ನವದೆಹಲಿ : ಮುಂದಿನ 6 ರಿಂದ 8 ತಿಂಗಳಲ್ಲಿ ಭಾರತೀಯ ಸ್ಟಾರ್ಟಪ್ಗಳಿಗೆ ಫಂಡಿಂಗ್ ಹರಿವು ಮತ್ತೆ ಪ್ರಾರಂಭವಾಗಬಹುದು ಎಂದು ಮೂವರಲ್ಲಿ ಇಬ್ಬರು (ಶೇ 50ರಷ್ಟು) ಹೂಡಿಕೆದಾರರು ಆಶಾಭಾವನೆ ವ್ಯಕ್ತಪಡಿಸಿದ್ದಾರೆ. ಫಂಡಿಂಗ್ ಕೊರತೆಯು ಶೀಘ್ರದಲ್ಲೇ ಕೊನೆಯಾಗಲಿದೆ ಎಂದು ಶೇ 17ರಷ್ಟು ಹೂಡಿಕೆದಾರರು ಹೇಳಿದ್ದರೆ, ಇನ್ನು ಕೆಲವರು ಫಂಡಿಂಗ್ ಮತ್ತೆ ಆರಂಭವಾಗಲು 12 ರಿಂದ 18 ತಿಂಗಳು ಬೇಕಾಗಬಹುದು ಎಂದಿದ್ದಾರೆ ಎಂದು ಬೆಂಗಳೂರು ಮೂಲದ ವಿಶ್ಲೇಷಕ ಸಂಸ್ಥೆ ರೆಡ್ಸೀರ್ ಹೇಳಿದೆ.
ಒಟ್ಟಾರೆಯಾಗಿ ಯುಎಸ್, ಇಯು, ಯುಎಇ ಮತ್ತು ಜಪಾನ್ ದೇಶಗಳು ಭಾರತೀಯ ಸ್ಟಾರ್ಟಪ್ಗಳಿಗೆ ಅತಿದೊಡ್ಡ ಧನಸಹಾಯದ ಮೂಲವಾಗಿವೆ. ಈ ದೇಶಗಳು ಒಟ್ಟು ಜಾಗತಿಕ ಫಂಡಿಂಗ್ ನಿಧಿಯ ಶೇಕಡಾ 5 ಮತ್ತು ಒಟ್ಟು ಎಪಿಎಸಿ ನಿಧಿಯ ಶೇಕಡಾ 20 ರಷ್ಟು ಪಾಲು ಹೊಂದಿವೆ. ವರದಿಯ ಪ್ರಕಾರ, ಮುಂದಿನ ಯುನಿಕಾರ್ನ್ಗಳು (ಸ್ಟಾರ್ಟಪ್ಗಳು) ಡಿ 2 ಸಿ-ಬಿಪಿಸಿ, ಡಿ 2 ಸಿ-ಹೆಲ್ತ್ ಮತ್ತು ವೆಲ್ನೆಸ್, ಡಯಾಗ್ನೋಸ್ಟಿಕ್ಸ್ ಮತ್ತು ಕ್ಲಿನಿಕ್ಗಳು, ಗೇಮಿಂಗ್ ಮತ್ತು ಅಪ್ಲಿಕೇಶನ್ ಸ್ಟುಡಿಯೋಗಳಂತಹ ಕ್ಷೇತ್ರಗಳಿಂದ ಹೊರಹೊಮ್ಮಲಿವೆ.
2017 ರಿಂದ 2020ರವರೆಗಿನ ಕ್ಯಾಲೆಂಡರ್ ವರ್ಷಗಳಲ್ಲಿ ಇದ್ದ ಫಂಡಿಂಗ್ ಮಟ್ಟವು 2023ರಲ್ಲಿ ಮತ್ತೆ ಮರಳಲಿದೆ. ಈ ಫಂಡಿಂಗ್ ಮೌಲ್ಯ 12 ರಿಂದ 15 ಬಿಲಿಯನ್ ಡಾಲರ್ ದಾಟಲಿದೆ. ಇದರ ನಂತರ 2024ರಲ್ಲಿಯೂ ಅತ್ಯಧಿಕ ಸ್ಟಾರ್ಟಪ್ ಫಂಡಿಂಗ್ ಬಂಡವಾಳ ಹರಿದು ಬರಲಿದ್ದು, ಇದು 15 ರಿಂದ 20 ಬಿಲಿಯನ್ ಡಾಲರ್ಗಳಷ್ಟಾಗಬಹುದು ಎಂದು ವರದಿ ತಿಳಿಸಿದೆ.
ಕ್ಯಾಲೆಂಡರ್ ವರ್ಷ 2022ರಲ್ಲಿ 1519 ಸ್ಟಾರ್ಟಪ್ ಫಂಡಿಂಗ್ ಡೀಲ್ಗಳಾಗಿದ್ದವು. ಇದಕ್ಕೆ ಹೋಲಿಸಿದರೆ 2023ರ ಪೂರ್ವಾರ್ಧದಲ್ಲಿ ಫಂಡಿಂಗ್ ಡೀಲ್ಗಳ ಸಂಖ್ಯೆ ಕುಸಿದು 700 ರಿಂದ 900 ಆಗಿದೆ. ಆದರೆ ಇದು 2024 ರಲ್ಲಿ ಮತ್ತೆ 1000 ದಿಂದ 1200 ಡೀಲ್ಗಳಿಗೆ ಏರಿಕೆಯಾಗಬಹುದು ಎಂದು ರೆಡ್ ಸೀರ್ ತಿಳಿಸಿದೆ. ಇದಲ್ಲದೆ ವೆಂಚರ್ ಕ್ಯಾಪಿಟಲಿಸ್ಟ್ಗಳು ಇಂದು ತಮ್ಮ ಕೈಯಲ್ಲಿ ಹಿಂದೆಂದಿಗಿಂತಲೂ ಹೆಚ್ಚು ನಿಧಿಯನ್ನು ಹೊಂದಿದ್ದಾರೆ. ಜೊತೆಗೆ 2017ರಲ್ಲಿ ಆಗಿದ್ದಂತೆ ಈ ವರ್ಷ ಶೇ 90ರಷ್ಟು ಫಂಡಿಂಗ್ಗಳು ಸೀಡ್ ಫಂಡಿಂಗ್ ಅಥವಾ ಆರಂಭಿಕ ಹಂತದ ಫಂಡಿಂಗ್ ಆಗಿರುವುದು ಆಶಾಭಾವನೆಯನ್ನು ಇಮ್ಮಡಿಗೊಳಿಸಿವೆ.
ಕಳೆದ ನಾಲ್ಕು ವರ್ಷಗಳಲ್ಲಿ ನೋಂದಾಯಿತ ಸ್ಟಾರ್ಟಪ್ಗಳ ಸಂಖ್ಯೆ 9 ಪಟ್ಟು ಹೆಚ್ಚಾಗಿದೆ. 2018 ರಲ್ಲಿ ಇದ್ದ ಸುಮಾರು 10,000 ಸ್ಟಾರ್ಟಪ್ಗಳಿಂದ 2022 ರಲ್ಲಿ ಈ ಸಂಖ್ಯೆ ಸುಮಾರು 90,000ಕ್ಕೆ ಏರಿಕೆಯಾಗಿದೆ. ಹಾಗೆಯೇ ಸಕ್ರಿಯ ಹೂಡಿಕೆದಾರರ ಸಂಖ್ಯೆ 2018 ರಲ್ಲಿ ಇದ್ದ 400 ಹೂಡಿಕೆದಾರರಿಂದ 2022 ರ ಹಣಕಾಸು ವರ್ಷದ ವೇಳೆಗೆ ಸುಮಾರು 900 ಹೂಡಿಕೆದಾರರಿಗೆ ಅಂದರೆ 2 ಪಟ್ಟು ಹೆಚ್ಚಾಗಿದೆ ಎಂದು ವರದಿ ತಿಳಿಸಿದೆ.
ಇದನ್ನೂ ಓದಿ : ಪಿಸಿ, ಲ್ಯಾಪ್ಟಾಪ್ ಲೈಸೆನ್ಸ್ ನಿರ್ಬಂಧದ ಗಡುವು 1 ವರ್ಷ ವಿಸ್ತರಿಸಿ; ಕೇಂದ್ರಕ್ಕೆ ಟೆಕ್ ಕಂಪನಿಗಳ ಮನವಿ
