ಗ್ಯಾಂಗ್ಟಕ್(ಸಿಕ್ಕೀಂ): ಕಳೆದ ಕೆಲ ದಿನಗಳ ಹಿಂದಷ್ಟೇ ಟರ್ಕಿ ಮತ್ತು ಸಿರಿಯಾದಲ್ಲಿ ಸಂಭವಿಸಿದ ಭೂಕಂಪನವು ಜಗತ್ತನ್ನೇ ಬೆಚ್ಚಿ ಬೀಳಿಸಿದೆ. ಇದರ ಬೆನ್ನಲ್ಲೇ ಇದೀಗ ಈಶಾನ್ಯ ರಾಜ್ಯ ಸಿಕ್ಕೀಂನಲ್ಲಿ ಭೂಮಿ ಕಂಪಿಸಿದ ಅನುಭವವಾಗಿದೆ. ರಾಷ್ಟ್ರೀಯ ಭೂಕಂಪನ ಕೇಂದ್ರ ನೀಡಿದ ಮಾಹಿತಿ ಪ್ರಕಾರ, ಸಿಕ್ಕೀಂನ ಉತ್ತರಕ್ಕೆ 70 ಕಿಲೋ ಮೀಟರ್ ದೂರದಲ್ಲಿರುವ ಯುಕ್ಸೋಮ್‌ ಎಂಬಲ್ಲಿ ಇಂದು ಬೆಳಗಿನ ಜಾವ 4.15 ರ ಸುಮಾರಿಗೆ ಭೂಕಂಪನವಾಗಿದೆ. ರಿಕ್ಟರ್ ಮಾಪಕದಲ್ಲಿ ಭೂಕಂಪದ ತೀವ್ರತೆಯು 4.3 ರಷ್ಟು ದಾಖಲಾಗಿದೆ.
ಭೂಕಂಪನದ ಕೇಂದ್ರವು ಯುಕ್ಸೋಮ್‌ನಿಂದ 70 ಕಿ.ಮೀ ದೂರದಲ್ಲಿದೆ. ಭೂಮಿಯ ಒಳಭಾಗದಲ್ಲಿ 10 ಕಿಲೋಮೀಟರ್ ಆಳದಲ್ಲಿ ಭೂಮಿ ಕಂಪಿಸಿದೆ. ಘಟನೆಯಿಂದ ಸದ್ಯಕ್ಕೆ ಪ್ರಾಣ ಹಾನಿ ಮತ್ತು ಆಸ್ತಿ-ಪಾಸ್ತಿ ನಷ್ಟವಾಗಿರುವ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ.
ನೇಪಾಳದಲ್ಲಿ ಆಗಾಗ ಕಂಪಿಸುತ್ತಿರುವ ಭೂಮಿ: ಭಾರತದ ನೆರೆಯ ರಾಷ್ಟ್ರ ನೇಪಾಳದಲ್ಲಿ ಕಳೆದ ವರ್ಷ ಡಿಸೆಂಬರ್ 28, 2022 ರಂದು ಮಧ್ಯಾಹ್ನ 1 ಮತ್ತು 2 ಗಂಟೆಗೆ ಎರಡು ಭೂಕಂಪನಗಳು ಸಂಭವಿಸಿದವು. ಈ ವೇಳೆ ರಿಕ್ಟರ್ ಮಾಪಕದಲ್ಲಿ 4.7 ಮತ್ತು 5.3 ರಲ್ಲಿ ತೀವ್ರತೆ ದಾಖಲಾಗಿತ್ತು.
ಇದನ್ನೂ ಓದಿ: ದೆಹಲಿಯಲ್ಲಿ ಕಂಪಿಸಿದ ಭೂಮಿ: ನೇಪಾಳದಲ್ಲಿ ಕಂಪನದ ಕೇಂದ್ರ ಬಿಂದು
34,000ಕ್ಕೆ ಏರಿದೆ ಮೃತರ ಸಂಖ್ಯೆ: ಮತ್ತೊಂದೆಡೆ, ಟರ್ಕಿ ಮತ್ತು ವಾಯುವ್ಯ ಸಿರಿಯಾದಲ್ಲಿ ಸಂಭವಿಸರುವ ಭೂಕಂಪನದಲ್ಲಿ ಮೃತಪಟ್ಟವರ ಸಂಖ್ಯೆ 34,000 ಕ್ಕೆ ಏರಿದೆ. ಸ್ಥಳದಲ್ಲಿ ರಕ್ಷಣಾ ಕಾರ್ಯಚರಣೆ ನಡೆಯುತ್ತಿದೆ. ಭಾನುವಾರದ ಅಂಕಿ ಅಂಶಗಳ ಪ್ರಕಾರ, ಸಾವನ್ನಪ್ಪಿರುವವರ ಕನಿಷ್ಠ ಸಂಖ್ಯೆ 34,179 ತಲುಪಿದೆ. ಟರ್ಕಿಯಲ್ಲೇ 29,605 ಮಂದಿ ಮೃತಪಟ್ಟಿದ್ದಾರೆಂದು ಟರ್ಕಿಶ್ ತುರ್ತು ಸಮನ್ವಯ ಕೇಂದ್ರ SAKOM ತಿಳಿಸಿದೆ.
ಇದನ್ನೂ ಓದಿ: ಭೂಕಂಪಪೀಡಿತ ದೇಶದಲ್ಲಿ NDRF ರಕ್ಷಣಾ ಕಾರ್ಯ ಹೇಗಿದೆ? ಭಾರತಕ್ಕೆ ಟರ್ಕಿಯರ ಬಹುಪರಾಕ್!
ಇನ್ನು, ಕಳೆದ ತಿಂಗಳ ಜನವರಿ 29 ರಂದು ವಾಯುವ್ಯ ಇರಾನ್‌ನ ಖೋಯ್ ನಗರದಲ್ಲಿ ಭೂಕಂಪನ ಸಂಭವಿಸಿತ್ತು. ಈ ವೇಳೆ ಏಳು ಮಂದಿ ಸಾವನ್ನಪ್ಪಿದ್ದು, 400ಕ್ಕೂ ಹೆಚ್ಚು ಜನ ಗಾಯಗೊಂಡಿದ್ದರು. ಒಟ್ಟು 14 ಕಿ.ಮೀ ವ್ಯಾಪ್ತಿಯಲ್ಲಿ ಭೂಮಿ ನಡುಗಿದ ಅನುಭವವಾಗಿದೆ, ಭೂಕಂಪನದ ತೀವ್ರತೆ ರಿಕ್ಟರ್ ಮಾಪಕದಲ್ಲಿ 5.9 ದಾಖಲಾಗಿದೆ ಎಂದು ಯುನೈಟೆಡ್ ಸ್ಟೇಟ್ಸ್ ಜಿಯೋಲಾಜಿಕಲ್ ಸರ್ವೆ (ಯುಎಸ್‌ಜಿಎಸ್) ತಿಳಿಸಿತ್ತು.
ಇದನ್ನೂ ಓದಿ: ಸಿರಿಯಾ, ಟರ್ಕಿ ಭೂಕಂಪನ: ರಕ್ಷಣಾ, ವೈದ್ಯ ತಂಡದೊಂದಿಗೆ ತೆರಳಿದ ಭಾರತ
