ಇಟಾ(ಉತ್ತರ ಪ್ರದೇಶ): ಸಹೋದರರ ಮಕ್ಕಳಾದ ಇಬ್ಬರು ಅಪ್ರಾಪ್ತರ ಕೊಲೆಗೈದು, ಮೂರನೇಯದಾಗಿ ತನ್ನ ಅಣ್ಣನನ್ನೇ ಕೊಡಲಿಯಿಂದ ಕೊಲ್ಲಲು ಸಂಚು ರೂಪಿಸಿದ ಆರೋಪದಲ್ಲಿ 30 ವರ್ಷ ವಯಸ್ಸಿನ ಸೈಕೋ ಕಿಲ್ಲರ್ ಅನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.
ಇಟಾ ಜಿಲ್ಲೆಯ ಧರ್ಮಪುರ್ ಗ್ರಾಮದ ರಾಧೆಶ್ಯಾಮ್ ಬಂಧಿತ ಸೈಕೋ ಕಿಲ್ಲರ್ ಆಗಿದ್ದು, ಫೆಬ್ರವರಿ 6ರಂದು ತನ್ನ ಸಹೋದರನ ಮಗನಾದ ಸತ್ಯೇಂದ್ರ (6) ಹಾಗೂ ಜೂನ್ 9ರಂದು ಮತ್ತೊಬ್ಬ ಸಹೋದರನ ಮಗನಾದ ಪ್ರಶಾಂತ್ (9) ಅನ್ನು ಕೊಂದಿದ್ದ ಎಂದು ಆರೋಪ ಕೇಳಿಬಂದಿದೆ.
ಜೊತೆಗೆ ಜೂನ್ 11ರ ರಾತ್ರಿ ತನ್ನ ಅಣ್ಣನಾದ ವಿಶ್ವನಾಥ್ ಸಿಂಗ್ ನಿದ್ರೆ ಮಾಡುತ್ತಿರಬೇಕಾದರೆ ಕೊಡಲಿಯಿಂದ ಕೊಚ್ಚಿ ಕೊಲೆ ಮಾಡಲು ಯತ್ನಿಸಿದ್ದಾಗ ಸಂಬಂಧಿಗಳು ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ ಎಂದು ಸಕ್ರೌಲಿ ಸ್ಟೇಷನ್ ಹೌಸ್ ಆಫೀಸರ್ ಕೃತ್ಪಾಲ್ ಸಿಂಗ್ ಸ್ಪಷ್ಟಪಡಿಸಿದ್ದಾರೆ.
'ಕೊಲೆ ಮಾಡುವುದು ಇಷ್ಟ'!
ಪೊಲೀಸ್ ಠಾಣೆಯಲ್ಲಿ ಸೈಕೋ ಕಿಲ್ಲರ್ನನ್ನು ವಿಚಾರಣೆಗೆ ಒಳಪಡಿಸಿದಾಗ ತನಗೆ ಕೊಲೆ ಮಾಡುವುದು ಇಷ್ಟದ ಕೆಲಸ ಎಂದು ಉತ್ತರಿಸಿದ್ದಾನೆ. ಜೊತೆಗೆ ತಾನೇ ತನ್ನ ಸಹೋದರರ ಮಕ್ಕಳನ್ನು ಕೊಂದಿರುವುದಾಗಿ ಒಪ್ಪಿಕೊಂಡಿದ್ದು, ಇನ್ನೂ ಮೂವರ ಕೊಲೆಗೆ ಸಂಚು ರೂಪಿಸಿದ್ದನ್ನು ಬಹಿರಂಗಪಡಿಸಿದ್ದಾನೆ ಎಂದು ಇಟಾದ ಎಸ್ಪಿ ಸುನೀಲ್ ಕುಮಾರ್ ಸಿಂಗ್ ಹೇಳಿದ್ದಾರೆ.
ಈ ಮೊದಲು ಅಪ್ರಾಪ್ತ ಬಾಲಕ ಸತ್ಯೇಂದ್ರನನ್ನು ಕೊಂದ ಆರೋಪದಲ್ಲಿ ಮಹಿಳೆ ಸೇರಿ ಮೂವರನ್ನು ವಶಕ್ಕೆ ಪಡೆಯಲಾಗಿತ್ತು. ಪ್ರಶಾಂತ್ ಕೊಲೆ ಪ್ರಕರಣದಲ್ಲಿ ಮೂವರ ಮೇಲೆ ಕೇಸ್ ದಾಖಲಾಗಿದೆ. ಈಗ ಅವರೆಲ್ಲರನ್ನೂ ಬಿಡುಗಡೆ ಮಾಡಿ ರಾಧೆಶ್ಯಾಮ್ ಮೇಲೆ ಎಫ್ಐಆರ್ ದಾಖಲಿಸಿಕೊಳ್ಳಲಾಗಿದೆ.
