નર્મદા ડેમની સપાટી ઇતિહાસમાં પ્રથમવાર 136.51 મીટર પહોંચી

નર્મદા: જિલ્લામાં આવેલા નર્મદા ડેમમાં પાણીનો સતત આવરો વધી રહ્યો છે અને હાલ સપાટી ઇતિહાસમાં સૌ પ્રથમવાર સપાટી 136.51 મીટર પહોંચી છે. હાલ 6,76,558 ક્યુસેક પાણીની આવક થઈ રહી છે. 23 દરવાજા 3.9 મીટર સુધી ખોલીને 5,84,915 ક્યુસેક પાણી નદીમાં છોડાઈ રહ્યું છે. હાલ ડેમમાં 5076 mcm લાઈવ સ્ટોકનો જથ્થો સંગ્રહ થઈ રહ્યો છે. આવક વધુ રહે તો 1 કલાકમાં જ ડેમમાંથી 10 લાખ ક્યુસેક સુધી પાણી છોડવાની શકયતા રહેલી છે. નર્મદા નિગમની વડોદરા ખાતે આવેલ ડેમ અને પાવર હાઉસ સર્કલ ઓફિસ દ્રારા આ પત્ર જાહેર કરાયો છે. જે બાદ નર્મદા, ભરૂચ અને વડોદરાના કાંઠા વિસ્તારમાં એલર્ટ અપાયું છે. ત્રણેય જિલ્લા કલેકટરને આ અંગે સાબદા કરાયા છે, અને શક્યતા વ્યક્ત કરાઈ છે કે, ગરુડેશ્વર ખાતે નર્મદા નદીની સપાટી 30.5 મીટર સુધી પહોંચી શકે છે. નર્મદા બેઝીનમાં આવેલ ઓમકારેશ્વર ડેમ અને ઈન્દીરાસાગર ડેમમાંથી છોડાયેલા પાણી અને કેચમેન્ટ વિસ્તારમાં પડેલા વરસાદની આવક થઈ રહી છે. જો કે, આજે 8 લાખ ક્યુસેક નર્મદા નદીમાં છોડવાના પ્રશ્ને નર્મદા નિગમના એમ ડી રાજીવ ગુપ્તાએ મીડિયા સાથેની વાતમાં નર્મદા, ભરૂચ અને વડોદરાના સ્થાનિકોએ ગભરાવવાની જરૂર નથી. તેમણે વધુમાં કહ્યું કે, દરેક જગ્યાએ NDRFની ટિમો તૈનાત કરવામાં આવે છે.