ಬಟಿಂಡಾ(ಪಂಜಾಬ್): ಚಿಕ್ಕ ವಯಸ್ಸಿನಲ್ಲೇ ಕಾರು, ಬೈಕ್ ಅಷ್ಟೇ ಏಕೆ ಹೆಲಿಕಾಪ್ಟರ್ ಸಹ ಸಿದ್ಧಪಡಿಸಿರುವ ಅನೇಕ ಸ್ಫೂರ್ತಿದಾಯಕ ಸ್ಟೋರಿ ನಮ್ಮ ಮುಂದೆ ನಡೆದಿವೆ. ಇದೀಗ ಆ ಸಾಲಿಗೆ ಮತ್ತೋರ್ವ ವಿದ್ಯಾರ್ಥಿ ಸೇರಿಕೊಂಡಿದ್ದು, ಕೇವಲ 12ನೇ ತರಗತಿಯಲ್ಲಿ ವ್ಯಾಸಂಗ ಮಾಡ್ತಿರುವ ಯುವಕನೋರ್ವ ಮಿನಿ ಟ್ರ್ಯಾಕ್ಟರ್ ತಯಾರಿಸಿ ಎಲ್ಲರ ಗಮನ ಸೆಳೆದಿದ್ದಾನೆ.
ಪಂಜಾಬ್ನ ಬಟಿಂಡಾದಲ್ಲಿ 12ನೇ ತರಗತಿ ವ್ಯಾಸಂಗ ಮಾಡುತ್ತಿರುವ ವಿದ್ಯಾರ್ಥಿ ಗುರ್ವಿಂದರ್ ಸಿಂಗ್, ಕೇವಲ 40 ಸಾವಿರ ರೂಪಾಯಿ ವೆಚ್ಚದಲ್ಲಿ ಈ ಟ್ರ್ಯಾಕ್ಟರ್ ಸಿದ್ಧಪಡಿಸಿದ್ದಾನೆ. ಕೋವಿಡ್ ಸಾಂಕ್ರಾಮಿಕ ಸಂದರ್ಭದಲ್ಲಿ ಎಲ್ಲೆಡೆ ಲಾಕ್ಡೌನ್ ಹೇರಿಕೆ ಮಾಡಿದ್ದ ಸಂದರ್ಭದಲ್ಲಿ ವಿದ್ಯಾರ್ಥಿ ಈ ಕೆಲಸ ಮಾಡಿದ್ದು, ಪ್ರತಿ ಲೀಟರ್ ಡಿಸೇಲ್ಗೆ ಇದು 35 ಕಿಲೋ ಮೀಟರ್ ಮೈಲೇಜ್ ನೀಡಲಿದ್ದು. 4 ಕ್ವಿಂಟಲ್ ಭಾರ ಸಾಗಿಸುವ ಸಾಮರ್ಥ್ಯ ಹೊಂದಿದೆ.
ಗುರ್ವಿಂದರ್ ಸಿಂಗ್ ಚಿಕ್ಕವನಿದ್ದಾಗಿಂದಲೂ ಟ್ರ್ಯಾಕ್ಟರ್ ತಯಾರಿಸುವ ಒಲವು ಹೊಂದಿದ್ದರು. ಅದರ ಪ್ರತಿಫಲವಾಗಿ ಇದೀಗ ಈ ಮಿನಿ ಟ್ರ್ಯಾಕ್ಟರ್ ಸಿದ್ಧಗೊಂಡಿದ್ದು, ಇದಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗ್ತಿದೆ ಎಂದು ಆತ ಹೇಳಿಕೊಂಡಿದ್ದಾನೆ. ಇದಕ್ಕೋಸ್ಕರ 40 ಸಾವಿರ ರೂಪಾಯಿ ಖರ್ಚು ಮಾಡಿರುವುದಾಗಿ ಹೇಳಿಕೊಂಡಿದ್ದಾನೆ.
ಮಗನ ಸಾಧನೆಗೆ ತಂದೆ ಸಾಧು ಸಿಂಗ್ ಸಂತಸ ವ್ಯಕ್ತಪಡಿಸಿದ್ದು, ಈ ಟ್ರ್ಯಾಕ್ಟರ್ ಜಮೀನಿನಲ್ಲಿ ತಮ್ಮ ಕೆಲಸ ಮತ್ತಷ್ಟು ಸುಲಭಗೊಳಿಸಿದೆ ಎಂದಿದ್ದಾರೆ. ಜೊತೆಗೆ ಸದ್ಯದ ಪರಿಸ್ಥಿತಿಯಲ್ಲಿ ಮಾರುಕಟ್ಟೆಯಿಂದ ಟ್ರ್ಯಾಕ್ಟರ್ ಖರೀದಿ ತುಂಬಾ ದುಬಾರಿ, ಇದೀಗ ಕೇವಲ 40 ಸಾವಿರ ರೂಪಾಯಿ ವೆಚ್ಚದಲ್ಲಿ ನಮ್ಮ ಮಗ ಟ್ರ್ಯಾಕ್ಟರ್ ತಯಾರಿಸಿ, ನಮಗೆ ಸಹಾಯ ಮಾಡಿದ್ದಾನೆಂದು ಹೇಳಿಕೊಂಡಿದ್ದಾರೆ.
