ನವದೆಹಲಿ: 2021ರ ಮೊದಲಾರ್ಧದಲ್ಲಿ ಚಂದ್ರಯಾನ-3 ಉಡಾವಣೆ ಆಗಬಹುದು ಎಂದು ಕೇಂದ್ರ ಸಚಿವ ಜಿತೇಂದ್ರ ಸಿಂಗ್ ತಿಳಿಸಿದ್ರು.
ಲೋಕಸಭೆಯಲ್ಲಿ ಪ್ರಶ್ನೆಯೊಂದಕ್ಕೆ ಲಿಖಿತವಾಗಿ ಉತ್ತರಿಸಿರುವ ಅವರು, ಮೈಕ್ರೊಗ್ರ್ಯಾವಿಟಿಗೆ ಸಂಬಂಧಿಸಿದ ನಾಲ್ಕು ಜೈವಿಕ ಮತ್ತು ಎರಡು ಭೌತಿಕ ವಿಜ್ಞಾನ ಪ್ರಯೋಗಗಳನ್ನು ಗಗನಯಾನ ಯೋಜನೆಯ ಸಮಯದಲ್ಲಿ ನಡೆಸಲಾಗುವುದು ಎಂದರು.
ತಾತ್ಕಾಲಿಕವಾಗಿ ಚಂದ್ರಯಾನ-3, ಮುಂದಿನ ವರ್ಷದ ಮೊದಲಾರ್ಧಕ್ಕೆ ಉಡಾವಣೆಯ ನಿರ್ಧಾರ ಮಾಡಲಾಗಿದೆ. ಚಂದ್ರಯಾನ-2 ರಿಂದ ಕಲಿತ ಪಾಠಗಳಿಂದ ಚಂದ್ರಯಾನ-3 ಸಿದ್ಧಪಡಿಸಲಾಗಿದೆ ಎಂದು ಹೇಳಿದರು.
ಚಂದ್ರಯಾನ-2 ಕಳೆದ ವರ್ಷ ಚಂದ್ರನ ಮೇಲ್ಮೈನಲ್ಲಿ ಸಾಫ್ಟ್ ಲ್ಯಾಂಡಿಂಗ್ ಮಾಡದ ಕಾರಣ ವಿಫಲವಾಗಿತ್ತು. ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಈ ಯೋಜನೆಯನ್ನು ಮತ್ತೆ ಪ್ರಾರಂಭಿಸಲು ನಿರ್ಧರಿಸಿತು. ಈ ವರ್ಷದಂತ್ಯದ ವೇಳೆಗೆ ಯೋಜನೆಯನ್ನು ಪ್ರಾರಂಭಿಸುವ ಸಾಧ್ಯತೆಯಿದೆ ಎಂದು ಹೇಳಿದೆ.
ಇದೇ ವೇಳೆ, ಗಗನಯಾನ ಯೋಜನೆಯ ಪ್ರಗತಿ ವಿವರಿಸಿದ ಸಿಂಗ್, ನಾಲ್ಕು ಗಗನಯಾತ್ರಿಗಳಿಗೆ ಬಾಹ್ಯಾಕಾಶ ಹಾರಾಟದ ತರಭೇತಿ ಪ್ರಾರಂಭಿಸಲಾಗಿದೆ ಎಂದು ಮಾಹಿತಿ ನೀಡಿದರು.
