ಲಾಸ್ ಏಂಜಲೀಸ್ ( ಅಮೆರಿಕ): ಕ್ಯಾಲಿಫೋರ್ನಿಯಾದ ಸ್ಯಾನ್ ರಾಮನ್ ಪಟ್ಟಣದ ಮೇಯರ್ ಸ್ಥಾನಕ್ಕೆ ಭಾರತೀಯ-ಅಮೆರಿಕನ್ ಉದ್ಯಮಿ ಅಪರ್ಣಾ ಮದಿರೆಡ್ಡಿ ಸ್ಪರ್ಧಿಸುವುದಾಗಿ ಘೋಷಣೆ ಮಾಡಿದ್ದಾರೆ. ನಾಲ್ಕು ಅವಧಿಯ ನಂತರ ಸ್ಥಾನದಿಂದ ಕೆಳಗಿಳಿಯಲಿರುವ ಪ್ರಸ್ತುತ ಮೇಯರ್ ಬಿಲ್ ಕ್ಲಾರ್ಕ್ಸನ್ ಅವರ ಸ್ಥಾನಕ್ಕೆ ಮದಿರೆಡ್ಡಿ ಬರಲಿದ್ದಾರೆ ಎಂದು ಮಾಧ್ಯಮ ವರದಿಯೊಂದು ತಿಳಿಸಿದೆ.
ಈ ಸ್ಥಾನಕ್ಕಾಗಿ ತನ್ನ ಅಭಿಯಾನವನ್ನು ಪ್ರಾರಂಭಿಸಿದ ಮೊದಲ ವ್ಯಕ್ತಿ ಮದಿರೆಡ್ಡಿಯಾಗಿದ್ದಾರೆ. ಇದಕ್ಕೂ ಮೊದಲು ಅವರು, ರಾಮನ್ ನಗರ ಮಂಡಳಿಯಲ್ಲಿ ಸ್ಥಾನ ಪಡೆಯಲು ವಿಫಲರಾಗಿದ್ದರು ಎಂದು ಇಂಡಿಯಾ ವೆಸ್ಟ್ ಪತ್ರಿಕೆ ಇದೇ ವೇಳೆ ಉಲ್ಲೇಖಿಸಿದೆ.
ಉತ್ತರ ಕ್ಯಾಲಿಫೋರ್ನಿಯಾದ ಪೂರ್ವ ಕೊಲ್ಲಿಯಲ್ಲಿರುವ ಸ್ಯಾನ್ ರಾಮನ್‌ನಲ್ಲಿ ಮದಿರೆಡ್ಡಿ ಹಲವಾರು ಸ್ವಯಂಸೇವಕ ಹುದ್ದೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ.
ಅವರು ಪ್ರಸ್ತುತ ಓಪನ್ ಸ್ಪೇಸ್ ಸಲಹಾ ಸಮಿತಿಯ ಅಧ್ಯಕ್ಷರಾಗಿದ್ದಾರೆ. 1998 ರಲ್ಲಿ ಪತಿ ವೆಂಕಿಯೊಂದಿಗೆ ಅರ್ವಾಸಾಫ್ಟ್, ಇಂಕ್ ಅನ್ನು ಸ್ಥಾಪಿಸಿದ ಇವರು, ಸ್ಥಳೀಯ ಡೆಮಾಕ್ರಟಿಕ್ ಪಕ್ಷದೊಂದಿಗೆ ಸಕ್ರಿಯರಾಗಿದ್ದಾರೆ.
ಮೇಯರ್ ಸ್ಥಾನಕ್ಕೆ ಸ್ಪರ್ಧಿಸುವ ಆಕಾಂಕ್ಷೆ ವ್ಯಕ್ತಪಡಿಸಿ ಎಲ್ಲರಿಗಿಂತ ಮೊದಲೇ ಪ್ರಚಾರ ಆರಂಭಿಸಿದ್ದಾರೆ.
ಸ್ಪರ್ಧೆ ಕುರಿತು ಮಾತನಾಡಿರುವ ಅವರು, "ನಮ್ಮ ನಗರವು ಸಂಕಷ್ಟದಲ್ಲಿರುವ ಈ ಸಂದರ್ಭದಲ್ಲಿ ನಾನು ನಾನು ಮೇಯರ್ ಸ್ಥಾನಕ್ಕೆ ಸ್ಪರ್ಧಿಸಲು ಮುಂದಾಗಿದ್ದೇನೆ. ನಗರವನ್ನ ತ್ವರಿತವಾಗಿ ಬದಲಾವಣೆ ಮಾಡಿ ಅಭಿವೃದ್ಧಿಯ ಮುನ್ನಲೆಗೆ ತರಬೇಕಿದೆ ಎಂದು ಮದಿರೆಡ್ಡಿ ಡ್ಯಾನ್‌ವಿಲ್ಲೆ ಸ್ಥಳೀಯ ವೆಬ್ಸೈಟ್ ವೊಂದಕ್ಕೆ ಹೇಳಿದ್ದಾರೆ. ಮದಿರೆಡ್ಡಿ ಸ್ಯಾನ್ ರಾಮನ್‌ನಲ್ಲಿ ಸುಮಾರು 22 ವರ್ಷಗಳಿಂದ ವಾಸಿಸುತ್ತಿದ್ದಾರೆ.
