ಚೆನ್ನೈ: ತನ್ನ ಅಪ್ರಾಪ್ತ ಸೋದರಳಿಯನಿಗೆ ಕಾಲೇಜು ಬಸ್ ಚಾಲನೆ ಮಾಡಲು ಅವಕಾಶ ಮಾಡಿಕೊಟ್ಟ ಚಾಲಕನನ್ನು ಕೆಲಸದಿಂದ ವಜಾಗೊಳಿಸಿ ಖಾಸಗಿ ಕಾಲೇಜು ಕಠಿಣ ಕ್ರಮ ತೆಗೆದುಕೊಂಡಿದೆ. ಪ್ರಕರಣ ಸಂಬಂಧ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಬಾಲಕ ಖಾಸಗಿ ಕಾಲೇಜು ಬಸ್ ಚಲಾಯಿಸುತ್ತಿರುವ ವಿಡಿಯೋ ವೈರಲ್ ಆಗಿತ್ತು.
ಪ್ರಕರಣ ಸಂಬಂಧ ಪೊಲೀಸರಿಗೆ ಮಾಹಿತಿ ನೀಡಿರುವ ಕಾಲೇಜು ಆಡಳಿತ ಮಂಡಳಿ, ಕಾಲೇಜು ವಿದ್ಯಾರ್ಥಿಗಳನ್ನು ಡ್ರಾಪ್ ಮಾಡಿದ ಬಳಿಕ ಚಾಲಕ ಮನೆಗೆ ಬಸ್ ಕೊಂಡೊಯ್ಯುವಾಗ ಬಸ್ ಚಾಲನೆಗೆ ತನ್ನ ಅಪ್ರಾಪ್ತ ಸೋದರಳಿಯನಿಗೆ ಅವಕಾಶ ನೀಡಿದ್ದಾನೆ. ಅಲ್ಲದೇ, ಆತ ಬಸ್ ಚಲಾಯಿಸುವುದನ್ನು ವಿಡಿಯೋ ಮಾಡಿದ್ದಾನೆ.
ಈ ಘಟನೆ ನಡೆದು ತಿಂಗಳಾಗಿದೆ. ಆದರೆ, ಇತ್ತೀಚೆಗೆ ಬಾಲಕ ಈ ವಿಡಿಯೋವನ್ನು ತನ್ನ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು ವೈರಲ್ ಆಗಿತ್ತು.
ಇದನ್ನು ಕಂಡ ಕಾಲೇಜು ಆಡಳಿತ ಸಿಬ್ಬಂದಿ ತಕ್ಷಣ ಚಾಲಕನನ್ನು ಕೆಲಸದಿಂದ ತೆಗೆದು ಹಾಕಿದೆ. ಚಾಲಕನ ನಿರ್ಲಕ್ಷ್ಯ ಆರೋಪದಡಿ ಪ್ರಕರಣ ದಾಖಲಿಸಿರುವ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
ಇದನ್ನೂ ಓದಿ: ರ್‍ಯಾಗಿಂಗ್‌ನಿಂದ ಪಾರಾಗಲು ಕಟ್ಟಡದಿಂದ ಜಿಗಿದ ವಿದ್ಯಾರ್ಥಿ: ಸ್ಥಿತಿ ಗಂಭೀರ
