ದೊಡ್ಡಬಳ್ಳಾಪುರ : ಸ್ಕೌಟ್ಸ್ ಮತ್ತು ಗೈಡ್ಸ್ನ ಪಕ್ಷಿ ಪ್ರೇಮಿಯೊಬ್ಬರು ನೂರಡಿ ಆಳದ ಪಾಳು ಬಿದ್ದ ಬಾವಿಯಲ್ಲಿ ಕಾಣಿಸಿಕೊಂಡ ವಿದೇಶಿ ಪಕ್ಷಿಯನ್ನು ರಕ್ಷಿಸಿ ಆಸ್ಪತ್ರೆಯಲ್ಲಿ ಪೋಷಣೆ ಮಾಡುತ್ತಿದ್ದಾರೆ.
ದೊಡ್ಡಬಳ್ಳಾಪುರ ನಗರದ ಹೊರವಲಯದ ಡಾ.ಅನಿಬೆಸೆಂಟ್ ಸ್ಕೌಟ್ಸ್ ಮತ್ತು ಗೈಡ್ಸ್ ರಾಜ್ಯ ತರಬೇತಿ ಮತ್ತು ಶಿಬಿರ ಕೇಂದ್ರದಲ್ಲಿ 28ನೇ ಕರ್ನಾಟಕ ರಾಜ್ಯ ಸ್ಕೌಟ್ಸ್ ಮತ್ತು ಗೈಡ್ಸ್ನ ಜಾಂಬೋರೇಟ್ ಶಿಬಿರ ನಡೆಯುತ್ತಿದೆ. ಇದರ ಅಂಗವಾಗಿ ಪಾಳುಬಿದ್ದ ಬಾವಿಯನ್ನು ವಿದ್ಯಾರ್ಥಿಗಳು ಸ್ವಚ್ಛ ಮಾಡುತ್ತಿದ್ದರು. ಈ ಸಮಯದಲ್ಲಿ ಬಾವಿಯ ಸಂದಿಯಲ್ಲಿ ಪಕ್ಷಿಯೊಂದು ವಿದ್ಯಾರ್ಥಿಗಳ ಕಣ್ಣಿಗೆ ಬಿದ್ದಿದೆ. ತಕ್ಷಣವೇ ವಿದ್ಯಾರ್ಥಿಗಳು ಈ ವಿಚಾರವನ್ನು ಶಿಬಿರದಲ್ಲಿ ಭಾಗವಹಿಸಿದ್ದ ಪಕ್ಷಿ ಪ್ರೇಮಿ ಡಾ. ಅಜಯ್ ಕುಮಾರ್ ಜೈನ್ ಅವರ ಗಮನಕ್ಕೆ ತಂದಿದ್ದಾರೆ.
ಈ ಪಕ್ಷಿಯನ್ನು ಪರೀಕ್ಷಿಸಿದ ಡಾ. ಅಜಯ್ ಕುಮಾರ್ ಜೈನ್ ಇದು ಆಸ್ಟ್ರೇಲಿಯಾದ ಐಬಿಸ್ ಪಕ್ಷಿಯಾಗಿದ್ದು, ಕೊಕ್ಕರೆ ಜಾತಿಗೆ ಸೇರಿದೆ. ಸುಮಾರು 2 ಸಾವಿರ ಕಿ.ಮೀ ಗಳಿಂದ ದಕ್ಷಿಣ ಭಾರತದ ಕಡೆ ವಲಸೆ ಬರುತ್ತೆ. ಕೆರೆ ಮತ್ತು ನದಿಗಳಲ್ಲಿ ಅಶ್ರಯ ಪಡೆದು ಸಂತಾನೋತ್ಪತ್ತಿ ಮಾಡ್ಕೊಂಡು ಆಸ್ಟ್ರೇಲಿಯಾ ದೇಶಕ್ಕೆ ಮರಳುತ್ತೆ. ಈಗ ನಮಗೆ ಸಿಕ್ಕಿರುವುದು ಎರಡು ದಿನದ ಮರಿಯಾಗಿದ್ದರಿಂದ ಅದು ಕಣ್ಣು ಸಹ ಬಿಟ್ಟಿರಲಿಲ್ಲ. ಈ ಪಕ್ಷಿ ಕಣ್ಣು ಬಿಟ್ಟು ಓಡಾಡಲು 15 ದಿನ ಬೇಕಾಗುತ್ತೆ. ಆ ಕಾರಣದಿಂದ ತಮ್ಮ ಆಸ್ಪತ್ರೆಯಲ್ಲಿನ ವೆಂಟಿಲೇಟರ್ನಲ್ಲಿಟ್ಟು ಪೋಷಣೆ ಮಾಡಿ ದೊಡ್ಡದಾದ ನಂತರ ಕೆರೆಯ ಬಳಿ ಬಿಡುವುದಾಗಿ ಅವರು ತಿಳಿಸಿದರು.
ಡಾ. ಅಜಯ್ ಕುಮಾರ್ ಜೈನ್ ಅವರು ಮೈಸೂರಿನಲ್ಲಿ ಪ್ರಗತಿ ಬರ್ಡ್ ಚಾರಿಟಬಲ್ ಟ್ರಸ್ಟ್ ಮೂಲಕ ಇಲ್ಲಿಯವರೆಗೂ 1,600 ಕ್ಕೂ ಹೆಚ್ಚು ಪಕ್ಷಿಗಳನ್ನು ರಕ್ಷಣೆ ಮಾಡಿದ್ದಾರೆ.
