ನವದೆಹಲಿ: ತನ್ನ ಆ್ಯಪ್ ಸ್ಟೋರ್ನಲ್ಲಿ ಗ್ರಾಹಕರನ್ನು ವಂಚಿಸಿ ಅವರನ್ನು ಸುಲಿಗೆ ಮಾಡುವ ಲೋನ್ ಆ್ಯಪ್ಗಳು ಲಿಸ್ಟ್ ಆಗದಂತೆ ತಡೆಯಲು ಹೊಸ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಗೂಗಲ್ ಗುರುವಾರ ಹೇಳಿದೆ. ಸುಲಿಗೆಕೋರ ಲೋನ್ ಆ್ಯಪ್ಗಳನ್ನು ಗುರುತಿಸಲು ಸಹಾಯಕವಾಗಲು ಉದ್ಯಮ ಸಂಸ್ಥೆ ಫಿನ್ಟೆಕ್ ಅಸೋಸಿಯೇಷನ್ ಫಾರ್ ಕನ್ಸ್ಯೂಮರ್ ಎಂಪವರ್ಮೆಂಟ್ (ಫೇಸ್) ನೊಂದಿಗೆ ಒಪ್ಪಂದ ಮಾಡಿಕೊಂಡಿರುವುದಾಗಿ ಕಂಪನಿ ತಿಳಿಸಿದೆ.
ಒಪ್ಪಂದದ ಭಾಗವಾಗಿ, ಪ್ಲೇ ಸ್ಟೋರ್ನ ನೀತಿಗಳಿಗೆ ಅನುಸಾರವಾಗಿರದ ಭಾರತದಲ್ಲಿ ಸುಲಿಗೆಕೋರ ವೈಯಕ್ತಿಕ ಸಾಲ ಆ್ಯಪ್ಗಳ ವಿರುದ್ಧ ತ್ವರಿತ ಕ್ರಮ ತೆಗೆದುಕೊಳ್ಳಲು ಮತ್ತು ಅಂಥ ಆ್ಯಪ್ಗಳನ್ನು ಪತ್ತೆಹಚ್ಚುವಿಕೆಯನ್ನು ತಿಳಿಸಲು ಫೇಸ್ ಸಂಸ್ಥೆ ಗೂಗಲ್ಗೆ ನೆರವಾಗಲಿದೆ.
"ಗೂಗಲ್ ನೊಂದಿಗಿನ ನಮ್ಮ ಸಹಯೋಗವು ಗ್ರಾಹಕರಿಗೆ ಸುರಕ್ಷಿತ ಡಿಜಿಟಲ್ ಸಾಲದ ವ್ಯವಸ್ಥೆಯನ್ನು ಸಕ್ರಿಯಗೊಳಿಸುವ ನಿರ್ಣಾಯಕ ಹೆಜ್ಜೆಯಾಗಿದೆ. ಫೇಸ್ ನ ಮಾರುಕಟ್ಟೆ ಬುದ್ಧಿಮತ್ತೆಯನ್ನು ಗೂಗಲ್ ನ ಪ್ರಯತ್ನಗಳೊಂದಿಗೆ ನಮ್ಮ ತಂತ್ರಜ್ಞಾನವನ್ನು ಸಂಯೋಜಿಸುವುದರಿಂದ ಲೋನ್ ಆ್ಯಪ್ಗಳ ವಿಷಯದಲ್ಲಿ ಸುರಕ್ಷತೆಯನ್ನು ಮತ್ತಷ್ಟು ಬಲಪಡಿಸಿದಂತಾಗುತ್ತದೆ" ಎಂದು ಫೇಸ್ ಸಿಇಒ ಸುಗಂಧ್ ಸಕ್ಸೇನಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಇದಲ್ಲದೆ, ಈ ಸಹಯೋಗವು ಗೂಗಲ್ನ ಹೊಸ ಸುರಕ್ಷತಾ ಉಪಕ್ರಮವಾದ ಡಿಜಿಕವಚ್ನ ಉದ್ದೇಶಗಳಿಗೆ ಪೂರಕವಾಗಿದೆ. ಇದು ಉದ್ಯಮ ತಜ್ಞರೊಂದಿಗೆ ಸಹಕರಿಸುವ ಮೂಲಕ ಆನ್ಲೈನ್ ಅಪರಾಧಿಗಳು ನಡೆಸುವ ಅತ್ಯಾಧುನಿಕ ಹಣಕಾಸು ಹಗರಣಗಳಿಂದ ಜನರನ್ನು ರಕ್ಷಿಸುವ ಗುರಿಯನ್ನು ಹೊಂದಿದೆ.
ಫೇಸ್ ಭಾರತದಲ್ಲಿ ಡಿಜಿಟಲ್ ಸಾಲ ನೀಡುವ ವ್ಯವಸ್ಥೆಯನ್ನು ನಿರಂತರವಾಗಿ ಪರಿಶೀಲನೆ ಮಾಡುತ್ತಿದೆ ಮತ್ತು ನೂರಾರು ಸುಲಿಗೆಕೋರ ವಂಚಕ ವೈಯಕ್ತಿಕ ಸಾಲ ಅಪ್ಲಿಕೇಶನ್ಗಳನ್ನು ತೊಡೆದುಹಾಕಲು ಕೊಡುಗೆ ನೀಡಿದೆ. ಕಳೆದ 15 ತಿಂಗಳಲ್ಲಿ, ಫೇಸ್ ಕಂಪನಿಯು ಅಪ್ಲಿಕೇಶನ್ ಸ್ಟೋರ್ಗಳು, ನಿಯಂತ್ರಕರು ಮತ್ತು ಸರ್ಕಾರಿ ಅಧಿಕಾರಿಗಳಿಗೆ 700 ಕ್ಕೂ ಹೆಚ್ಚು ಅನುಮಾನಾಸ್ಪದ ಅಪ್ಲಿಕೇಶನ್ಗಳ ಬಗ್ಗೆ ಮಾಹಿತಿ ನೀಡಿದೆ.
ಲೋನ್ ಆ್ಯಪ್ಗಳಿಂದ ಗ್ರಾಹಕರಿಗೆ ವಂಚನೆಗಳಾಗುವುದನ್ನು ತಡೆಗಟ್ಟಲು ಗೂಗಲ್ ತನ್ನ ನೀತಿಗಳು ಮತ್ತು ಪರಿಶೀಲನಾ ಪ್ರಕ್ರಿಯೆಗಳನ್ನು ಆಗಾಗ ಪರಿಷ್ಕರಣೆ ಮಾಡುತ್ತಿದೆ. 2022 ರಲ್ಲಿ, ಗೂಗಲ್ ಭಾರತದಲ್ಲಿ ಪ್ಲೇಸ್ಟೋರ್ ನಿಯಮಗಳನ್ನು ಉಲ್ಲಂಘಿಸಿದ ಕಾರಣಕ್ಕಾಗಿ 3,500 ಕ್ಕೂ ಹೆಚ್ಚು ವೈಯಕ್ತಿಕ ಸಾಲ ಅಪ್ಲಿಕೇಶನ್ಗಳನ್ನು ಪರಿಶೀಲಿಸಿದೆ ಮತ್ತು ಮತ್ತು ಅಗತ್ಯ ಕ್ರಮಗಳನ್ನು ತೆಗೆದುಕೊಂಡಿದೆ.
ಲೋನ್ ಆ್ಯಪ್ಗಳಿಂದ ಹುಷಾರ್: ಸಾಲ ನೀಡುವುದಾಗಿ ಆಫರ್ ಮಾಡುವ ಲೋನ್ ಆ್ಯಪ್ಗಳು ಬಹುತೇಕ ಸಮಯದಲ್ಲಿ ಅನಧಿಕೃತವಾಗಿರುತ್ತವೆ. ಆರ್ಬಿಐ ಪ್ರಕಾರ ಭಾರತದಲ್ಲಿ ಕಾರ್ಯನಿರ್ವಹಿಸುತ್ತಿರುವ 1100 ಡಿಜಿಟಲ್ ಲೋನ್ ಆ್ಯಪ್ಗಳ ಪೈಕಿ 600 ಕಾನೂನುಬಾಹಿರ ಎಂದು ಕಂಡುಬಂದಿದೆ.
ಇದನ್ನೂ ಓದಿ : ಒಂದೇ ಫೋನಿನಲ್ಲಿ 2 ವಾಟ್ಸ್ಆ್ಯಪ್ ಖಾತೆ ಲಾಗಿನ್: ಬಳಸುವುದು ಹೇಗೆ?
