ನವದೆಹಲಿ: ಅಗಸ್ಟಾ ವೆಸ್ಟ್ಲ್ಯಾಂಡ್ ವಿವಿಐಪಿ ಹೆಲಿಕಾಪ್ಟರ್ ಒಪ್ಪಂದದ ಮಧ್ಯವರ್ತಿ ಹಾಗೂ ಸದ್ಯ ತಿಹಾರ್ ಜೈಲಿನಲ್ಲಿರುವ ಕ್ರಿಶ್ಚಿಯನ್ ಮೈಕಲ್ ಈಸ್ಟರ್ ಆಚರಣೆಗಾಗಿ ಜಾಮೀನು ನೀಡಬೇಕು ಎಂದು ದೆಹಲಿ ಕೋರ್ಟ್ನಲ್ಲಿ ಮನವಿ ಸಲ್ಲಿಸಿದ್ದಾನೆ.
ವಿಶೇಷ ನ್ಯಾಯಾಧೀಶ ಅರವಿಂದ ಕುಮಾರ್ ಮುಂದೆ ಮಧ್ಯಂತರ ಜಾಮೀನು ಅರ್ಜಿ ಸಲ್ಲಿಕೆಯಾಗಿದ್ದು, ಜಾರಿ ನಿರ್ದೇಶನಾಲಯ ಹಾಗೂ ಸಿಬಿಐಗೆ ಜಾಮೀನು ಅರ್ಜಿ ಕುರಿತಂತೆ ಪ್ರತಿಕ್ರಿಯೆಯನ್ನು ನ್ಯಾಯಾಧೀಶರು ಕೇಳಿದ್ದಾರೆ. ಸದ್ಯ ಏಪ್ರಿಲ್ 18ಕ್ಕೆ ಮುಂದಿನ ವಿಚಾರಣೆಯನ್ನು ಕಾಯ್ದಿರಿಸಲಾಗಿದೆ.
ಏಪ್ರಿಲ್ 14ರಿಂದ 21 ಕ್ರಿಶ್ಚಿಯನ್ನರ ಪವಿತ್ರ ವಾರವಾಗಿದ್ದು, ಏಪ್ರಿಲ್ 21ರಂದು ಈಸ್ಟರ್ ಹಬ್ಬ ಎಂದು ಮೈಕೆಲ್ ಪರವಾಗಿ ವಾದ ಮಂಡಿಸುತ್ತಿರುವ ಅಲ್ಜೋ ಕೆ.ಜೋಸೆಫ್ ಹಾಗೂ ವಿಷ್ಣು ಶಂಕರ್ ಕೋರ್ಟ್ಗೆ ತಿಳಿಸಿದ್ದಾರೆ.
ನಾಲ್ಕು ವಾರ... 7 ಕೆ.ಜಿ ಇಳಿಕೆ..!
ಕ್ರಿಶ್ಚಿಯನ್ ಮೈಕೆಲ್ ಆರೋಗ್ಯ ಹದಗೆಡುತ್ತಿದ್ದು ಜೊತೆಗೆ ತೂಕ ಇಳಿಕೆಯಾಗುತ್ತಿದೆ. ಪ್ರತಿನಿತ್ಯ ಆರೋಗ್ಯ ತಪಾಸಣೆ ನಡೆಸಬೇಕು ಎಂದು ಮೈಕೆಲ್ ಪರ ವಕೀಲರು ಕೋರ್ಟ್ನಲ್ಲಿ ಮನವಿ ಮಾಡಿದ್ದಾರೆ.
ವಕೀಲರ ಪ್ರಕಾರ ಕಳೆದ ನಾಲ್ಕು ವಾರದಲ್ಲಿ ಮೈಕೆಲ್ ಬರೋಬ್ಬರಿ ಏಳು ಕೆ.ಜಿ ತೂಕ ಕಳೆದುಕೊಂಡಿದ್ದಾರೆ ಎನ್ನಲಾಗಿದೆ.
