ಪ್ಲಾಸ್ಟಿಕ್​ ಬಾಟಲ್​​ನಿಂದ ಸುಂದರ ಉದ್ಯಾನವನ... ಹೇಗಿದೆ ಗೊತ್ತಾ ಅರಣ್ಯಾಧಿಕಾರಿಯ ಗಾರ್ಡನ್?

ಪಶ್ಚಿಮ ಬಂಗಾಳದ ಅರಣ್ಯಾಧಿಕಾರಿಯೊಬ್ಬರು ಪ್ಲಾಸ್ಟಿಕ್​ ಬಾಟಲ್​ ಹಾಗೂ ರಬ್ಬರ್​ ಟೈರ್​ಗಳನ್ನು ಬಳಸಿಕೊಂಡು ಗಾರ್ಡನ್​ ನಿರ್ಮಿಸುವ ಮೂಲಕ ಪರಿಸರ ಕಾಳಜಿ ಮೆರೆದಿದ್ದಾರೆ. ಇವರ ಕಾರ್ಯ ಹಲವರಿಗೆ ಪ್ರೇರಣೆಯಾಗಿದೆ.

ಪಶ್ಚಿಮ ಬಂಗಾಳ: ಮಿಡ್ನಾಪುರ ಅರಣ್ಯಾಧಿಕಾರಿಯೊಬ್ಬರು ಪ್ಲಾಸ್ಟಿಕ್​ ಬಾಟಲ್​ ಹಾಗೂ ರಬ್ಬರ್​ ಟೈರ್​ಗಳನ್ನು ಬಳಸಿಕೊಂಡು ಗಾರ್ಡನ್​ ನಿರ್ಮಿಸುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.

ಸುಮಾರು 1,100 ಪ್ಲಾಸ್ಟಿಕ್​ ಬಾಟಲ್ಸ್​ ಹಾಗೂ ರಬ್ಬರ್​ ಟೈರ್​ಗಳನ್ನು ಬಳಸಿ ಸುಂದರವಾದ ಹಸಿರು ಗಾರ್ಡನ್​ವೊಂದನ್ನು ನಿರ್ಮಿಸಿದ್ದಾರೆ. ಮಿಡ್ನಾಪುರ್​ ವಿಭಾಗದ ಪಿರಕಾಟ ಅರಣ್ಯ ವಲಯದಲ್ಲಿ ಎಫ್​ಆರ್​ಓ ಆಗಿ ಕಾರ್ಯ ನಿರ್ವಹಿಸುತ್ತಿರುವ ಪಾಪನ್​ ಮೊಹಾಂತ ಸುಮಾರು 4 ವರ್ಷಗಳಿಂದ ಈ ರೀತಿ ಪ್ಲಾಸ್ಟಿಕ್​ ಬಾಟಲ್ ಮೂಲಕ ಗಿಡ ಬೆಳೆಸುತ್ತಿದ್ದಾರೆ. 4 ವರ್ಷದ ಪ್ರಯತ್ನದ ಫಲವಾಗಿ ಒಂದು ವಿಶಿಷ್ಟವಾದ ಸುಂದರ ಗಾರ್ಡನ್​ ನಿರ್ಮಾಣವಾಗಿದೆ.

ಸುಮಾರು 4 ವರ್ಷಗಳ ಹಿಂದೆ ಪಿರಕಾಟ ಪ್ರದೇಶಕ್ಕೆ ಎಫ್​ಆರ್​ಓ ಆಗಿ ನೇಮಕವಾದ ಮೊಹಾಂತರವರಿಗೆ, ಈ ಅರಣ್ಯ ಪ್ರದೇಶ ಪ್ಲಾಸ್ಟಿಕ್​​ನಿಂದ​ ಕೂಡಿದ್ದನ್ನು ಕಂಡು ಬೇಸರಗೊಂಡಿದ್ದರಂತೆ. ಹೀಗಾಗಿ ಅದೇ ಪ್ಲಾಸ್ಟಿಕ್​ ಬಾಟಲ್​ಗಳನ್ನ ಬಳಸಿಕೊಂಡು ಏನಾದರೂ ಮಾಡಬಹುದು ಎಂದು ಯೋಚಿಸಿ, ಪ್ರತಿದಿನ ತಮ್ಮ ಕರ್ತವ್ಯ ಮುಗಿಸಿ ಉಳಿದ ಅವಧಿಯಲ್ಲಿ ಅದೇ ಅರಣ್ಯ ಪ್ರದೇಶದ ಒಂದು ಜಾಗದಲ್ಲಿ ಪ್ಲಾಸ್ಟಿಕ್​ ಬಾಟಲ್​ಗಳಲ್ಲಿ ಹೂವಿನ ಗಿಡಗಳನ್ನು ನೆಟ್ಟು, ಪೋಷಿಸುತ್ತಾ ಬಂದಿದ್ದಾರೆ.

ಇನ್ನು ಇವರ ಈ ಪರಿಸರಮುಖಿ ಕಾಳಜಿ ಹಾಗೂ ಗಾರ್ಡನ್​ ನಿರ್ಮಾಣ ಕಾರ್ಯಕ್ಕೆ ಸ್ಥಳೀಯರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ತಾವೂ ಕೂಡ ಈ ರೀತಿಯ ಗಾರ್ಡನ್​ ಬೆಳೆಸಲು ಮುಂದಾಗಿದ್ದಾರೆ. ಅಲ್ಲದೇ ಇದರಿಂದ ಪ್ರೇರಣೆ ಪಡೆದಿರುವ ಇಲ್ಲಿನ ಶಾಲೆಗಳ ಶಿಕ್ಷಕರು ಕೂಡ ತಮ್ಮ ಶಾಲಾ ಆವರಣದಲ್ಲಿ ಗಾರ್ಡನ್​ ನಿರ್ಮಿಸಿದ್ದಾರೆ. ಇದು ಸಂತಸ ತಂದಿದೆ ಎಂದು ಮೊಹಾಂತ ಹರ್ಷ ವ್ಯಕ್ತಪಡಿಸಿದ್ದಾರೆ. ಸದ್ಯ ಈ ಗಾರ್ಡನ್​ ಪ್ರಮುಖ ಆಕರ್ಷಣೀಯ ಸ್ಥಳವಾಗಿದ್ದು, ನೋಡಿ ಕಣ್ತುಂಬಿಕೊಳ್ಳಲು ಜನ ಇಲ್ಲಿಗೆ ದಾಂಗುಡಿ ಇಡುತ್ತಿದ್ದಾರೆ.

ಒಟ್ಟಿನಲ್ಲಿ ಪ್ಲಾಸ್ಟಿಕ್​ನಿಂದ ಪರಿಸರ ಹಾಳಾಗುತ್ತಿರುವ ಆತಂಕದ ಈ ಹೊತ್ತಿನಲ್ಲಿ ಅದೇ ಪ್ಲಾಸ್ಟಿಕ್​ ಬಳಸಿ ಗಾರ್ಡನ್​ ನಿರ್ಮಿಸಿ, ಪರಿಸರವನ್ನು ಹಸಿರುಮಯವಾಗಿಸುತ್ತಿರುವ ಮೊಹಂತಾ ಅವರ ಕಾರ್ಯ ನಿಜಕ್ಕೂ ಶ್ಲಾಘನೀಯ.