ನವದೆಹಲಿ: ಇಂಗ್ಲೆಂಡ್ನಲ್ಲಿ ನಡೆಯಲಿರುವ 12ನೇ ವಿಶ್ವಕಪ್ಗೆ ಭಾರತ ತಂಡದ 15 ಆಟಗಾರರ ಪಟ್ಟಿಯನ್ನು ಬಿಸಿಸಿಐ ಕೆಲ ದಿನಗಳ ಹಿಂದೆ ಬಿಡುಗಡೆ ಮಾಡಿತ್ತು. ತಂಡದಲ್ಲಿರುವ ಆಟಗಾರರಿಗೆ ಸ್ಟಾಂಡ್ ಬೈ ಆಟಗಾರರಾಗಿ ಪಂತ್, ಸೈನಿ, ರಾಯುಡು, ಅಕ್ಷರ್ ಪಟೇಲ್ ಬಳಿಕ ಇದೀಗ ಇಶಾಂತ್ ಶರ್ಮಾರನ್ನೂ ಆಯ್ಕೆ ಮಾಡಲಾಗಿದೆ.
ಟೆಸ್ಟ್ ತಂಡದ ಕಾಯಂ ಬೌಲರ್ ಆಗಿರುವ ಇಶಾಂತ್ ಶರ್ಮಾಗೆ ಇದುವರೆಗೂ ವಿಶ್ವಕಪ್ನಲ್ಲಿ ಆಡುವ ಅದೃಷ್ಟ ದೊರೆತಿಲ್ಲ. 2015ರ ವಿಶ್ವಕಪ್ನಲ್ಲಿ ತಂಡ ಸೇರುವ ಅರ್ಹತೆಯಿದ್ದರೂ ಗಾಯದ ಸಮಸ್ಯೆಯಿಂದ ಹೊರಬಿದ್ದರು. ಇದೀಗ ಭಾರತದ ವೇಗದ ಬೌಲರ್ಗಳಲ್ಲಿ ಜಸ್ಪ್ರಿತ್ ಬೂಮ್ರಾ ಹಾಗೂ ಭುವನೇಶ್ವರ್ ಕುಮಾರ್ ಕಾಯಂ ಹಾಗೂ ವಿಶ್ವದ ಅತ್ಯುತ್ತಮ ಬೌಲರ್ಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವುದರಿಂದ 2019ರ ವಿಶ್ವಕಪ್ಗೆ ವೇಗದ ಬೌಲರ್ಗಳಾಗಿ ಆಯ್ಕೆಯಾಗಿದ್ದಾರೆ.
ಇವರಿಬ್ಬರಿಗೆ ಸಾಥ್‌ ನೀಡಲು ಟೆಸ್ಟ್ ತಂಡದ ಮತ್ತೊಬ್ಬ ಬೌಲರ್ ಮೊಹಮ್ಮದ್ ಶಮಿ ಸ್ಥಾನ ಪಡೆದುಕೊಂಡ ಹಿನ್ನೆಲೆಯಲ್ಲಿ ಇಶಾಂತ್ ಶರ್ಮಾರನ್ನು ಸ್ಟ್ಯಾಂಡ್ ಬೈ ಆಟಗಾರನಾಗಿ ಪರಿಗಣಿಸಲಾಗಿದೆ. ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾದಲ್ಲಿ ಉತ್ತಮ ಬೌಲಿಂಗ್ ಪ್ರದರ್ಶನ ನೀಡಿರುವ ಆಧಾರದ ಮೇಲೆ ಇಶಾಂತ್ಗೆ ಈ ಅವಕಾಶ ಒಲಿದುಬಂದಿದೆ. ಆದರೆ, ಬಿಸಿಸಿಐ ಮೂಲಗಳ ಪ್ರಕಾರ, ಸ್ಟ್ಯಾಂಡ್ ಬೈ ಬೌಲರ್ಗಳಲ್ಲೂ ಇಶಾಂತ್ 2 ನೇ ಆಯ್ಕೆಯಾಗಲಿದ್ದಾರಂತೆ. ಮೊದಲನೇ ಆಯ್ಕೆಯಲ್ಲಿ ಯುವ ವೇಗಿ ನವದೀಪ್ ಸೈನಿ ಇದ್ದಾರೆ.
ಇಶಾಂತ್ ಸಾಧನೆ ಏನು?
ಈ ಬಾರಿಯ ಐಪಿಎಲ್ನಲ್ಲಿ ಇಶಾಂತ್, ಡೆಲ್ಲಿ ಕ್ಯಾಪಿಟಲ್ ಪರ 10 ಪಂದ್ಯಗಳಲ್ಲಿ 7.5 ರ ಎಕಾನಮಿ ರೇಟ್‌ನಲ್ಲಿ ರನ್ ಬಿಟ್ಟುಕೊಟ್ಟು 10 ವಿಕೆಟ್ ಪಡೆದಿದ್ದಾರೆ. ಭಾರತದ ಪರ 80 ಏಕದಿನ ಪಂದ್ಯಗಳಲ್ಲಿ ಇಶಾಂತ್ ಶರ್ಮಾ 115 ವಿಕೆಟ್ ಪಡೆದಿದ್ದಾರೆ.
ಅವಶ್ಯಕತೆ ಬಿದ್ರೆ ಮಾತ್ರ ಪ್ರಯಾಣ:
ಇಶಾಂತ್ ಸೇರಿದಂತೆ ಸ್ಟಾಂಡ್ ಬೈ ಆಗಿರುವ 5 ಆಟಗಾರರು ವಿಶ್ವಕಪ್ ತಂಡದ ಜೊತೆಗೆ ಇಂಗ್ಲೆಂಡ್ಗೆ ಹೋಗುವುದಿಲ್ಲ. ತಂಡಕ್ಕೆ ಅವಶ್ಯಕತೆ ಇದ್ದಾಗ ಅವರನ್ನು ಕರೆಸಿಕೊಳ್ಳಲಾಗುವುದು. ಆದ್ದರಿಂದ 5 ಆಟಗಾರರು ಸಿದ್ದರಿರಾಬೇಕಾಗಿ ಬಿಸಿಸಿಐ ಸೂಚಿಸಿದೆ.
