ಬಂಧ ಮುಕ್ತನಾಗಿ ಬನ್ನೇರುಘಟ್ಟ ಸೇರಿದ ಆನೆ: ಪೆಟಾ ಹೋರಾಟದಿಂದ 'ಸುಂದರ' ಬದುಕು

ಪೆಟಾ ಇಂಡಿಯಾದ ಕಾನೂನು ಹೋರಾಟದ ಫಲವಾಗಿ ಹಲವು ವರ್ಷಗಳ ಕಾಲ ಬಂಧನದಲ್ಲಿದ್ದ ಆನೆಯೊಂದು, ಬಂಧ ಮುಕ್ತವಾಗಿ ಬನ್ನೇರುಘಟ್ಟದ ಜೈವಿಕ ಉದ್ಯಾನವ ತಲುಪಿದೆ.

ನವದೆಹಲಿ: ಆತ ದೇವಸ್ಥಾನವೊಂದರಲ್ಲಿ ಬಂಧಿಯಾಗಿ ತನ್ನ ನೋವನ್ನು ಹೇಳಿಕೊಳ್ಳಲು ಯಾರೂ ಇಲ್ಲದೆ ನರಕಯಾತನೆ ಅನುಭವಿಸಿದ್ದ. ಬಾಲ್ಯದಲ್ಲೇ ಒಬ್ಬಂಟಿಯಾಗಿ ಬಂಧನಕ್ಕೊಳಗಾದ ಆತ, ಈಗ ಬಂಧ ಮುಕ್ತನಾಗಿ ತನ್ನ ಸುಂದರ ವಾಸಸ್ಥಾನಕ್ಕೆ ಮರಳಿದ್ದಾನೆ. ಈ ಮೂಲಕ ಆತನ ಬಾಳಲ್ಲಿ ಸಂತೊಷ ಮರಳಿ ಬಂದಿದೆ.

ನಾವು ಹೇಳಲು ಹೋರಟಿರುವ ಕಥೆ, ಸುಂದರ್ ಎಂಬ ಗಂಡಾನೆಯದ್ದಾಗಿದೆ. ಹೌದು, ಮಹಾರಾಷ್ಟ್ರದ ಪಶ್ಚಿಮದಲ್ಲಿ ಪಂಚಗಂಗಾ ನದಿಯ ದಡದಲ್ಲಿರುವ ನಗರ ಕೊಲ್ಲಾಪುರದ ದೇವಾಲಯವೊಂದರಲ್ಲಿ ಏಳು ವರ್ಷಗಳ ಕಾಲ ಒಂಟಿಯಾಗಿ ಬಂಧನಕ್ಕೊಳಗಾದ ಸುಂದರ್ ಹೆಸರಿನ​ ಆನೆಯೊಂದರ ಕಥೆಯಾಗಿದೆ ಇದು.

ಸುಂದರ್‌ನ ಜೀವನ 2014 ಕ್ಕಿಂತ ಮೊದಲು ಅಷ್ಟು ಸಂತೋಷದಾಯಕವಾಗಿರಲಿಲ್ಲ. 2007 ರಲ್ಲಿ ಕೊಲ್ಲಾಪುರದ ದೇವಸ್ಥಾನಕ್ಕೆ ಉಡುಗೊರೆಯಾಗಿ ಸುಂದರ್​ ಅನ್ನು ನೀಡಲಾಗಿತ್ತು. ಸಣ್ಣ ವಯಸ್ಸಿನಲ್ಲೇ ಒಬ್ಬಂಟಿಯಾದ ಸುಂದರ್, ತನ್ನ ಸಂತೋಷವನ್ನು ಕಳೆದುಕೊಂಡಿದ್ದ. ಹಲವು ವರ್ಷಗಳ ಕಾಲ ಹೊರಗಡೆ ಓಡಾಡಲು ಸಾಧ್ಯವಾಗದೆ ನರಕಯಾತನೆ ಅನಭವಿಸುತ್ತಿದ್ದ ಸುಂದರ್​ ಬಗ್ಗೆ, 2014 ರಲ್ಲಿ ಪೀಪಲ್ಸ್ ಫಾರ್​ ದಿ ಎತಿಕಲ್ ಟ್ರೀಟ್​ಮೆಂಟ್​ ಆಫ್​ ಅನಿಮಲ್ಸ್ ( ಪೆಟಾ) ಇಂಡಿಯಾ ಮಾಹಿತಿ ಪಡೆದಿತ್ತು.

ಪೆಟಾ ಇಂಡಿಯಾ ಸುಂದರ್​ನ ದುಸ್ಥಿತಿಯ ಬಗ್ಗೆ ಮಾಹಿತಿ ಪಡೆಯುವಾಗ, ಆತನ ಕಣ್ಣಿಗೆ ಗಾಯವಾಗಿತ್ತು, ಕಿವಿಯಲ್ಲಿ ರಂಧ್ರವಿತ್ತು, ಅವನು ಅನುಭವಿಸಿದ ಕ್ರೌರ್ಯದಿಂದ ಅವನ ದೇಹದ ಮೇಲೆ ಗಾಯಗಳಾಗಿತ್ತು. ಪೇಟಾ ಇಂಡಿಯಾ ಸುಂದರ್​ ಬಿಡುಗಡೆಗಾಗಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು. ಪೇಟಾದ ಕಾನೂನು ಹೋರಾಟವನ್ನು, ಗಾಯಕ ಪಾಲ್ ಮೆಕ್​ಟರ್ನಿ, ನಟಿ ಪಮೇಲಾ ಆಂಡರ್ಸನ್ ಮತ್ತು ಬಾಲಿವುಡ್​ ಬಿಗ್​ ಬಿ ಅಮಿತಾಬ್ ಬಚ್ಚನ್ ಸೇರಿದಂತೆ ಲಕ್ಷಾಂತರ ಜನರು ಬೆಂಬಲಿಸಿದ್ದರು. ಬಳಿಕ ಸುಪ್ರೀಂಕೋರ್ಟ್ ಪೇಟಾ ಪರವಾಗಿ ತೀರ್ಪು ಕೂಡ ಕೊಟ್ಟಿತ್ತು. ಸುಪ್ರೀಂ ತೀರ್ಪು ಅನುಸರಿಸಿ, 2014 ರಲ್ಲಿ ಸುಂದರ್​ ಸುರ್ಧೀಘ ಬಂಧನದಿಂದ ಮುಕ್ತವಾಗಿದ್ದ. ಬಳಿಕ ಹೊಸ ವಾಸಸ್ಥಾನ ಬನ್ನೇರುಘಟ್ಟ ಜೈವಿಕ ಉದ್ಯಾನವನಕ್ಕೆ ಸ್ಥಳಾಂತರಗೊಂಡಿದ್ದ. ಈ ಮೂಲಕ ಆತ ಇತರ ಆನೆಗಳಂತೆ ನೀರಿನಲ್ಲಿ ಆಡುವ, ಸ್ವತಂತ್ರವಾಗಿ ಓಡಾಡುವ ಅವಕಾಶ ಪಡೆದಿದ್ದ.

ಪ್ರಸ್ತುತ 21 ವರ್ಷ ಪ್ರಾಯದ ಸುಂದರ್​, ತನ್ನ ಹೊಸ ವಾಸಸ್ಥಾನ ಬನ್ನೇರುಘಟ್ಟ ಜೈವಿಕ ಉದ್ಯಾನವನದಲ್ಲಿ ಸ್ವತಂತ್ರವಾಗಿ ಓಡಾಡುತಿದ್ದಾನೆ. ತನ್ನ ಇನ್ನುಳಿದ ಜೀವನವನ್ನು ಸಂತೋಷದಿಂದ ಕಳೆಯುತ್ತಿದ್ದಾನೆ. ಈಗ ಆತನ ಇತರ ಆನೆಗಳೊಂದಿಗೆ ಸೇರಿ ಪಳಗಿದ್ದಾನೆ. ಹೀಗಾಗಿ, ಆರು ವರ್ಷಗಳ ಬಳಿಕ ಸುಂದರ್​, ಸುಂದರ ಜೀವನಕ್ಕೆ ಮರಳಿದ್ದಾನೆ.

ಸರಪಳಿಗಳಿಂದ ಬಂಧಿತನಾಗಿದ್ದ, ಹೊಡೆತ ತಿಂದು ಗಾಯಗೊಂಡಿದ್ದ ಸುಂದರ್​ನನ್ನು ರಕ್ಷಿಸಿರುವುದು ಕೇವಲ ಒಂದು ಕಾರ್ಯಾಚರಣೆಯಾಗಿದೆ. ಇದೇ ತರ, ಸರ್ಕಸ್​ , ಸವಾರಿಗಳಲ್ಲಿ ಸಿಲುಕಿ ನರಕಯಾತನೆ ಅನುಭವಿಸುತ್ತಿರುವ ಇನ್ನೂ ಅನೇಕ ಆನೆಗಳನ್ನು ಬಂಧಮುಕ್ತಗೊಳಿಸುವಲ್ಲಿ ನಾವು ಶ್ರಮಿಸುತ್ತೇವೆ ಎಂದು ಪೆಟಾ ಇಂಡಿಯಾದ ಸಿಇಒ ಡಾ.ಮನಿಲಾಲ್ ವಲ್ಲಿಯೇಟ್ ಹೇಳಿದ್ದಾರೆ.

ಸುಂದರ್​ ನಮ್ಮ ಬನ್ನೇರುಘಟ್ಟ ಜೈವಿಕ ಉದ್ಯಾನವನ ಕುಟುಂಬದ ಭಾಗವಾಗಿದ್ದು ನಮ್ಮ ಭಾಗ್ಯ. ಆತ, ಇತರ ಆನೆಗಳೊಂದಿಗೆ ಸೇರುತ್ತಾನೆ, ಆತನ ಪಾಲಕರನ್ನು ಸೌಮ್ಯ ಸ್ವಭಾವದಿಂದ ಕಾಣುತ್ತಾನೆ ಎಂದು ಬನ್ನೇರುಘಟ್ಟ ಉದ್ಯಾನವನದ ಮುಖ್ಯ ಸಂರಕ್ಷಣಾಧಿಕಾರಿ ಮತ್ತು ಕಾರ್ಯನಿರ್ವಾಹಕ ನಿರ್ದೇಶಕಿ ವನಶ್ರೀ ವಿಪಿನ್ ಸಿಂಗ್ ತಿಳಿಸಿದ್ದಾರೆ.