ಮಗಳ ಕಾಪಾಡಲು ಹೋಗಿ ತಂದೆಯೂ ರೈಲಿಗೆ ಬಲಿ..

ಹಳಿಗಳ ಮೇಲೆ ಓಡುತ್ತಿದ್ದ ಮಗಳನ್ನು ರಕ್ಷಿಸಲು ಹೋದ ತಂದೆ ರೈಲು ಡಿಕ್ಕಿಯಾಗಿ ದಾರುಣವಾಗಿ ಮೃತಪಟ್ಟ ಘಟನೆ ಆಂಧ್ರಪ್ರದೇಶದಲ್ಲಿ ನಡೆದಿದೆ. ಘಟನೆಯಲ್ಲಿ ಮಗಳು ಕೂಡ ಪ್ರಾಣ ಕಳೆದುಕೊಂಡಿದ್ದಾಳೆ.

ವಿಜಯನಗರಂ(ಆಂಧ್ರಪ್ರದೇಶ): ಆಂಧ್ರಪ್ರದೇಶದ ವಿಜಯನಗರಂ ಜಿಲ್ಲೆಯಲ್ಲಿ ದಾರುಣ ಘಟನೆ ಬೆಳಕಿಗೆ ಬಂದಿದೆ. ರೈಲು ಬರುತ್ತಿದ್ದಾಗ ಹಳಿಗಳ ಮೇಲೆ ಓಡುತ್ತಿದ್ದ ಮಗಳನ್ನು ರಕ್ಷಿಸಲು ಹೋದಾಗ ಡಿಕ್ಕಿಯಾಗಿ ತಂದೆ- ಮಗಳು ಇಬ್ಬರೂ ಮೃತಪಟ್ಟಿದ್ದಾರೆ.

ವಿಜಯನಗರ ಜಿಲ್ಲೆಯ ಮಧುಪಾದ ಗ್ರಾಮದಲ್ಲಿ ಈ ಮನಕಲಕುವ ಘಟನೆ ಇತ್ತೀಚೆಗೆ ನಡೆದಿದೆ. ವಿಜಯನಗರದಿಂದ ಬೊಬ್ಬಿಲಿ ಕಡೆಗೆ ಹೋಗುತ್ತಿದ್ದ ರೈಲು ತಂದೆ- ಮಗಳನ್ನು ಬಲಿ ಪಡೆದಿದೆ.

ಏನಾಯ್ತು: ಮೃತರ ಪತ್ನಿ ನೀಡಿದ ಹೇಳಿಕೆಯ ಮೇರೆಗೆ, ಪತಿ, ಮಗಳನ್ನು ಕರೆದುಕೊಂಡ ಸಂಬಂಧಿಕರ ಮನೆಗೆ ಹೋಗಿದ್ದರು. ವಾಪಸ್​ ಬರುವಾಗ ರೈಲು ಬರುತ್ತಿರುವ ಕಾರಣ ಹಳಿಯ ಪಕ್ಕದಲ್ಲಿ ಬೈಕ್​ ನಿಲ್ಲಿಸಿದ್ದರು. ಈ ವೇಳೆ ಹಿಂದೆ ಕುಳಿತಿದ್ದ ಮಗಳು ಇಳಿದು ಹಳಿಗಳ ಮೇಲೆ ಓಡಿದ್ದಾಳೆ.

ಇದನ್ನು ಕಂಡ ತಂದೆ ಆಕೆಯನ್ನು ರಕ್ಷಿಸಲು ಓಡಿ ಹೋದಾಗ ರೈಲು ಹಿಂಬದಿಯಾಗಿ ಬಂದು ಇಬ್ಬರನ್ನೂ ಗುದ್ದಿಕೊಂಡು ಹೋಗಿದೆ. ಇದರಿಂದ ತಂದೆ- ಮಗಳು ಇಬ್ಬರೂ ಪ್ರಾಣ ಕಳೆದುಕೊಂಡಿದ್ದಾರೆ. ಮಗಳ ಮಾನಸಿಕವಾಗಿ ಅಸ್ವಸ್ಥೆಯಾಗಿದ್ದಳು ಎಂದು ತಾಯಿ ತಿಳಿಸಿದ್ದಾರೆ. ಈ ಬಗ್ಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಓದಿ: ರೈಲ್ವೆ ಹಳಿ ಪಕ್ಕ ಬಾಂಬ್​ ಸ್ಫೋಟ; ಬಾಲಕ ಸಾವು, ಇನ್ನಿಬ್ಬರಿಗೆ ಗಾಯ