Patan Universityમાં આઝાદીના અમૃત મહોત્સવ અંતર્ગત ગાંધી જયંતી ઉજવાઈ, વિદ્યાર્થીઓએ અનેક સ્પર્ધામાં લીધો ભાગ

પાટણમાં આવેલી હેમચંદ્રાચાર્ય ઉત્તર ગુજરાત યુનિવર્સિટીના (Hemchandracharya North Gujarat University) રંગ ભવનમાં મહાત્મા ગાંધીજીની જન્મજયંતીની (Gandhi Jayanti) ઉજવણી કરવામાં આવી હતી. આ વખતે આ ઉજવણીની થીમ આઝાદીના અમૃત મહોત્સવ (Azadi ka Amrut Mahotsav) પર રાખવામાં આવી હતી. અહીં ડિસ્ટ્રિક્ટ જજ ડી. એ. હિંગુના અધ્યક્ષસ્થાને રંગારંગ સાંસ્કૃતિક કાર્યક્રમો સહિત વિવિધ સ્પર્ધાઓ પણ યોજાઈ હતી. આ સાથે જ અહીં યુવતીઓએ અલગ અલગ ગરબા અને રાસ રજૂ કર્યા હતા. આ ઉપરાંત પતંજલી યોગ સાધકોએ યોગ નિર્દર્શન કરાવ્યું હતું. તેમ જ યુથ ફેસ્ટિવલ અને ગાંધીજીના જીવન પર આધારિત લોકવાર્તાઓ, ભજનો, સમૂહ ગાન જેવા કાર્યક્રમો પણ અહીં યોજાયા હતા. આ ઉપરાંત વક્તૃત્વ સ્પર્ધા, એકપાત્રીય અભિનય, નિબંધ, કાવ્ય લેખન, ચિત્રકામ અને શિલ્પકળા જેવી સ્પર્ધાઓનું પણ આયોજન કરવામાં આવ્યું હતું. યુનિવર્સિટીમાં યોજાયેલી આ સ્પર્ધામાં 500 જેટલા સ્પર્ધકોએ ભાગ લીધો હતો. તો આ કાર્યક્રમમાં જિલ્લા કલેક્ટર સુપ્રિતસિંહ ગુલાટી, પ્રિન્સિપાલ ડિસ્ટ્રિક્ટ એન્ડ સેશન્સ જજ ડી. એ. હિંગુ, રમતગમત અધિકારી વિરેન્દ્ર પટેલ સહિત વહિવટી અધિકારીઓ, કલાકારો અને વિવિધ સ્પર્ધાના સ્પર્ધકો મોટી સંખ્યામાં ઉપસ્થિત રહ્યા હતા.