ನವದೆಹಲಿ: ಸೌದಿ ಅರೇಬಿಯಾದ ಝಡ್ಡಾದಿಂದ ನವದೆಹಲಿಗೆ ಪ್ರಯಾಣ ಬೆಳೆಸುತ್ತಿದ್ದ ಸೌದಿ ಏರ್ಲೈನ್ಸ್ ವಿಮಾನದಲ್ಲಿ ಕೇರಳದ ಕೊಟ್ಟಾಯಂ ಮೂಲದ ವ್ಯಕ್ತಿ, ಅಲ್ಲಿನ ಮಹಿಳಾ ಸಿಬ್ಬಂದಿ ಎದುರೇ ಜಿಪ್ ಬಿಚ್ಚಿ ಪೊಲೀಸರ ಅತಿಥಿಯಾಗಿದ್ದಾನೆ.
ಹೀಗೆ ವಿಮಾನದಲ್ಲಿ ದುರ್ವರ್ತನೆ ತೋರಿಸಿದ ವ್ಯಕ್ತಿಯನ್ನ ಕೇರಳ ಮೂಲದ ಕೊಟ್ಟಾಯಂ ನಿವಾಸಿ 24 ವರ್ಷದ ಅಬ್ದುಲ್ ಶಾಹಿದ್ ಶಂಶುದ್ದೀನ್ ಎಂದು ಗುರುತಿಸಲಾಗಿದೆ. ಅಲ್ಲಿನ ವಿಮಾನಯಾನ ಸಿಬ್ಬಂದಿ ಹೇಳುವ ಪ್ರಕಾರ, ಹೀಗೆ ಪ್ಯಾಂಟ್ನ ಜಿಪ್ ಬಿಚ್ಚುವ ಮುನ್ನ ಅಸಭ್ಯವಾಗಿ ಮಾತನಾಡಿದ್ದ ಎನ್ನಲಾಗಿದೆ.
ಮಹಿಳಾ ಸಿಬ್ಬಂದಿ ಆತ ಸಿಗರೇಟ್ ಸೇದಲು ಲೈಟರ್ ಆನ್ ಮಾಡಲು ಬಿಟ್ಟಿರಲಿಲ್ಲ. ಇದರಿಂದ ರೊಚ್ಚಿಗೆದ್ದ ಅಬ್ದುಲ್ ಅಸಭ್ಯವಾಗಿ ನಿಂದನೆ ಮಾಡಿದ್ದ. ಅಷ್ಟೇ ಅಲ್ಲ ಸುಖಾ ಸುಮ್ಮನೆ ಗದ್ದಲ ಎಬ್ಬಿಸಿದ್ದಲ್ಲದೇ ಪ್ಯಾಂಟ್ ಜಿಪ್ ಬಿಚ್ಚಿ ರಂಪಾಟ ಮಾಡಿಕೊಂಡಿದ್ದ. ಮಹಿಳೆ ತಕ್ಷಣ ಸಹಾಯಕ್ಕಾಗಿ ಇತರ ಸಿಬ್ಬಂದಿಯನ್ನ ಕರೆದಿದ್ದರು.
ಆ ಬಳಿಕ ನವದೆಹಲಿ ಅಂತಾರಾಷ್ಟ್ರೀಯ ನಿಲ್ದಾಣದಲ್ಲಿ ವಿಮಾನ ಲ್ಯಾಂಡ್ ಆಗುತ್ತಿದ್ದಂತೆ ಏರ್ಲೈನ್ಸ್ ಸಿಬ್ಬಂದಿ ಇಂದಿರಾಗಾಂಧಿ ವಿಮಾನ ನಿಲ್ದಾಣದ ಭದ್ರತಾ ಸಿಬ್ಬಂದಿಗೆ ವಿಷಯ ಮುಟ್ಟಿಸಿದ್ದರು. ಆ ಬಳಿಕ ಐಜಿಐ ಸಿಬ್ಬಂದಿ ಆರೋಪಿ ಅಬ್ದುಲ್ನನ್ನು ದೆಹಲಿ ಪೊಲೀಸರಿಗೆ ಒಪ್ಪಿಸಿದ್ದಾರೆ.
