ಹ್ಯೂಸ್ಟನ್: ಹ್ಯೂಸ್ಟನ್ನಲ್ಲಿ ನಡೆದ ಹೌಡಿ ಮೋದಿ ಕಾರ್ಯಕ್ರಮದಲ್ಲಿ ಕಾಶ್ಮೀರದ ಬಗ್ಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಒಂದು ಮಾತು ಕೂಡಾ ಆಡಲಿಲ್ಲ. ಆದರೂ ಸಹ ಗಡಿ ಭದ್ರತೆ ಕುರಿತು ಪ್ರಸ್ತಾಪಿಸಿದ ಅವರು, ಅಮೆರಿಕದಂತೆ ಭಾರತಕ್ಕೂ ತನ್ನ ಗಡಿ ರಕ್ಷಿಸಿಕೊಳ್ಳುವ ಹಕ್ಕಿದೆ ಎಂದಿದ್ದಾರೆ.
ಹೌಡಿ ಮೋದಿ ಸಮಾರಂಭದಲ್ಲಿ ಮಾತನಾಡಿದ ಟ್ರಂಪ್, ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಲು ಖುಷಿಯಾಗಿದೆ. ಸುಮಾರು 50 ಸಾವಿರಕ್ಕೂ ಅಧಿಕ ಜನರ ಮುಂದೆ ಮಾತನಾಡಲು ಸಂತಸವಾಗುತ್ತಿದೆ ಎಂದರು. ಮುಂದುವರೆದು ಮಾತನಾಡಿದ ಅವರು, ಭಾರತ ಹಾಗೂ ಅಮೆರಿಕ ತಮ್ಮ ಸಮುದಾಯಗಳನ್ನು ಸುರಕ್ಷಿತವಾಗಿಟ್ಟುಕೊಳ್ಳುವುದನ್ನು ಅರ್ಥ ಮಾಡಿಕೊಂಡಿವೆ. ಅಲ್ಲದೆ ನಾವು ನಮ್ಮ ಗಡಿಗಳನ್ನು ರಕ್ಷಿಸಿಕೊಳ್ಳಲೇಬೇಕು ಎಂದಿದ್ದಾರೆ. ಇತ್ತೀಚೆಗಷ್ಟೇ ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡುವ 370ನೇ ವಿಧಿಯನ್ನು ಭಾರತ ರದ್ದು ಮಾಡಿದ್ದು, ಟ್ರಂಪ್ರ ಈ ಹೇಳಿಕೆ ಮಹತ್ವ ಪಡೆದುಕೊಂಡಿದೆ. ಯಾಕಂದ್ರೆ 370 ವಿಧಿ ರದ್ದು ವಿಚಾರವನ್ನು ಪಾಕಿಸ್ತಾನ ಅಂತಾರಾಷ್ಟ್ರೀಯ ಮಟ್ಟಕ್ಕೆ ಕೊಂಡೊಯ್ಯಲು ಪ್ರಯತ್ನಿಸಿತ್ತು. ಅಲ್ಲದೆ ಕಾರಣ ಭಾರತದ ವಿರುದ್ಧ ಕತ್ತಿ ಮಸೆಯುತ್ತಲೇ ಇದೆ. ಇದೀಗ ಟ್ರಂಪ್ರ ಈ ಹೇಳಿಕೆಯಿಂದಲಾದರೂ ಅದು ಸುಮ್ಮನಿರುತ್ತಾ ಅಂತಾ ಕಾದು ನೋಡಬೇಕಿದೆ.
ಇನ್ನು ಭಾರತದಲ್ಲಿ ಮೋದಿ ಉತ್ತಮ ಕಾರ್ಯ ಮಾಡುತ್ತಿದ್ದಾರೆ. ಬಡತನ ನಿರ್ಮೂಲನೆಯಲ್ಲಿ ಭಾರತ ಗಮನಾರ್ಹ ಸಾಧನೆಗೈದಿದೆ. ಉಭಯ ದೇಶಗಳಲ್ಲಿ ಜನತೆಯನ್ನು ಗೌರವಿಸುವ ಸಂಪ್ರದಾಯವಿದೆ ಎಂದರು. ಅನಿವಾಸಿ ಭಾರತೀಯರು ಇಲ್ಲಿನ ಬೆಳವಣಿಗೆಗೆ ಕಾರಣರಾಗಿದ್ದಾರೆ. ಸುಂಕ ಕಡಿತ ಮತ್ತು ಪರಿಷ್ಕರಣೆ ಅಮೆರಿಕದಲ್ಲಿ ಬದಲಾವಣೆಗೆ ಕಾರಣವಾಗಿದೆ. ಕಳೆದ ಎರಡು ವರ್ಷಗಳಲ್ಲಿ ಉಭಯ ದೇಶಗಳಲ್ಲಿ ನಿರುದ್ಯೋಗ ಭಾರಿ ಪ್ರಮಾಣದಲ್ಲಿ ಇಳಿಕೆಯಾಗಿದೆ. ನಿರುದ್ಯೋಗ ಮುಂದಿನ ಕೆಲವೇ ವರ್ಷಗಳಲ್ಲಿ ಅಮೆರಿಕದಲ್ಲಿ ಇಲ್ಲವಾಗುತ್ತದೆ ಎಂದು ಟ್ರಂಪ್ ಹೇಳಿದರು.
ಪ್ರಾಧಾನಿ ನರೇಂದ್ರ ಮೋದಿಯವರ ಅಭಿವೃದ್ಧಿ ನೀತಿಗಳ ಪರಿಣಾಮವಾಗಿ ಭಾರತವು ಸುಮಾರು 300 ದಶಲಕ್ಷ ಬಡತನ ಪ್ರಮಾಣವನ್ನು ಹೊರಹಾಕಿದೆ. ಇದು ನಂಬಲಾಗದ ಸಂಖ್ಯೆ ಎಂದು ಟ್ರಂಪ್ ಕೊಂಡಾಡಿದರು.
ಕಾನೂನಿನ ಅಡಿಯಲ್ಲಿ ಉಭಯ ದೇಶಗಳು ಮುನ್ನಡೆಯುತ್ತಿವೆ. ಉಭಯ ದೇಶಗಳ ಸಂಬಂಧ ಈಗ ಹಿಂದೆಂದಿಗಿಂತಲೂ ಅದ್ಭುತವಾಗಿದೆ ಎಂದರು. ಇಲ್ಲಿ ನಿಮ್ಮನ್ನೆಲ್ಲಾ ಕಾಣಲು ಅತ್ಯಂತ ಸಂತಸವಾಗುತ್ತಿದೆ. ಭಾರತ ಮತ್ತು ಅಮೆರಿಕವನ್ನು ಒಂದಾಗಿಸುವ ಕಾರ್ಯಕ್ಕೆ ನಾವು ಇಲ್ಲಿ ಸೇರಿದ್ದೇವೆ ಎಂದು ಕಾರ್ಯಕ್ರಮದಲ್ಲಿ ಭಾಗಿಯಾದ ಆಡಳಿತ ವರ್ಗಕ್ಕೆ ಟ್ರಂಪ್ ಧನ್ಯವಾದ ಹೇಳಿದರು.
ಭಯೋತ್ಪಾದನೆ ನಿಗ್ರಹಕ್ಕೆ ಭಾರತ-ಅಮೆರಿಕ ಸಂಕಲ್ಪ ಮಾಡಿವೆ. ಅಕ್ರಮ ನುಸುಳುವಿಕೆಯನ್ನು ಹತ್ತಿಕ್ಕುವ ಕಾರ್ಯ ನಡೆಯುತ್ತಿದೆ. ಉಭಯ ದೇಶಗಳು ಗಡಿ ವಿಚಾರದಲ್ಲಿ ಹೆಚ್ಚಿನ ಜವಾಬ್ದಾರಿ ವಹಿಸಬೇಕು. ನವೆಂಬರ್ನಲ್ಲಿ ಉಭಯ ದೇಶಗಳ ಮಿಲಿಟರಿ ಯುದ್ಧಾಭ್ಯಾಸ ನಡೆಯಲಿದೆ. ಮುಂದಿನ ದಿನಗಳಲ್ಲಿ ಹಲವು ರಕ್ಷಣಾ ಒಪ್ಪಂದಗಳು ಆಗಲಿವೆ ಎಂದರು.
ಇದೇ ಕಾರ್ಯಕ್ರಮದಲ್ಲಿ ಮೋದಿಗೆ ಹುಟ್ಟುಹಬ್ಬದ ಶುಭಾಶಯ ಕೋರಿದ ಟ್ರಂಪ್, ಲೋಕಸಭಾ ಚುನಾವಣೆಯ ಭರ್ಜರಿ ಗೆಲುವಿಗೆ ಅಭಿನಂದನೆ ಸಲ್ಲಿಸಿದರು.
