ವಿದಿಶಾ (ಮಧ್ಯಪ್ರದೇಶ): ಬಾಲಕನೋರ್ವ ಸುಮಾರು 60 ಅಡಿ ಆಳದ ಬೋರ್ವೆಲ್ಗೆ ಬಿದ್ದಿದ್ದು 43 ಅಡಿ ಆಳದಲ್ಲಿ ಸಿಲುಕಿಕೊಂಡಿದ್ದಾನೆ. ಇಲ್ಲಿನ ವಿದಿಶಾ ಜಿಲ್ಲೆಯಲ್ಲಿ ಮಂಗಳವಾರ ಘಟನೆ ನಡೆದಿದೆ. 8 ವರ್ಷದ ಬಾಲಕ ಬೆಳಗ್ಗೆ 11 ಗಂಟೆ ಸುಮಾರಿಗೆ ಬೋರ್ವೆಲ್ಗೆ ಕಾಲು ಜಾರಿ ಬಿದ್ದಿದ್ದಾನೆ. ಸ್ಥಳದಲ್ಲಿ ಎಸ್ಡಿಆರ್ಎಫ್ ಮತ್ತು ಎನ್ಡಿಆರ್ಎಫ್ ತಂಡಗಳು ರಕ್ಷಣಾ ಕಾರ್ಯಾಚರಣೆಯಲ್ಲಿ ನಿರತವಾಗಿವೆ.
ಜಿಲ್ಲಾ ಸಹಾಯಕ ಪೊಲೀಸ್ ವರಿಷ್ಠಾಧಿಕಾರಿ ಸಮೀರ್ ಯಾದವ್ ಮಾತನಾಡಿ, "ಬಾಲಕ 60 ಅಡಿ ಆಳದ ಬೋರ್ವೆಲ್ಗೆ ಬಿದ್ದು 43 ಅಡಿ ಆಳದಲ್ಲಿ ಸಿಲುಕಿಕೊಂಡಿದ್ದಾನೆ. ಎಸ್ಡಿಆರ್ಎಫ್ನ ಮೂರು ತಂಡಗಳು ಮತ್ತು ಎನ್ಡಿಆರ್ಎಫ್ನ ಒಂದು ತಂಡ ಸ್ಥಳದಲ್ಲಿದ್ದು ರಕ್ಷಣೆ ಕಾರ್ಯ ಮುಂದುವರೆಸಿವೆ. ಬಾಲಕ ಬಿದ್ದಿರುವ ಬೋರ್ವೆಲ್ ಒಳಗೆ ನಿರಂತರ ಆಮ್ಲಜನಕವನ್ನು ಸರಬರಾಜು ಮಾಡಲಾಗುತ್ತಿದೆ. ಆದರೆ ಈವರೆಗೂ ಆತನೊಂದಿಗೆ ಮಾತನಾಡಲು ಮತ್ತು ಆಹಾರ ಸರಬರಾಜು ಮಾಡಲು ಸಾಧ್ಯವಾಗಿಲ್ಲ. ಚಲನವಲನ ಗೊತ್ತಾಗಿದ್ದು ಬಾಲಕ ಜೀವಂತವಾಗಿರುವುದು ಗೋಚರವಾಗುತ್ತಿದೆ. ತ್ವರಿತ ಕಾರ್ಯಾಚರಣೆ ಸಾಗಿದೆ. ಸಾಧ್ಯವಾದಷ್ಟು ಬೇಗ ಹೊರತೆಗೆಯಲು ಪ್ರಯತ್ನಿಸುತ್ತಿದ್ದೇವೆ" ಎಂದರು.
"ಈಗಾಗಲೇ ಬೋರ್ವೆಲ್ ಪಕ್ಕದಲ್ಲಿ ಜೆಸಿಬಿ ಸಹಾಯದಿಂದ 34 ಅಡಿ ಆಳ ಕೊರೆಯಲಾಗಿದೆ. ಬಾಲಕನನ್ನು ತಲುಪಲು 49 ಅಡಿ ಮಾತ್ರ ಅಗೆಯಬೇಕಿದೆ. ಈಗಾಗಲೇ 34 ಅಡಿ ಅಗೆಯಲಾಗಿದೆ. ಇನ್ನುಳಿದಂತೆ 15 ಅಡಿ ಅಗೆದು, ಶೀಘ್ರದಲ್ಲೇ ಮಗುವನ್ನು ರಕ್ಷಿಸಲಾಗುವುದು. ಬೋರ್ವೆಲ್ನೊಳಗೆ ನಿರಂತರ ಆಮ್ಲಜನಕ ಪೂರೈಸುತ್ತಿದ್ದೇವೆ. ವೆಬ್ಕ್ಯಾಮ್ಗಳನ್ನು ಅಳವಡಿಸಲಾಗಿದೆ" ಎಂದು ಎಸಿಪಿ ಮಾಹಿತಿ ನೀಡಿದರು.
ಕೊಳವೆ ಬಾವಿಗೆ ಬಿದ್ದ 5 ವರ್ಷದ ಮಗು: ಮಹಾರಾಷ್ಟ್ರದ ಅಹಮದ್ನಗರ ಜಿಲ್ಲೆಯ ಕರ್ಜತ್ ತಾಲೂಕಿನ ಕೋಪರ್ಡಿ ಗ್ರಾಮದಲ್ಲಿ ಸೋಮವಾರ ನಡೆದ ಘಟನೆಯಲ್ಲಿ ಬಾಲಕ ಬೋರ್ವೆಲ್ಗೆ ಬಿದ್ದು ಮೃತಪಟ್ಟಿದ್ದ. ಸಾಗರ್ ಬುಧ ಬರೇಲಾ (5) ಎಂಬ ಮಗು ಸಾವನ್ನಪ್ಪಿತ್ತು. ಜಮೀನಿನಲ್ಲಿದ್ದ ಬೋರ್ವೆಲ್ಗೆ ಸೋಮವಾರ ಸಂಜೆ 6 ಗಂಟೆ ಸುಮಾರಿಗೆ ಅಚಾನಕ್ಕಾಗಿ ಬಿದ್ದಿದ್ದಾನೆ. ವಿಷಯ ತಿಳಿದ ಕೂಡಲೇ ಸ್ಥಳಕ್ಕಾಗಮಿಸಿದ ರಕ್ಷಣಾ ತಂಡ ಜೆಸಿಬಿ ಸಹಾಯದಿಂದ ಬೋರ್ವೆಲ್ ಬಳಿ ಗುಂಡಿ ಅಗೆದು ರಕ್ಷಣಾ ಕಾರ್ಯ ನಡೆಸಿತ್ತು. ಆಮ್ಲಜನಕ ನೀಡಿ, ಉಸಿರಾಟಕ್ಕೆ ತೊಂದರೆಯಾಗದಂತೆ ನೋಡಿಕೊಳ್ಳಲಾಗಿತ್ತು. ಸತತ 8 ಗಂಟೆಗಳ ರಕ್ಷಣಾ ಕಾರ್ಯಾಚರಣೆ ನಡೆಸಿದರೂ ಯಾವುದೇ ಪ್ರಯೋಜನವಾಗದೇ ಬಾಲಕ ಕೊನೆಯುಸಿರೆಳೆದಿದ್ದ.
ಎನ್ಡಿಆರ್ಎಫ್ನ 5 ತಂಡಗಳು ರಕ್ಷಣಾ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದವು. ತಡರಾತ್ರಿ 2 ಗಂಟೆವರೆಗೂ ಶೋಧ ನಡೆಸಿದ್ದು, ಬಳಿಕ ಬಾಲಕನನ್ನು ಹೊರತೆಗೆಯಲಾಗಿತ್ತು. ಆದರೆ ಉಸಿರಾಟ ತೊಂದರೆಯಿಂದ ಬಾಲಕ ಅಸುನೀಗಿದ್ದಾನೆ. ಕೊಳವೆಬಾವಿ ಕೊರೆಸಿದ ನಂತರ ನೀರು ಬರಲಿಲ್ಲ ಎಂಬ ಕಾರಣಕ್ಕಾಗಿ ಪಾಳು ಬಿಡಲಾಗುತ್ತಿದೆ. ಈ ರೀತಿ ಮುಚ್ಚದ ಬಾವಿಗಳಲ್ಲಿ ಮಕ್ಕಳು ಬೀಳುತ್ತಿರುವ ಪ್ರಕರಣಗಳು ಹೆಚ್ಚಾಗಿವೆ. ಅಲ್ಲದೇ ಬಳಕೆಯಲ್ಲಿರದ ಬೋರ್ವೆಲ್ಗಳನ್ನು ಮುಚ್ಚಬೇಕು ಎಂದು ಎಷ್ಟೋ ಬಾರಿ ಆಯಾ ರಾಜ್ಯ ಸರ್ಕಾರಗಳು ಸೂಚಿಸಿದ್ದರೂ ಇಂತಹ ಪ್ರಕರಣಗಳು ಮಾತ್ರ ಕಡಿಮೆಯಾಗುತ್ತಿಲ್ಲ.
ಇದನ್ನೂ ಓದಿ: ಕೊಳವೆ ಬಾವಿಗೆ ಬಿದ್ದ 5 ವರ್ಷದ ಮಗು; ಫಲ ನೀಡದ 8 ಗಂಟೆಗಳ ಕಾರ್ಯಾಚರಣೆ