ಲಾಹೋರ್: ವಿಶ್ವ ಕ್ರಿಕೆಟ್ ಕಂಡ ಅತ್ಯುತ್ತಮ ಆಲ್ರೌಂಡರ್ಗಳಲ್ಲಿ ಒಬ್ಬರಾದ ಪಾಕಿಸ್ತಾನದ ಶಾಹೀದ್ ಆಫ್ರಿದಿ ತಮ್ಮ 4 ಹೆಣ್ಣುಮಕ್ಕಳನ್ನು ಹೊರಾಂಗಣ ಆಟವಾಡಲು ಬಿಡುವುದಿಲ್ಲ ಎಂದು ಹೇಳುವ ಮೂಲಕ ಸ್ತ್ರೀವಾದಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.
ತಾವೊಬ್ಬ ಸಾಮಾಜಿಕ ಹಾಗೂ ಧಾರ್ಮಿಕ ಕಾರಣಗಳಿಗೆ ಬದ್ದರಾಗಿರುವ ವ್ಯಕ್ತಿಯಾಗಿದ್ದು ತಮ್ಮ 4 ಹೆಣ್ಣು ಮಕ್ಕಳಾದ ಅನ್ಷಾ,ಅಜ್ವಾ,ಅಸ್ಮಾರಾ ಹಾಗೂ ಅಕ್ಸಾರನ್ನು ಹೊರಾಂಗಣ ಕ್ರೀಡೆಗಳಿಗೆ ನಾನು ಅನುಮತಿ ನೀಡುವುದಿಲ್ಲ ಎಂದಿರುವ ಅವರು ನನ್ನ ನಿರ್ಧಾರದ ಬಗ್ಗೆ ಸ್ತ್ರೀವಾದಿಗಳು ಏನಾದರೂ ಹೇಳಿಕೊಳ್ಳಲಿ ಎಂದು ತಮ್ಮ ಆತ್ಮಕಥೆ 'ಗೇಮ್ ಚೇಂಜರ್'ನಲ್ಲಿ ಬರೆದುಕೊಂಡಿದ್ದಾರೆ.
ನಾಲ್ವರು ಹೆಣ್ಣು ಮಕ್ಕಳಲ್ಲಿ ಅಜ್ವಾ ಹಾಗೂ ಅಸ್ಮಾರಾ ಇಬ್ಬರಿಗೂ ಕ್ರೀಡಾ ಕ್ಷೇತ್ರದಲ್ಲಿ ಆಸಕ್ತಿ ಬೆಳೆಸಿಕೊಂಡಿದ್ದಾರೆ. ಅವರಿಗೆ ಒಳಾಂಗಾಣದ ಕ್ರೀಡೆಗೆ ನನ್ನ ಅನುಮತಿ ಇದೆ, ಆದರೆ ಕ್ರಿಕೆಟ್ನಂತಹ ಆಟಗಳಿಗೆ ಮಾತ್ರ ನನ್ನ ಅನುಮತಿಯಿಲ್ಲ. ಇದುವರೆಗೆ ಸಾರ್ವಜನಿಕವಾಗಿ ನಡೆದಿರುವ ಯಾವ ಕ್ರೀಡೆಗಳಿಗೂ ನನ್ನ ಮಕ್ಕಳು ಬಾಗವಹಿಸಿಲ್ಲ ಎಂದು ಸಹಾ ತಿಳಿಸಿದ್ದಾರೆ.
ಆಫ್ರಿದಿ ತಮ್ಮ ಆತ್ಮಚರಿತ್ರೆಯಲ್ಲಿ ಭಾರತದ ಗೌತಮ್ ಗಂಭೀರ್ ವಿರುದ್ಧ, ತಮ್ಮ ದೇಶದ ಕ್ರಿಕೆಟಿಗರಾದ ಜಾವೆದ್ ಮಿಯಾಂದಾದ್, ವಕಾರ್ ಯುೂನಿಸ್ ವಿರುದ್ಧವೂ ಕೂಡ ಟೀಕಿಸಿ ಕ್ರೀಡಾಭಿಮಾನಿಗಳ ಆಕ್ರೋಶಕ್ಕೆ ತುತ್ತಾಗಿದ್ದರು. ಇದೀಗ ಮಹಿಳಾ ವಿರೋಧಿ ಹೇಳಿಕೆ ನೀಡಿ ಮತ್ತೊಂದು ವಿವಾದ ಮೈಮೇಲೆ ಎಳೆದುಕೊಂಡಿದ್ದಾರೆ.
