ಕೌಶಂಬಿ(ಉತ್ತರ ಪ್ರದೇಶ): ರಾಜ್ಯದ ಜಿಲ್ಲೆಯ ಹಳ್ಳಿಯೊಂದರಿಂದ ಮೊಬೈಲ್ ಟವರ್‌ನ ಸಂಪೂರ್ಣ ಉಪಕರಣಗಳು ಮತ್ತು ಸೆಟಪ್ ಅನ್ನು ಕಳ್ಳರು ಕದ್ದೊಯ್ದಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಈ ಘಟನೆ ನಡೆದು 9 ತಿಂಗಳ ಬಳಿಕ ಕಂಪನಿ ಪೊಲೀಸ್ ಠಾಣೆಗೆ ದೂರು ನೀಡಿದೆ. ಮೊಬೈಲ್ ನೆಟ್‌ವರ್ಕ್‌ನ ಆವರ್ತನ ಒದಗಿಸಲು ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಕಂಪನಿಯು ಸುಮಾರು 18 ಟವರ್‌ಗಳನ್ನು ಸ್ಥಾಪಿಸಿತ್ತು ಎಂದು ಹೇಳಲಾಗುತ್ತಿದೆ. ಕಂಪನಿಯ ತಂತ್ರಜ್ಞರು ನೀಡಿದ ದೂರಿನ ಮೇರೆಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಸಂದೀಪನ್ ಘಾಟ್ ಪೊಲೀಸ್ ಠಾಣೆ ವ್ಯಾಪ್ತಿಯ ಉಜಿಹಾನಿ ಖಾಲ್ಸಾ ಗ್ರಾಮದ ಮಜೀದ್ ಉಲ್ಲಾ ಅವರ ಪುತ್ರ ಉಬೈದ್ ಉಲ್ಲಾ ಜಮೀನಿನಲ್ಲಿ ಮೊಬೈಲ್ ಟವರ್ ಅಳವಡಿಸಲಾಗಿತ್ತು. ಪ್ರತಾಪ್‌ಗಢ ಜಿಲ್ಲೆಯ ರಾಣಿಗಂಜ್ ಪೊಲೀಸ್ ಠಾಣೆಯ ರಸ್ತಿಪುರ ನಿವಾಸಿ ರಾಜೇಶ್ ಯಾದವ್ ಜಿಟಿಎಲ್ ಇನ್‌ಫ್ರಾಸ್ಟ್ರಕ್ಚರ್ ಲಿಮಿಟೆಡ್ ಕಂಪನಿಯಲ್ಲಿ ತಂತ್ರಜ್ಞರಾಗಿ ನೇಮಕಗೊಂಡಿದ್ದಾರೆ. ಮಾರ್ಚ್ 31ರಂದು ರಾಜೇಶ್ ಯಾದವ್ ಭೇಟಿ ನೀಡಿದಾಗ, ಉಬೈದ್ ಉಲ್ಲಾ ಅವರ ಜಮೀನಿನಲ್ಲಿ ಸ್ಥಾಪಿಸಲಾದ ಸಂಪೂರ್ಣ ಟವರ್ ಮತ್ತು ಸೆಟಪ್ ಕಾಣೆಯಾಗಿತ್ತು.
ಜಮೀನಿನ ಮಾಲೀಕರನ್ನು ವಿಚಾರಣೆಗೊಳಪಡಿಸಿದಾಗ ಅವರು ಈ ವಿಷಯದ ಬಗ್ಗೆ ಯಾವುದೇ ಮಾಹಿತಿ ನೀಡಲು ನಿರಾಕರಿಸಿದ್ದರು. ಇದಾದ ಬಳಿಕ ಕಂಪನಿಯ ಇಂಜಿನಿಯರ್ ಕಳ್ಳತನದ ಬಗ್ಗೆ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಕೌಶಂಬಿಯ ವಿವಿಧ ಪ್ರದೇಶಗಳಲ್ಲಿ ಕಂಪನಿಯು 18ಕ್ಕೂ ಹೆಚ್ಚು ಟವರ್‌ಗಳನ್ನು ಸ್ಥಾಪಿಸಿದೆ ಎಂದು ಹೇಳಲಾಗುತ್ತಿದೆ. ಇಡೀ ಟವರ್ ಕಾಣೆಯಾಗಿದ್ದರಿಂದ ಕಂಪನಿ ಅಧಿಕಾರಿಗಳು ಬೆಚ್ಚಿಬಿದ್ದಿದ್ದಾರೆ. ಪೊಲೀಸರು ಸಂಪೂರ್ಣ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ರಾಜೇಶ್ ಯಾದವ್ ಪ್ರಕಾರ, ಖಾಸಗಿ ಕಂಪನಿಗಳ ಮೊಬೈಲ್ ಸಿಗ್ನಲ್ ತರಂಗಾಂತರಗಳಿಗಾಗಿ ಅವರ ಕಂಪನಿಯು ಜಿಲ್ಲೆಯ ವಿವಿಧ ಸ್ಥಳಗಳಲ್ಲಿ 16 ಮೊಬೈಲ್ ಟವರ್‌ಗಳನ್ನು ಸ್ಥಾಪಿಸಿದೆ. ಇದರೊಂದಿಗೆ, ಒಂದು ಟವರ್ ಮತ್ತು ಸಂಪೂರ್ಣ ಸೆಟಪ್‌ನ ವೆಚ್ಚ ಸುಮಾರು 8,52,025 ರೂಪಾಯಿಗಳು ಮತ್ತು WDV (ಸೆಟಪ್) ವೆಚ್ಚ 4,26,818 ರೂಪಾಯಿಗಳು ಎಂದು ಅವರು ಹೇಳಿದರು. ಟವರ್ ಕಳ್ಳತನದ ಬಗ್ಗೆ ಕಂಪನಿಗೆ ಮಾಹಿತಿ ರವಾನಿಸಿದ್ದಾರೆ. ಕ್ರಮ ಕೈಗೊಳ್ಳಲು 9 ತಿಂಗಳು ಬೇಕಾಯಿತು. ಕಂಪನಿಯ ಸೂಚನೆ ಮೇರೆಗೆ ಪೊಲೀಸ್ ಠಾಣೆಗೆ ದೂರು ನೀಡಿ ಕ್ರಮಕ್ಕೆ ಆಗ್ರಹಿಸಿದ್ದೇವೆ ಎಂದರು.
ಪೊಲೀಸ್ ಠಾಣೆ ಪ್ರಭಾರಿ ಭುವನೇಶ್ ಚೌಬೆ ಮಾತನಾಡಿ, ಪೊಲೀಸ್ ಠಾಣೆಗೆ ಜಿಟಿಎಲ್ ಕಂಪನಿಯ ಉದ್ಯೋಗಿಯೊಬ್ಬರಿಂದ ದೂರು ಬಂದಿದೆ. ಸ್ಥಳದಲ್ಲೇ ತನಿಖೆ ನಡೆಸಿದಾಗ ಮೊಬೈಲ್ ಟವರ್ ಮತ್ತು ಸಂಪೂರ್ಣ ಸೆಟಪ್ ನಾಪತ್ತೆಯಾಗಿರುವುದು ಪತ್ತೆಯಾಗಿದೆ. ದೂರಿನ ಆಧಾರದ ಮೇಲೆ ಅಪರಿಚಿತ ವ್ಯಕ್ತಿಗಳ ವಿರುದ್ಧ ಕಳ್ಳತನದ ವರದಿಯನ್ನು ದಾಖಲಿಸಲಾಗಿದೆ. ಪ್ರಕರಣದ ತನಿಖೆ ನಡೆಯುತ್ತಿದೆ ಎಂದರು.
ಇದನ್ನೂ ಓದಿ: ಮಂಗಳೂರು : ಮೊಬೈಲ್ ಟವರ್ ಏರಿ ಆತಂಕ ಸೃಷ್ಟಿಸಿದ ಮಾನಸಿಕ ಅಸ್ವಸ್ಥ
