जयपुर. चौमासा गिया पाछै राजस्थान समेत उत्तर भारत रा राज्यां रा मौसम रो बदलाव अब लागबा लाग्यो है. दो दिन पैली जम्मू-कश्मीर मांय इण रुत री पैली बर्फबारी रो असर अबार मैदान रा इलाकों पै पड़ण रियो है. राजस्थान रा भीलवाड़ा, अलवर, जयपुर, सीकर, कोटा, सवाई माधोपुर, जैसलमेर, जोधपुर, बूंदी, चूरू, नागौर समेत नरा जिलां रो रात को तापमान 2 सू लैर 8 डिग्री सेल्सियस तक नीचे आई गियो है. मौसम रा जाणकारा रो कैवणो है कि उत्तरी भारत रा इलाका मांय वेस्टर्न डिस्टरबेंस (WD) को घणो असर पड़बा लाग्यो है. आबाळा दिनां मांय अगर इस्या ही हाल रिया, तो सियाळा नै लैर बैगा ही त्यारी करणी पड़ सकै है.
पढ़ें- दक्षिणी ताइवान रा हादसा माय 46 जणा री मौत , लाय लाग्या सू नरा जणा बळया
जयपुर मौसम विभाग रा निदेसक राधेश्याम शर्मा खियो कै उत्तरी भारत मांय तीन दिन पैली WD की वजह सू श्रीनगर, काजीगुंड, कटरा समेत नीचली डूंगरी अर घाट्या मांय छांट पड़ी ही. बठै ही गुलमर्ग, गुरेज और सोनमर्ग जिस्या इलाकां मांय बर्फबारी हुई. WD रा कारण सू बायरी ( विंड पैटर्न ) मांय बदलाव आयो है. जीकै कारण सू उत्तर री बायरी अबार मैदान रा इलाकां तक पूगण लागी है. इसू राजस्थान समेत उत्तर भारत रा कई इलाकां मांय तापमान नीचे आबा लाग्यो है.
राधेश्याम शर्मा बतायो कि आबाळी टैम उत्तर भारत री लार पश्चिमी राजस्थान ताय के बायरी रो असर देख्यो जाई सकै है. जीसू म्है पड़ण रा आसार बणीज रिया है. इरै लारै तापमान री गिरावट दैखी जाई सकै है. बारो कैवणो है कि दिसम्बर-जनवरी मांय सी पड़बा लाग जासी. इरा आसार अबार लगावणो घणो दोरो है. पण अबार की बैळ्या दिल्ली सू सट्या अलवर मांय 8 डिग्री तक पारो नीचे आई गियो है. अठै बुधवार नै न्यूनतम तापमान 25.2 डिग्री सेल्सियस हो, जिको बिह्सपतवार नै 16.5 पै पूग गियो.
