ಬಂಟ್ವಾಳ(ದ.ಕ): ಕಳೆದ ಕೆಲವು ಸಮಯಗಳಿಂದ ಮಲೆನಾಡಿನ ತಪ್ಪಲು ಹಾಗೂ ಕರಾವಳಿ ಭಾಗದಲ್ಲಿ ನಿರಂತರ ವರ್ಷಧಾರೆಯಾಗುತ್ತಿರುವ ಕಾರಣ ಮಂಗಳೂರು ನಗರಕ್ಕೆ ನೀರು ಪೂರೈಸುವ ತುಂಬೆ ಡ್ಯಾಂನಲ್ಲಿ ನೀರಿನ ಶೇಖರಣೆ 6 ಮೀ. ಗರಿಷ್ಠ ಮಟ್ಟಕ್ಕೆ ತಲುಪಿದೆ.
ನೂತನ ಡ್ಯಾಂ ನಿರ್ಮಾಣವಾದ ಬಳಿಕ ಆರಂಭದಲ್ಲಿ 5 ಮೀ. ನೀರು ಸಂಗ್ರಹದ ವ್ಯವಸ್ಥೆ ಇತ್ತು. ಆ ಬಳಿಕ ಹೆಚ್ಚುವರಿ ಭೂ ಸ್ವಾಧೀನ ಮಾಡಿ 6 ಮೀ.ವರೆಗೆ ನೀರು ಸಂಗ್ರಹಿಸುವ ವ್ಯವಸ್ಥೆ ಮಾಡಲಾಗಿತ್ತು. ಮೇ ತಿಂಗಳಲ್ಲಿ 6 ಮೀಟರ್ ಗರಿಷ್ಠ ಮಟ್ಟ ತಲುಪಿದ್ದು ಇದೇ ಮೊದಲು.
ಏಪ್ರಿಲ್ ಮೊದಲ ವಾರದಿಂದಲೇ ಮಳೆ ಸುರಿಯುತ್ತಿರುವ ಕಾರಣ ಏಪ್ರಿಲ್ ಮಧ್ಯಭಾಗದಲ್ಲಿ 5.70 ಮೀಟರ್ನಷ್ಟು ನೀರು ಸಂಗ್ರಹ ದಾಖಲಾಗಿತ್ತು. ಆ ಬಳಿಕ ಏಪ್ರಿಲ್ ಅಂತ್ಯದಲ್ಲಿ ಮತ್ತೆ ಭಾರೀ ಮಳೆ ಸುರಿದ ಕಾರಣ ನೇತ್ರಾವತಿ ನದಿಯಲ್ಲಿ ನೀರಿನ ಒಳ ಹರಿವು ಹೆಚ್ಚಳವಾಗಿ ನೀರಿನ ಪ್ರಮಾಣ ಗರಿಷ್ಠ ಮಟ್ಟಕ್ಕೆ ತಲುಪಿದೆ.
ನೀರು ಆರು ಮೀಟರ್ವರೆಗೆ ಶೇಖರಣೆಯಾದ ಹಿನ್ನೆಲೆಯಲ್ಲಿ ಕಳೆದ ಸೋಮವಾರ ಒಂದು ಗೇಟ್ ತೆರೆದು ನೀರನ್ನು ಹೊರಗಡೆ ಬಿಡುವ ವ್ಯವಸ್ಥೆ ಮಾಡಲಾಗಿತ್ತು. ಸಂಜೆ ವೇಳೆಗೆ ಮತ್ತೆ ಗೇಟ್ ಬಂದ್ ಮಾಡಲಾಯಿತು. ಪ್ರತಿ ವರ್ಷ ಏಪ್ರಿಲ್- ಮೇ ತಿಂಗಳಲ್ಲಿ ಮಂಗಳೂರು ನಗರಕ್ಕೆ ಕುಡಿಯುವ ನೀರಿನ ಆತಂಕ ಎದುರಾಗುತ್ತದೆ. ಮಳೆಯೂ ಬಾರದಿದ್ದರೆ ನೀರು ಪೂರೈಕೆಯಲ್ಲಿ ರೇಷನಿಂಗ್ ವ್ಯವಸ್ಥೆ ಮಾಡಲಾಗುತ್ತಿತ್ತು. ಆದರೆ, ಈ ಬಾರಿ ಸ್ವಲ್ಪವೂ ಆತಂಕ ಇಲ್ಲದೇ ನೀರು ಪೂರೈಕೆ ಸರಾಗವಾಗಿ ಮಾಡಬಹುದಾಗಿದೆ. ಇನ್ನು ಮೇ ಅಂತ್ಯದ ವರೆಗೆ ಮಳೆ ಬಾರದೇ ಇದ್ದರೂ ನೀರಿನ ಕೊರತೆ ಉಂಟಾಗದು.
