ಜೈಪುರ್: ಪ್ರಸಕ್ತ ಸಾಲಿನ ಮಹಿಳಾ ಐಪಿಎಲ್ ಟೂರ್ನಿಯ ಚೊಚ್ಚಲ ಪಂದ್ಯದಲ್ಲಿ ಸ್ಮೃತಿ ಮಂಧಾನ ನೇತೃತ್ವದ ಟ್ರೈಲ್‌ಬ್ಲೇಜರ್ಸ್ ತಂಡ ಸೂಪರ್ನೋವಾಸ್ ತಂಡದ ವಿರುದ್ಧ ಎರಡು ರನ್ಗಳ ರೋಚಕ ಗೆಲುವು ಕಂಡಿದೆ.
ಜೈಪುರದ ಸವಾಯ್ ಮಾನಸಿಂಗ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಟ್ರೈಲ್‌ಬ್ಲೇಜರ್ಸ್ ಆರಂಭ ಉತ್ತಮವಾಗಿರಲಿಲ್ಲ. ಆರಂಭದಲ್ಲೇ ಸೂಝಿ ಬೇಟ್ಸ್ ಕೇವಲ 1 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಆದರೆ ಆದರೆ ನಾಯಕಿ ಸ್ಮೃತಿ ಮಂಧಾನ ಹಾಗೂ ಹರ್ಲಿನ್ ಡಿಯೋಲ್ ಜತೆಯಾಟವಾಡಿ ತಂಡವನ್ನ ಆರಂಭಿಕ ಅಘಾತದಿಂದ ಪಾರು ಮಾಡಿದರು. ಬ್ಯಾಟಿಂಗ್ನಲ್ಲಿ ಮಿಂಚಿದ ಮಂಧಾನ 10 ಬೌಂಡರಿ, 3 ಸಿಕ್ಸರ್ ಸೇರಿದಂತೆ ಕೇವಲ 67 ಎಸೆತಗಳಲ್ಲಿ 90 ರನ್ಗಳಿಸಿದರು. ತಂಡ ಕೊನೆಯದಾಗಿ 5ವಿಕೆಟ್ನಷ್ಟಕ್ಕೆ 20 ಓವರ್ಗಳಲ್ಲಿ 140ರನ್ಗಳಿಕೆ ಮಾಡಿತು.
141ರನ್ ಟಾರ್ಗೆಟ್ ಬೆನ್ನತ್ತಿದ್ದ ಸೂಪರ್ನೋವಾಸ್ ತಂಡ ಆರಂಭದಲ್ಲೇ ವಿಕೆಟ್ ಕಳೆದುಕೊಂಡಿತು. ಆದರೆ ತಂಡಕ್ಕೆ ರೋಡ್ರಿಗಸ್ ಹಾಗೂ ಚಾಮರಿ ಅಟಪಟ್ಟು 49 ರನ್ಗಳ ಜೊತೆಯಾಟ ನೀಡಿ ತಂಡಕ್ಕೆ ಚೇತರಿಕೆ ನೀಡಿದರು. ಆದರೆ ಕನ್ನಡಿತಿ ರಾಜೇಶ್ವರಿ ಗಾಯಕ್ವಾಡ್(17ಕ್ಕೆ2) ಹಾಗೂ ಸೋಫಿಯಾ ಎಕಲ್ಸ್ಟೋನ್(11ಕ್ಕೆ2) ಬೌಲಿಂಗ್ ಮುಂದೆ ಇವರ ಆಟ ನಡೆಯಲಿಲ್ಲ. ಇನ್ನು ನಾಯಕಿ ಹರ್ಮನ್ ಪ್ರೀತ್ ಕೌರ್ ಕೂಡ(46)ರನ್ಗಳಿಕೆ ಮಾಡಿದರೂ ಸಹಾ ತಂಡವನ್ನ ಗೆಲುವಿನ ದಡ ಸೇರಿಸಲಿಲ್ಲ. ತಂಡ 20 ಓವರ್ಗಳಲ್ಲಿ 6ವಿಕೆಟ್ ಕಳೆದುಕೊಂಡು 138ರನ್ಗಳಿಕೆ ಮಾಡಿದ್ದರಿಂದ 2ರನ್ಗಳ ಅಂತರದ ಸೋಲು ಕಾಣುವಂತಾಯಿತು.
