ಮುಂಬೈ: ಬಾಲಿವುಡ್ ನಟ ಅರ್ಜುನ್ ರಾಂಪಾಲ್ ಗೆಳತಿ ಗ್ಯಾಬ್ರಿಯೆಲಾ ಡೆಮೆಟ್ರಿಯೇಡ್ಸ್ ಅವರ ಸಹೋದರ ಅಗಿಸಿಲಾವೋನನ್ನು ಗೋವಾದಲ್ಲಿ ಬಂಧಿಸಲಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್ಸಿಬಿ ) ಅಧಿಕಾರಿಗಳು ಅಗಿಸಿಲಾವೋನನ್ನು ಬಂಧಿಸಿದ್ದು, ತನ್ನ ಮನೆಯಲ್ಲಿ ಸಣ್ಣ ಪ್ರಮಾಣದ ಗಾಂಜಾ ಹೊಂದಿದ್ದ ಆರೋಪದಲ್ಲಿ ಬಂಧಿಸಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ಅಗಿಸಿಲಾವೋ ದಕ್ಷಿಣ ಆಫ್ರಿಕಾದ ಪ್ರಜೆಯಾಗಿದ್ದಾನೆ.
ಮತ್ತೊಂದು ಕಾರ್ಯಾಚರಣೆಯಲ್ಲಿ ಎನ್ಸಿಬಿಯ ಗೋವಾ ಉಪವಿಭಾಗದ ಅಧಿಕಾರಿಗಳು ಉತ್ತರ ಗೋವಾದ ಸಿಯೋಲಿಮ್ ಗ್ರಾಮದಲ್ಲಿ ಛತ್ತೀಸ್ಗಡ ಮೂಲದ ನೌಮಾನ್ ಸವೆರಿ (22) ಎಂಬಾತನನ್ನು ಬುಧವಾರ ಬಂಧಿಸಿದ್ದರು. ಇದಕ್ಕೂ ಮೊದಲು ಹೈದರಾಬಾದ್ನಲ್ಲಿ ನೌಮಾನ್ ಸ್ನೇಹಿತ ಸಿದ್ದಿಕ್ ಅಹಮದ್ (25) ಎಂಬಾತನನ್ನು ಬಂಧಿಸಲಾಗಿತ್ತು.
ಎನ್ಸಿಬಿಯ ಮುಂಬೈ ಮತ್ತು ಗೋವಾ ವಿಭಾಗಗಳು ಮತ್ತೊಂದು ಕಾರ್ಯಾಚರಣೆಯನ್ನು ಶುಕ್ರವಾರ ಕೈಗೊಂಡಿದ್ದು, ಉತ್ತರ ಗೋವಾದ ನಾಗೋವಾ ಗ್ರಾಮದಲ್ಲಿ ಎಕ್ಸ್ಟಸಿ ಮಾತ್ರೆಗಳನ್ನು ಜಪ್ತಿ ಮಾಡಿತ್ತು. ಈ ವೇಳೆ ಮುಂಬೈ ಮೂಲದ ಮಯೂರ್ ಮೋಹ್ನಾನಿ ಎಂಬಾತನನ್ನು ಬಂಧಿಸಲಾಗಿತ್ತು.
ಇದನ್ನೂ ಓದಿ: ಆಲ್ಕೋಮೀಟರ್ ಡ್ರಿಂಕ್ ಆ್ಯಂಡ್ ಡ್ರೈವ್ ತಪಾಸಣೆ ಬೆಂಗಳೂರಿನಲ್ಲಿ ಪುನಾರಂಭ
