ಜೈಪುರ: ನೀವು ಕಾರ್ಪೊರೇಟ್ ವಲಯದ ಭಾಗವಾಗಿದ್ದು, ನಿಮ್ಮ ಕಂಪನಿಗೆ ವಿವಿಧ ಪ್ರಮುಖ ಮಾಹಿತಿ, ಸರಕುಪಟ್ಟಿ ಅಥವಾ ಬಿಲ್‌ಗಳನ್ನು ಇ-ಮೇಲ್ ಮೂಲಕ ಕಳುಹಿಸಿದ್ದರೆ ಈ ಸುದ್ದಿಯನ್ನು ನೀವು ಓದಲೇಬೇಕು. ತುಂಬಾ ಉಪಯುಕ್ತ ಮಾಹಿತಿ ಇಲ್ಲಿದೆ ಓದಿ...
ದಿನಕ್ಕೊಂದು ತಂತ್ರಗಳನ್ನು ಬಳಸಿ ಸೈಬರ್ ಅಪರಾಧಿಗಳು ಹಲವು ಜನರು ಹಾಗೂ ಕಂಪನಿಗಳನ್ನು ಬೆತ್ತಲಾಗಿಸುತ್ತಾರೆ. ಕಾರ್ಪೊರೇಟ್ ಸಂಸ್ಥೆಗಳನ್ನೇ ಗುರಿಯಾಗಿಸಲು ಸೈಬರ್ ಹ್ಯಾಕರ್ಗಳು ಈಗ ಇ-ಮೇಲ್ ಫಾರ್ವರ್ಡರ್ ಅನ್ನೋ ಹ್ಯಾಕಿಂಗ್ ವಿಧಾನವನ್ನು ಅನುಸರಿಸುತ್ತಿದ್ದಾರೆ. ಅದು ಹೇಗೆ? ಹ್ಯಾಕರ್ಗಳ ತಂತ್ರ ಏನು ಅನ್ನೋದನ್ನು ಈ ಸ್ಟೋರಿಯಲ್ಲಿ ನೋಡಿ.
ಬೆಳಕಿಗೆ ಬಂದ ಪ್ರಕರಣ:
ಇತ್ತೀಚೆಗೆ, ಇ-ಮೇಲ್ ಫಾರ್ವರ್ಡರ್ ಮೂಲಕ ಹ್ಯಾಕರ್ಗಳು ಪ್ರಸಿದ್ಧ ಕಂಪನಿಯೊಂದರ ಇ-ಮೇಲ್ ಖಾತೆಯನ್ನು ಹ್ಯಾಕ್ ಮಾಡಿದ್ದಾರೆ. ಕಂಪನಿಯು, ಬ್ಯಾಂಕ್ ಖಾತೆಗಳ ಮಾಹಿತಿಯೊಂದಿಗೆ ವಿದೇಶದಲ್ಲಿರುವ ಕ್ಲೈಂಟ್‌ಗೆ 38 ಲಕ್ಷ ರೂಪಾಯಿಗಳ ಬಿಲ್ ಒಂದನ್ನು ಕಳುಹಿಸಲಾಗಿತ್ತು. ಕಂಪನಿಯ ಇ-ಮೇಲ್ ಅನ್ನು ಕ್ಲೈಂಟ್‌ಗೆ ಮೇಲ್ ಮಾಡಿದ ಸ್ವಲ್ಪ ಸಮಯದಲ್ಲೇ ಹ್ಯಾಕರ್ಗಳು ಅದನ್ನು ಹ್ಯಾಕ್ ಮಾಡಿದ್ದಾರೆ. ಕ್ಲೈಂಟ್‌ಗೆ ಎರಡನೇ ಮೇಲ್ ಕಳಿಸಿದ ಹ್ಯಾಕರ್ಗಳು ಹೊಸ ಬಿಲ್ ಕಳುಹಿಸಿದ್ದಾರೆ. ಹ್ಯಾಕರ್ ಕಳುಹಿಸಿದ ಹೊಸ ಮೇಲ್ನಲ್ಲಿ, ತಮ್ಮದೇ ಬ್ಯಾಂಕ್ ಖಾತೆಯನ್ನು ಸೇರಿಸಿದ್ದಾರೆ. ಅಷ್ಟೇ ಅಲ್ಲ, ಆ ಮೊದಲು ಕಂಪನಿ ಕಳಿಸಿದ್ದ ಮೊದಲ ಖಾತೆಗೆ ಬದಲಾಗಿ ಎರಡನೇ ಇನ್‌ವಾಯ್ಸ್‌ನಲ್ಲಿ ಕಳುಹಿಸಿದ ಬ್ಯಾಂಕ್ ಖಾತೆಗೆ ಹಣ ಪಾವತಿ ಮಾಡುವಂತೆ ಕೇಳಿದ್ದಾರೆ. ಅದೃಷ್ಟವಶಾತ್ ವಿದೇಶದಲ್ಲಿದ್ದ ಕ್ಲೈಂಟ್, ಬ್ಯಾಂಕ್ ಖಾತೆಗೆ ಹಣ ಪಾವತಿ ಮಾಡುವುದಕ್ಕೂ ಮುನ್ನ ಕಂಪನಿಯ ಅಧಿಕಾರಿಗಳನ್ನು ಸಂಪರ್ಕಿಸಿ ಹೊಸ ಬಿಲ್ ಮತ್ತು ಬ್ಯಾಂಕ್ ಖಾತೆಯ ಬಗ್ಗೆ ವಿಚಾರಿಸಿದ್ದಾನೆ. ಈ ಸಮಯದಲ್ಲಿ ಇ-ಮೇಲ್ ಹ್ಯಾಕ್ ಆಗಿರುವುದರ ಬಗ್ಗೆ ಗೊತ್ತಾಗಿದೆ. ಸರಿಯಾದ ಸಮಯದಲ್ಲಿ ಸರಿಯಾದ ಹೆಜ್ಜೆ ಇಟ್ಟ ಕಾರಣದಿಂದಾಗಿ, ಖಾತೆ ಹ್ಯಾಕ್ ಆಗಿದೆ ಎಂದು ತಿಳಿಯಲು ಸಾಧ್ಯವಾಯಿತು.
ಸೈಬರ್ ಹ್ಯಾಕರ್ಗಳ ಕೈಯಲ್ಲಿ ಸಿಕ್ಕಿಹಾಕಿಕೊಳ್ಳದಂತೆ ಕಾರ್ಪೊರೇಟ್ ವಲಯದ ಎಲ್ಲಾ ಕಂಪನಿಗಳು, ಇ-ಮೇಲ್ ಸುರಕ್ಷತೆಯ ಬಗ್ಗೆ ವಿಶೇಷ ಗಮನ ಹರಿಸಬೇಕು ಎಂದು ಸೈಬರ್ ಸೆಕ್ಯುರಿಟಿ ತಜ್ಞ ಸಚಿನ್ ಶರ್ಮಾ ಹೇಳುತ್ತಾರೆ. ಇ-ಮೇಲ್ನ ಸೆಕ್ಯೂರಿಟಿ ಸೆಟ್ಟಿಂಗ್ನಲ್ಲಿ ಹಲವು ಭದ್ರತೆ ಸಂಬಂಧವಾಗಿ ಇರುವ ಆಯ್ಕೆಗಳನ್ನು ನಿಷ್ಕ್ರಿಯಗೊಳಿಸಬಾರದು. ಜೊತೆಗೆ ನಕಲು ಅಥವಾ ಹ್ಯಾಕ್ ಆಗಬಲ್ಲ ಆ್ಯಂಟಿವೈರಸ್ಅನ್ನು ಕಂಪ್ಯೂಟಗೆ ಇನ್ಸ್ಟಾಲ್ ಮಾಡಬಾರದು ಎಂದು ಸಚಿನ್ ಶರ್ಮಾ ತಿಳಿಸಿದ್ದಾರೆ.
