ಚೆಂಡು ಹೂವಿನ ಬೆಳೆಗೆ ಹಾನಿ.. ಆಟೋದಲ್ಲಿ ಮೇಕೆಗಳನ್ನು ತುಂಬಿಕೊಂಡು ಠಾಣೆಗೆ ಆಗಮಿಸಿದ ರೈತ

ಕಾನ್ಪುರದಲ್ಲಿ ವಿಚಿತ್ರ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಚೆಂಡು ಹೂವಿನ ಬೆಳೆಯನ್ನು ಮೇಕೆಗಳು ತಿಂದು ಹಾಳುಮಾಡುತ್ತಿವೆ ಎಂದು ಕುಪಿತಗೊಂಡ ರೈತ, ಆಟೋದಲ್ಲಿ ಮೇಕೆಗಳನ್ನು ತುಂಬಿಕೊಂಡು ಪೊಲೀಸ್ ಠಾಣೆಗೆ ಆಗಮಿಸಿದ ಪ್ರಸಂಗ ಜರುಗಿದೆ.

ಕಾನ್ಪುರ (ಉತ್ತರ ಪ್ರದೇಶ) : ಕೆಲವೊಮ್ಮೆ ಸಾಕು ಪ್ರಾಣಿಗಳು ಬೆಳೆ ಹಾನಿ ಮಾಡಿದಾಗ ರೈತ ಮತ್ತು ಪ್ರಾಣಿಗಳ ಮಾಲೀಕರ ನಡುವೆ ವಾಗ್ವಾದ ನಡೆಯುವುದು ಸಾಮಾನ್ಯ. ಇದೀಗ ಕಾನ್ಪುರದ ಸಾಧ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಇಂತಹದ್ದೇ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ರೈತನೊಬ್ಬ ಆಟೋದಲ್ಲಿ ಹಲವು ಮೇಕೆಗಳನ್ನು ತುಂಬಿಕೊಂಡು ಠಾಣೆ ಮೆಟ್ಟಿಲೇರಿದ್ದಾರೆ.

ಹೌದು, ಚೆಂಡು ಹೂವಿನ ಬೆಳೆಯನ್ನು ಮೇಕೆಗಳು ತಿಂದು ಹಾಳು ಮಾಡಿದ್ದು, ಇದರಿಂದ ಮನನೊಂದ ರೈತ ಶೈಲೇಂದ್ರ ನಿಶಾದ್ ಎಂಬುವರು ಆಟೋದಲ್ಲಿ ಹಲವು ಮೇಕೆಗಳನ್ನು ತುಂಬಿಕೊಂಡು ಬಂದು ನ್ಯಾಯ ದೊರಕಿಸಿಕೊಡುವಂತೆ ಪೊಲೀಸ್ ಸಿಬ್ಬಂದಿಗೆ ಮನವಿ ಮಾಡಿದ್ದಾರೆ. ಜೊತೆಗೆ, ಮಾಲೀಕರ ವಿರುದ್ಧ ಪ್ರಕರಣ ದಾಖಲಿಸಬೇಕು ಎಂದು ಒತ್ತಾಯಿಸಿದ್ದಾರೆ. ಇದರಿಂದಾಗಿ ಪೊಲೀಸರೇ ಅಚ್ಚರಿಗೊಂಡಿದ್ದು, ಬಳಿಕ ಮೇಕೆಗಳ ಮಾಲೀಕರನ್ನು ಹಿಡಿದು ಬುದ್ಧಿ ಹೇಳಿದ್ದಾರೆ.

ಈ ಬಗ್ಗೆ ಮಾಹಿತಿ ನೀಡಿದ ಎಸ್‌ಎಸ್‌ಐ ಪ್ರಮೋದ್‌ ಕುಮಾರ್‌, ಭೀತರಗಾಂವ್‌ನ ಗೌರಿಕ್ಕರ ಗ್ರಾಮದಲ್ಲಿ ಘಟನೆ ನಡೆದಿದೆ. ಆಟೋದಲ್ಲಿ ಮೇಕೆಗಳನ್ನು ತುಂಬಿಕೊಂಡು ಠಾಣೆಗೆ ಆಗಮಿಸಿದ ರೈತರೊಬ್ಬರು ಅವುಗಳ ಮಾಲೀಕರ ವಿರುದ್ಧ ಪ್ರಕರಣ ದಾಖಲಿಸುವಂತೆ ಒತ್ತಾಯಿಸಿದರು. ಈ ಮೇಕೆಗಳು ಗದ್ದೆಯಲ್ಲಿ ಬೆಳೆದಿದ್ದ ಚೆಂಡು ಹೂವಿನ ಬೆಳೆ ಹಾನಿ ಮಾಡಿದ್ದು, ಬಹುತೇಕ ಗಿಡಗಳನ್ನು ತಿಂದು ಹಾಕಿವೆ ಎಂದು ಆರೋಪಿಸಿದರು. ಈ ಹಿನ್ನೆಲೆ ಪೊಲೀಸರು ಮೇಕೆಗಳ ಮಾಲೀಕನನ್ನು ಠಾಣೆಗೆ ಕರೆ ತಂದು ರೈತನ ಮುಂದೆ ಛೀಮಾರಿ ಹಾಕಿದಾಗ ರೈತನಿಗೂ ಸಮಾಧಾನವಾಯಿತು. ಬಳಿಕ ಮಾಲೀಕ ಮೇಕೆಗಳೊಂದಿಗೆ ಠಾಣೆಯಿಂದ ವಾಪಸಾದರು ಎಂದರು.

ರೈತ ಶೈಲೇಂದ್ರ ನಿಶಾದ್ ಅಲಿಯಾಸ್ ಛೋಟು ಮಾತನಾಡಿ, "ಗೌರಿಕ್ಕರ ಗ್ರಾಮದ ಹೊಲದಲ್ಲಿ ಚೆಂಡು ಹೂವಿನ ಬೆಳೆ ಬೆಳೆದಿದ್ದೇನೆ. ಕಳೆದ 10 ದಿನಗಳಿಂದ ನಿರಂತರವಾಗಿ ಮೇಕೆಗಳು ಬಂದು ಬೆಳೆ ಹಾನಿ ಮಾಡುತ್ತಿದ್ದು, ಮಂಗಳವಾರ ಸಂಜೆ ಮೇಕೆಗಳನ್ನು ಕಂಡಾಗ ಸಿಟ್ಟಿಗೆದ್ದು ಆಟೋದಲ್ಲಿ ತುಂಬಿಸಿಕೊಂಡು ಪೊಲೀಸ್ ಠಾಣೆ ತೆಗೆದುಕೊಂಡು ಹೋದೆ. ಮೇಕೆ ಮಾಲೀಕನ ವಿರುದ್ಧ ದೂರು ನೀಡಲು ತೆರಳಿದ್ದೆ. ಬಳಿಕ, ಪೊಲೀಸರು ಆ ಮಾಲೀಕನಿಗೆ ಛೀಮಾರಿ ಹಾಕಿ ಬಿಡುಗಡೆಗೊಳಿಸಿದರು" ಎಂದು ಹೇಳಿದರು.

ಇದನ್ನೂ ಓದಿ : ಪೊಲೀಸ್ ಠಾಣೆ ಮೆಟ್ಟಿಲೇರಿದ ವಿಚಿತ್ರ ಪ್ರಕರಣ : ಮೇಕೆ ಮೇಲೆ ಇಬ್ಬರು ಒಡೆತನದ ಆರೋಪ, ಪೊಲೀಸರಿಂದ ತನಿಖೆ ಶುರು

ಹಳೆಯ ಪ್ರಕರಣ.. ಇಲಿ ವಿಚಾರಕ್ಕೆ ಅಪಾರ್ಟ್ಮೆಂಟ್ ನಿವಾಸಿಗಳು ಜಟಾಪಟಿಗಿಳಿದು ಕೊನೆಗೆ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದ ಘಟನೆ ಜೂನ್​ 23 ರಂದು ನಡೆದಿತ್ತು. ಕಾರಿನ ವಯರ್​ಗಳನ್ನು ಇಲಿಗಳು ಕಚ್ಚಿವೆ ಎಂದು ಕಾರು ಮಾಲೀಕ ಲಕ್ಷ - ಲಕ್ಷ ಪರಿಹಾರಕ್ಕೆ ಬೇಡಿಕೆ ಇಟ್ಟು ರಂಪಾಟ ನಡೆಸಿದ್ದ. ಪರಿಹಾರ ಕೊಡದಿದ್ದಕ್ಕೆ ಅಪಾರ್ಟ್ಮೆಂಟ್ ಅಸೋಸಿಯೇಷನ್‌ ಅಧ್ಯಕ್ಷರಿಗೆ ಬೆದರಿಕೆ ಹಾಕಿದ ಹಿನ್ನೆಲೆ ಬೇಸತ್ತು ಅಪಾರ್ಟ್ಮೆಂಟ್‌ ನಿವಾಸಿಗಳು ಪೊಲೀಸ್ ಠಾಣೆಯಲ್ಲಿ ಎಫ್​ಐಆರ್​ ದಾಖಲಿಸಿದ್ದರು. ಬೆಂಗಳೂರಿನ ಗಂಗಾನಗರದ ಕಂಫರ್ಟ್‌ ಎನ್​ಕ್ಲೇವ್‌ ಅಪಾರ್ಟ್ಮೆಂಟ್‌ನಲ್ಲಿ ಈ ಘಟನೆ ನಡೆದಿತ್ತು.

ಇದನ್ನೂ ಓದಿ : ಬೆಂಗಳೂರಲ್ಲಿ ಇಲಿ ವಿಚಾರಕ್ಕೆ ಜಟಾಪಟಿ.. ಠಾಣೆ ಮೆಟ್ಟಿಲೇರಿದ ಅಪಾರ್ಟ್ಮೆಂಟ್ ನಿವಾಸಿಗಳು !