ಮುಂಬೈ: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ಆಗಸ್ಟ್ 1ರಿಂದ ಮೊಬೈಲ್ ಫೋನ್‌ ಮೂಲಕ ಹಣ ವರ್ಗಾವಣೆಯಂತಹ ಐಎಂಪಿಎಸ್ (ತಕ್ಷಣದ ಪಾವತಿ ಸೇವೆ) ಮೇಲಿನ ಶುಲ್ಕವನ್ನು ತೆಗೆದುಹಾಕಲು ನಿರ್ಧರಿಸಿದೆ.
ಸುಮಾರು 25 ಪ್ರತಿಶತದಷ್ಟು ಮಾರುಕಟ್ಟೆ ಪಾಲು ಹೊಂದಿರುವ ದೇಶದ ಅತಿದೊಡ್ಡ ಬ್ಯಾಂಕ್ ಎಸ್ಬಿಐ, ಜುಲೈ 1ರಿಂದ ಇಂಟರ್ನೆಟ್ ಮತ್ತು ಮೊಬೈಲ್ ಬ್ಯಾಂಕಿಂಗ್ ಸೇವೆಯ ಎನ್ಇಎಫ್ಟಿ ಮತ್ತು ಆರ್ಟಿಜಿಎಸ್ ಮೇಲಿನ ಶುಲ್ಕವನ್ನು ಸಹ ಮನ್ನಾ ಮಾಡಿದೆ.
ಜುಲೈ 1ಕ್ಕೂ ಮೊದಲು 2 ಲಕ್ಷ ರೂ. ವರೆಗಿನ ಹಣ ವರ್ಗಾವಣೆಗೆ ಎನ್ಇಎಫ್ಟಿ, 2 ಲಕ್ಷ ರೂ.ಗಿಂತ ಹೆಚ್ಚಿನ ವರ್ಗಾವಣೆಗೆ ಆರ್ಟಿಜಿಎಸ್ ಬಳಸುತ್ತಿದ್ದಾರೆ. ಎನ್ಇಎಫ್ಟಿಗೆ 1 ರಿಂದ 5 ರೂ. ಮತ್ತು ಆರ್‌ಟಿಜಿಎಸ್ಗೆ 5 ರಿಂದ 50 ರೂ. ವರೆಗೆ ಶುಲ್ಕವನ್ನು ಎಸ್ಬಿಐ ವಿಧಿಸುತ್ತಿದೆ. ಆಗಸ್ಟ್ 1ರಿಂದ ಈ ಶುಲ್ಕಗಳು ಮೊಟಕುಗೊಳ್ಳಲಿವೆ. ಈ ಸೇವೆಗಳಿಗೆ ವಿಧಿಸುತ್ತಿದ್ದ ಶುಲ್ಕವನ್ನು ಆರ್ಬಿಐ ರದ್ದು ಮಾಡಿದ್ದು, ಬ್ಯಾಂಕ್ಗಳು ಗ್ರಾಹಕರಿಗೆ ವಿಧಿಸುತ್ತಿದ್ದ ಶುಲ್ಕಗಳನ್ನು ಇಳಿಸಲು ಸಹಾಯವಾಗಿದೆ.
