ನವದೆಹಲಿ: ವಸೂಲಾಗದ ಸಾಲ (ಎನ್ಪಿಎ) ನಿರ್ವಹಣೆ ಕುರಿತು ಭಾರತೀಯ ರಿಸರ್ವ್ ಬ್ಯಾಂಕ್ ಪರಿಷ್ಕೃತ ಸುತ್ತೋಲೆಯನ್ನು ಹೊರಡಿಸಿದೆ.
ಆರ್ಬಿಐನ ಈ ಹಿಂದಿನ ಸುತ್ತೋಲೆಯನ್ನು ಸುಪ್ರೀಂಕೋರ್ಟ್ ರದ್ದುಗೊಳಿಸಿದ ಎರಡು ತಿಂಗಳ ನಂತರ ನೂತನ ಸುತ್ತೋಲೆ ಪ್ರಕಟಿಸಿದೆ.
ಎನ್ಪಿಎ ಬಿಕ್ಕಟ್ಟು ಪರಿಹಾರಕ್ಕೆ ಆರ್ಬಿಐ ಹೊರಡಿಸಿದ್ದ ಸುತ್ತೋಲೆ ಈ ಹಿಂದೆ ಪ್ರಬಲ ಅಸ್ತ್ರವಾಗಿತ್ತು. ದೊಡ್ಡ ಕಂಪನಿಗಳು ಸಾಲ ಮರುಪಾವತಿ ಮಾಡುವಲ್ಲಿ ಒಂದೇ ಒಂದು ದಿನ ವಿಳಂಬ ಮಾಡಿದರೂ ಅಂಥ ಸಾಲ ಖಾತೆಗಳನ್ನು ಸುಸ್ತಿ ಸಾಲ ಎಂದು ವರ್ಗೀಕರಿಸಿ ಹಾಗೂ ದಿವಾಳಿ ಸಂಹಿತೆಯಡಿ ಕ್ರಮಕೈಗೊಳ್ಳಲು ಬ್ಯಾಂಕ್ಗಳಿಗೆ ಆರ್ಬಿಐ ಅವಕಾಶ ನೀಡಿತ್ತು.
ಸದ್ಯದ ಪರಿಷ್ಕೃತ ಸುತ್ತೋಲೆಯಡಿ ಇದನ್ನು ವಾಪಸ್‌ ಪಡೆದಿರುವ ಆರ್ಬಿಐ ಒಂದು ದಿನದ ಗಡವನ್ನು 30 ದಿನಕ್ಕೆ ವಿಸ್ತರಿಸಿದೆ. ಹೆಚ್ಚುವರಿಯಾಗಿ 29 ದಿನಗಳ ಸಮಯ ನಿಗದಿಗೊಳಿಸಿದೆ.
ಎನ್ಪಿಎ ಕುರಿತು ಆರ್ಬಿಐ ಫೆಬ್ರವರಿ 12ರಂದು ಹೊರಡಿಸಿದ್ದ ಸುತ್ತೋಲೆಯನ್ನು ಸುಪ್ರೀಂಕೋರ್ಟ್ ಏಪ್ರಿಲ್ 2ರಂದು ವಜಾಗೊಳಿಸಿತ್ತು. ₹ 2,000 ಕೋಟಿಗೂ ಅಧಿಕ ಮೊತ್ತದ ಎನ್ಪಿಎಗಳನ್ನು ಬ್ಯಾಂಕ್ಗಳು 180 ದಿನಗಳಲ್ಲಿ ನಿರ್ವಹಿಸಬೇಕಿದೆ.
