಾಯಿತು.
ಮತ್ತೊಂದೆಡೆ, ದ್ವೀಪದಿಂದ ರಾತ್ರಿ ದೋಣಿ ಸೇವೆ ಇಲ್ಲದ ಕಾರಣ ರೋಗಿಯನ್ನು ಜೋರ್ಹತ್ ಅಥವಾ ಲಖಿಂಪುರಕ್ಕೆ ಸ್ಥಳಾಂತರಿಸಲು ಸಾಧ್ಯವಾಗಲಿಲ್ಲ. ಇಂತಹ ಪರಿಸ್ಥಿತಿಯಲ್ಲಿ ತೇಜಸ್ವಿತಾಳನ್ನು ಆಸ್ಪತ್ರೆಯಲ್ಲಿ ಎರಡು ಗಂಟೆಗಳ ಕಾಲ ಯಾರೂ ಗಮನಿಸದ ಹಿನ್ನೆಲೆ ಬಾಲಕಿ ಕೊನೆಯುಸಿರೆಳೆದಳು ಎಂದು ಆರೋಪಿಸಲಾಗಿದೆ.
ಈ ಹಿನ್ನೆಲೆ, ಅಸ್ಸಾಂ ಆರೋಗ್ಯ ಇಲಾಖೆಯು ಶ್ರೀ ಪಿತಾಂಬರ ದೇವ ಗೋಸ್ವಾಮಿ ಜಿಲ್ಲಾ ಸಿವಿಲ್ ಆಸ್ಪತ್ರೆಯ ಮೇಲ್ವಿಚಾರಕಿ ಡಾ. ಅಮೂಲ್ಯ ಗೋಸ್ವಾಮಿ ಅವರನ್ನು ಅಮಾನತುಗೊಳಿಸಿದೆ. ಜೊತೆಗೆ ಈ ಬಗ್ಗೆ ತನಿಖೆಗೆ ಆದೇಶಿಸಿದೆ.
ಇದನ್ನೂ ಓದಿ: ಕಳಚಿತು ಹಾಸ್ಯಲೋಕದ ಮತ್ತೊಂದು ಕೊಂಡಿ.. ಕಾಮಿಡಿಯನ್ ಪರಾಗ್ ಕನ್ಸಾರಾ ವಿಧಿವಶ
ಮಜೌಲಿ ವಿಧಾನಸಭಾ ಕ್ಷೇತ್ರವನ್ನು ಸರ್ಬಾನಂದ ಸೋನೋವಾಲ್ ಅವರು ಎರಡು ಬಾರಿ ಪ್ರತಿನಿಧಿಸಿದ್ದರು. ಅವರು 2016ರಲ್ಲಿ ಮೊದಲ ಬಾರಿಗೆ ಆಯ್ಕೆಯಾದ ನಂತರ ರಾಜ್ಯದ ಮುಖ್ಯಮಂತ್ರಿಯಾದರು. ಸರ್ಬಾನಂದ ಸೋನೋವಾಲ್ ರಾಜೀನಾಮೆಯಿಂದ ತೆರವಾದ ಸ್ಥಾನಕ್ಕೆ ಮಾರ್ಚ್‌ನಲ್ಲಿ ನಡೆದ ಉಪಚುನಾವಣೆಯಲ್ಲಿ ಪಕ್ಷದ ಅಭ್ಯರ್ಥಿ ಭುಬನ್ ಗಾಮ್ ಪರ ಪ್ರಚಾರ ನಡೆಸುತ್ತಿದ್ದಾಗ ರಾಜ್ಯದ ಹಾಲಿ ಮುಖ್ಯಮಂತ್ರಿ ಡಾ. ಹಿಮಂತ ಬಿಸ್ವ ಶರ್ಮಾ ಅವರು ಮಜೌಲಿಯ ಆಸ್ಪತ್ರೆಗಳಿಗೆ ಆಧುನಿಕ ಸೌಲಭ್ಯಗಳನ್ನು ಒದಗಿಸುವುದು ಸೇರಿದಂತೆ ವಿವಿಧ ಅಭಿವೃದ್ಧಿ ಯೋಜನೆಗಳನ್ನು ಘೋಷಿಸಿದ್ದರು. ಆದರೆ ಇಲ್ಲಿ ಮೂಲ ಸೌಕರ್ಯಗಳಿಲ್ಲ ಎಂದು ಜನರು ಅಸಮಧಾನಗೊಂಡಿದ್ದಾರೆ.
