ಲಾಕ್​ಡೌನ್​ ಪಾಸಿಟಿವ್ ಎಫೆಕ್ಟ್​; ಶುಭ್ರ ಆಕಾಶ - ಮಾಲಿನ್ಯ ಇಳಿಕೆ

ಲಾಕ್​ಡೌನ್​ನಿಂದ ಕೆಲ ಒಳ್ಳೆಯ ಪರಿಣಾಮಗಳೂ ಆಗಿವೆ. ಅದರಲ್ಲಿ ಮುಖ್ಯವಾದದು ವಾಯುಮಾಲಿನ್ಯ ಕಡಿಮೆಯಾಗಿರುವುದು. ದೇಶದ ಎಲ್ಲ ಮಹಾನಗರಗಳ ಪರಿಸರದಲ್ಲಿ ಗಮನಾರ್ಹ ಬದಲಾವಣೆ ಕಂಡು ಬಂದಿರುವುದು ಲಾಕ್​ಡೌನ್​ನ ಪಾಸಿಟಿವ್​ ಎಫೆಕ್ಟ್​ ಎನ್ನಬಹುದು.

ಲಾಕ್​ಡೌನ್​ನಿಂದಾಗಿ ಬರೀ ಸಮಸ್ಯೆಗಳೇ ಸೃಷ್ಟಿಯಾಗಿವೆ ಎಂದು ಕೊಂಡಿದ್ದರೆ ನಿಮ್ಮ ಗ್ರಹಿಕೆ ತಪ್ಪು. ಅದರಿಂದ ಅನೇಕ ಉತ್ತಮ ಪರಿಣಾಮಗಳೂ ಉಂಟಾಗಿವೆ ಎಂಬುದು ಸತ್ಯ.

ಲಾಕ್​ಡೌನ್​ನಿಂದಾಗಿ ದೇಶದ ಬಹುತೇಕ ಮಹಾನಗರಗಳಲ್ಲಿನ ಮಾಲಿನ್ಯದ ಮಟ್ಟ ಗಣನೀಯ ಇಳಿಕೆಯಾಗಿದ್ದು, ಈಗ ಅಲ್ಲೆಲ್ಲ ಆಕಾಶ ಶುಭ್ರವಾಗಿ ಕಾಣುತ್ತಿದೆ. ಲಕ್ಷಾಂತರ ವಾಹನಗಳ ಸಂಚಾರ ನಿಂತಿದ್ದರಿಂದ ಮಹಾನಗರಗಳ ಪರಿಸರ ಒಂದು ರೀತಿಯ ಹಿತಾನುಭವ ನೀಡುತ್ತಿದೆ.

'21 ದಿನಗಳ ಲಾಕ್​ಡೌನ್​ ಮುಂದುವರೆದಂತೆ ಮಹಾನಗರಗಳ ಮಾಲಿನ್ಯ ಮಟ್ಟ ಇನ್ನೂ ಕಡಿಮೆಯಾಗಲಿದೆ. ಗಾಳಿಯನ್ನು ಪ್ರದೂಷಿತಗೊಳಿಸುವ ಹಾಗೂ ಬಿಸಿ ಅನಿಲಗಳ ಬಿಡುಗಡೆ ಬಹಳಷ್ಟು ಕಡಿಮೆಯಾಗಿದೆ. ಮುಂಬೈನ ಮಾಲಿನ್ಯ ಮಟ್ಟ ಏರ್ ಕ್ವಾಲಿಟಿ ಇಂಡೆಕ್ಸ್​ ಮಾಪನದ ಪ್ರಕಾರ ಈಗ 95 ರಷ್ಟಿದೆ. ಸಾಮಾನ್ಯ ದಿನಗಳಲ್ಲಿ ಇದು 76 ರಷ್ಟು ಇರುತ್ತಿತ್ತು. ಹೊಗೆ ಮಿಶ್ರಿತ ಗಾಳಿ 'ಸ್ಮಾಗ್​' ಸಂಪೂರ್ಣ ಮಾಯವಾಗಿದ್ದು, ಈಗ ಸಹಜವಾಗಿ ಉಸಿರಾಡಬಹುದಾಗಿದೆ ಎಂದು ಜನ ಹೇಳುತ್ತಿದ್ದಾರೆ.' ಎಂದು ಭಾರತೀಯ ಹವಾಮಾನ ಇಲಾಖೆ ಪ್ರಾದೇಶಿಕ ಕೇಂದ್ರದ ಮುಖ್ಯಸ್ಥ ಕುಲದೀಪ ಶ್ರೀವಾಸ್ತವ ಹೇಳಿದ್ದಾರೆ.