ಕೋವಿಡ್​​ ಹೆಲ್ಪ್​ಲೈನ್​ ಸ್ಥಗಿತ: ಅಧಿಕಾರಿಗಳನ್ನ ತರಾಟೆಗೆ ತೆಗೆದುಕೊಂಡ ನೂತನ ಸಂಸದೆ

ಬೆಳಗಾವಿಯ ವಿಶ್ವೇಶ್ವರಯ್ಯ ನಗರದಲ್ಲಿರುವ ಕೋವಿಡ್ ಕಮಾಂಡ್ ಸೆಂಟರ್​​​​​ನಲ್ಲಿರುವ ವಾರ್‌ ರೂಮ್​ಗೆ ನೂತನ ಸಂಸದೆ ಮಂಗಳಾ ಅಂಗಡಿ ಭೇಟಿ ನೀಡಿ ಪರಿಶೀಲನೆ ನಡೆಸಿ, ಹೆಲ್ಪ್​​ಲೈನ್ ಮೂಲಕ ಎಲ್ಲ ಅಧಿಕಾರಿಗಳು ಸೇರಿ ಪ್ರತಿ ಎರಡು ಗಂಟೆಗಳಿಗೊಮ್ಮೆ ಜನರಿಗೆ ಕೋವಿಡ್​​ ಕುರಿತ ಮಾಹಿತಿ ನೀಡಬೇಕು ಎಂದು‌ ಸೂಚನೆ ನೀಡಿದರು.

ಬೆಳಗಾವಿ: ವಿಶ್ವೇಶ್ವರಯ್ಯ ನಗರದಲ್ಲಿ ಸ್ಮಾರ್ಟ್ ಸಿಟಿ ಸಹಯೋಗದಲ್ಲಿ ಸ್ಥಾಪಿಸಲಾಗಿರುವ ಕೋವಿಡ್ ಕಮಾಂಡ್ ಸೇಂಟರ್​ನಲ್ಲಿರುವ ವಾರ್​​​​ರೂಮ್​ಗೆ ನೂತನ ಸಂಸದೆ ಮಂಗಳಾ ಅಂಗಡಿಯವರು ದಿಢೀರ್ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಈ ವೇಳೆ, ಕೊರೊನಾ ಹೆಲ್ಪ್​​ಲೈನ್ ಸ್ಥಗಿತವಾಗಿದ್ದು ಕಂಡು ಅಸಮಾಧಾನ ವ್ಯಕ್ತಪಡಿಸಿದರು.

ನಿತ್ಯ ಸರಾಸರಿ 900ಕ್ಕೂ ಅಧಿಕ ಸೋಂಕಿತರು ವಾರ್​​ರೂಂಗೆ ಕರೆ ಮಾಡುತ್ತಿದ್ದಾರೆ. ಆದ್ರೆ ಇಲ್ಲಿನ ಬಹಳಷ್ಟು ಸಹಾಯವಾಣಿ ಸಂಖ್ಯೆಗಳು ಸಮರ್ಪಕವಾಗಿ ಕಾರ್ಯನಿರ್ವಹಿಸುತ್ತಿಲ್ಲ. ಇದರಿಂದ ಸಾರ್ವಜನಿಕರಿಗೆ ಸಾಕಷ್ಟು ತೊಂದರೆಯಾಗುತ್ತಿದೆ. ದುರಸ್ತಿಗೆ ಬಂದಿರುವ ಫೋನ್​ಗಳನ್ನು ಸರಿಪಡಿಸಿಲ್ಲವೇಕೆ? ನಿಮ್ಮಿಂದ ಜನರು ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ ಎಂದು ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.

ಕರ್ತವ್ಯದಲ್ಲಿದ್ದಾಗ ಮೊಬೈಲ್ ಸ್ವಿಚ್​ ಆಫ್ ಮಾಡಬೇಡಿ

ಅಲ್ಲದೆ, ಸ್ಥಗಿತಗೊಂಡಿರುವ ನಂಬರ್​ಗಳನ್ನು ತಕ್ಷಣವೇ ಸರಿಪಡಿಸಬೇಕು ಎಂದು ನಿರ್ದೇಶನ ನೀಡಿದರು. ಕೊರೊನಾ ನಿಯಂತ್ರಣಕ್ಕೆ ತರುವ ನಿಟ್ಟಿನಲ್ಲಿ ಅಧಿಕಾರಿಗಳು ಕಾರ್ಯಪ್ರವೃತರಾಗಬೇಕು. ಯಾವುದೇ ಕಾರಣಕ್ಕೆ ಕರ್ತವ್ಯದಲ್ಲಿದ್ದಾಗ ಮೊಬೈಲ್ ಸ್ವಿಚ್ಡ್​​​ ಆಫ್ ಮಾಡಬಾರದು. ಇಂತಹ ಘಟನೆ ನಡೆದರೆ ಅಧಿಕಾರಿಗಳ ವಿರುದ್ಧ ಕ್ರಮ ‌ಜರುಗಿಸಲಾಗುವುದು ಎಚ್ಚರಿಕೆ ನೀಡಿದರು.

ಇದೆ ಸಂದರ್ಭದಲ್ಲಿ ಕೋವಿಡ್​ ಕುರಿತ ಸಹಾಯಕ್ಕಾಗಿ ಜನರು ಎಷ್ಟೇ ಕರೆ ಮಾಡಿದ್ರೂ ಸಂಪರ್ಕ ಸಾಧಿಸಲು ಸಾಧ್ಯವಾಗುತ್ತಿಲ್ಲ ಎಂಬ ದೂರು ಸಾರ್ವಜನಿಕರಿಂದ ಕೇಳಿ ಬಂದಿತ್ತು, ಇದರಿಂದ ಗರಂ ಆದ ಶಾಸಕ ಅನಿಲ್ ಬೆನಕೆ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು‌.