ಮ್ಯಾಂಚೆಸ್ಟರ್: ನಾನು ಕ್ರಿಕೆಟ್ ಆಡುತ್ತಿದ್ದ ಕಾಲದಲ್ಲಿ ಪಾಕಿಸ್ತಾನ ತಂಡ ಬಲಿಷ್ಠ ತಂಡವಾಗಿತ್ತು. ಆದರೆ, ಈಗಿರುವ ತಂಡ ಭಾರತವನ್ನು ಮಣಿಸಲು ಅಸಾಧ್ಯವಾದ ಮಾತೇ ಸರಿ ಎಂದು ಕಪಿಲ್ ದೇವ್ ಅಭಿಪ್ರಾಯ ಪಟ್ಟಿದ್ದಾರೆ.
ಪ್ರಸ್ತುತ ಇರುವ ಪಾಕಿಸ್ತಾನ ತಂಡಕ್ಕಿಂತ ಭಾರತ ತಂಡ ತುಂಬಾ ಬಲಿಷ್ಠವಾಗಿದೆ. ಎರಡೂ ತಂಡಗಳು 10 ಬಾರಿ ಮುಖಾಮುಖಿಯಾದರೆ ಕೊಹ್ಲಿಪಡೆ 7 ಪಂದ್ಯಗಳಲ್ಲಿ ಗೆಲುವು ಸಾಧಿಸಲಿದೆ ಎಂದು 1983 ರ ವಿಶ್ವಕಪ್ ವಿಜೇತ ತಂಡದ ನಾಯಕ ಕಪಿಲ್ ದೇವ್ ತಿಳಿಸಿದ್ದಾರೆ.
ನಾನೊಬ್ಬ ಭಾರತೀಯನಾಗಿ ಪಾಕಿಸ್ತಾನ ತಂಡಕ್ಕಿಂತ ಭಾರತ ತಂಡವೇ ಪ್ರಬಲ ಎಂದು ಹೇಳುತ್ತಿಲ್ಲ. ಕಳೆದ 15 ವರ್ಷಗಳ ಭಾರತೀಯ ಕ್ರಿಕೆಟ್ನಲ್ಲಿ ಈಗಿರುವ ತಂಡಕ್ಕೆ ಬೌಲರ್ಗಳು ಮ್ಯಾಚ್ ವಿನ್ನರ್ ಆಗುತ್ತಿದ್ದಾರೆ. ಬುಮ್ರಾರಂಥ ವೇಗಿಗಳು ತಂಡಕ್ಕೆ ಗೆಲುವು ತಂದುಕೊಡುವಲ್ಲಿ ಯಶಸ್ವಿಯಾಗುತ್ತಿದ್ದಾರೆ ಹೀಗಾಗಿ ಭಾರತವೇ ಫೇವ್ರಿಟ್ ಎಂದರು.
ಬುಮ್ರಾರ ಬಗ್ಗೆ ತಪ್ಪಾಗಿ ಯೋಚಿಸಿದ್ದೆ!
ಮೊದಲ ಬಾರಿ ಬುಮ್ರಾರನ್ನು ನೋಡಿದ ನನಗೆ ಆತನೊಬ್ಬ ಸಾಮಾನ್ಯ ಬೌಲರ್ ರೀತಿ ಕಾಣಿಸಿದ್ದ, ಅವನಲ್ಲಿ ಯಾವುದೇ ರೀತಿಯ ವಿಶೇಷ ಕೌಶಲ್ಯಗಳು ಕಂಡಿರಲಿಲ್ಲ. ಆದರೆ, ಇದೀಗ ನನ್ನ ಅನಿಸಿಕೆ ಅಥವಾ ಊಹೆ ಸುಳ್ಳಾಗಿದೆ. ಬುಮ್ರಾ ಒಂದು ಅದ್ಭುತ, ತುಂಬಾ ಕಡಿಮೆ ಸಮಯದಲ್ಲಿ ತನ್ನ ಬೌಲಿಂಗ್ ತಾಕತ್ತನ್ನು ವಿಶ್ವಕ್ಕೆ ತೋರಿಸಿದ್ದಾರೆ. ವಿಶ್ವ ಶ್ರೇಷ್ಠ ಹಾಗೂ ನಂ 1 ಬೌಲರ್ ಆಗಿರುವ ಬುಮ್ರಾ ಮುಂದಿನ ಕೆಲವು ವರ್ಷಗಳ ಕಾಲ ಫಿಟ್ ಆಗಿರಲಿ ಎಂದು ಬಯಸುತ್ತೇನೆ ಎಂದಿದ್ದಾರೆ.
