ಮುಂಬೈ: ತಮಿಳು ಚಿತ್ರರಂಗದ ಸೂಪರ್ಸ್ಟಾರ್ ರಜನಿಕಾಂತ್ ರಾಜಕೀಯ ಪಕ್ಷವೊಂದನ್ನು ಸ್ಥಾಪಿಸಲು ನಿರ್ಧರಿಸಿದ್ದು, ಅವರ ಅಭಿಮಾನಿಗಳು ಸಂತೋಷ ವ್ಯಕ್ತಪಡಿಸಿದ್ದಾರೆ.
2017 ರಲ್ಲೇ ರಾಜಕೀಯ ಪಕ್ಷವನ್ನು ಕಟ್ಟುವ ಆಸೆಯನ್ನು ರಜಿನಿಕಾಂತ್ ವ್ಯಕ್ತಪಡಿಸಿದ್ದು, ಈ ವರ್ಷದ ಮೇ ಅಥವಾ ಜೂನ್ ತಿಂಗಳಲ್ಲಿ ರಜನಿಕಾಂತ್ ರಾಜಕೀಯ ಪಕ್ಷವೊಂದನ್ನು ಸ್ಥಾಪಿಸಲಿದ್ದಾರೆ ಎಂದು ಅವರ ಆಪ್ತರಲ್ಲಿ ಒಬ್ಬರಾದ ಕರಾಟೆ ತ್ಯಾಗರಾಜನ್ ಸೋಮವಾರ ಮಾಹಿತಿ ನೀಡಿದ್ದಾರೆ.
ಬಾಲ್ಯದಿಂದಲೇ ರಜನಿಕಾಂತ್ ಫೋಟೊಗಳನ್ನು ಸಂಗ್ರಹಿಸಿ ತಮ್ಮ ಮನೆಯಲ್ಲಿ ಫ್ರೇಮ್ ಹಾಕಿಸಿಟ್ಟುಕೊಂಡಿರುವ ಡೈ-ಹಾರ್ಡ್ ಫ್ಯಾನ್ ಒಬ್ಬರು, ತಮ್ಮ ನೆಚ್ಚಿನ ನಟನ ಈ ನಿರ್ಧಾರಕ್ಕೆ ಪೂರ್ಣ ಪ್ರಮಾಣದಲ್ಲಿ ಬೆಂಬಲ ಸೂಚಿಸುವುದಾಗಿ ತಿಳಿಸಿದ್ದಾರೆ. ನಾವು ರಜನಿ ಅವರ ಮಾತನ್ನು ಮಾತ್ರ ನಂಬುತ್ತೇವೆ. ರಜನಿಕಾಂತ್ ಏನಾದರೂ ಏಪ್ರಿಲ್ 14 ಕ್ಕೆ ಪಕ್ಷವನ್ನ ಸ್ಥಾಪಿಸಿದರೆ, ಆ ದಿನ ನಮಗೆ ಡಬಲ್ ಖುಷಿ ಎಂದು ಹೇಳಿದ್ದಾರೆ.
ಏಪ್ರಿಲ್ 14, ತಮಿಳುನಾಡಿನ ಜನತೆಗೆ ಹೊಸ ವರ್ಷವಾಗಿದ್ದು, ತಮಿಳು ಕ್ಯಾಲೆಂಡರ್ನಲ್ಲಿ ಇದು ವರ್ಷದ ಮೊದಲ ದಿನವಾಗಿದೆ. ಈ ದಿನವನ್ನ ಸಾಂಪ್ರದಾಯಿಕ ಹಬ್ಬವನ್ನಾಗಿ ಆಚರಿಸಲಾಗುತ್ತದೆ.
