બીટ કોઈન ફેમ નિશા ગોંડલીયાએ નોંધાવી ફરિયાદ,પોલીસ કામગીરી સામે ઉઠાવ્યા સવાલ

જામનગર: બહુ ચર્ચિત બીટ કોઈન ફેમ નિશા ગોંડલીયા પર ગઈ કાલે બોપરે દોઢ વાગ્યે આરાધના ધામ પાસે કાર પર ફાયરિંગ કરવામાં આવતા ચકચાર મચી ગઇ હતી. રાત્રે નિશા ગોંડલીયાએ ભુમાફિયા જયેશ પટેલ અને યશપાલ જાડેજા સામે જાનથી મારી નાખવાના પ્રયાસની ફરિયાદ નોંધાવી હતી.જયેશ પટેલ અને યશપાલ જાડેજાના સાગરીતોએ નિશા ગોંડલીયાની કાર પર ફાયરિંગ કરી માથાના ભાગે હથિયાર વડે હુમલો કરતા નિશા ગોંડલીયાને 108ની મદદથી તાત્કાલિક ખંભાળિયા સરકારી હોસ્પિટલમાં સારવાર માટે ખસેડવામાં આવી હતી.ત્યાર બાદ વધુ સારવાર માટે નિશા ગોંડલીયાને જી. જી. હોસ્પિટલમાં ખસેડવામાં આવી હતી.નિશા ગોંડલીયાએ અગાઉ જિલ્લા કલેક્ટરને આવેદનપત્ર પાઠવી પોલીસ રક્ષણ અને હથિયારના લાઇસન્સની માંગ કરી હતી.અવારનવાર જિલ્લા પોલીસ વડાને પણ આવેદનપત્ર આપી જાનનું જોખમ હોવાનું જણાવ્યું હતું.ફરિયાદ નોંધાવ્યા બાદ નિશા ગોંડલીયાએ પોલીસની કામગીરી સામે સવાલ ઉઠાવ્યા હતા.પોલીસ પર આરોપ લગાવતા તેણે કહ્યું કે, જે આરોપીઓએ ફાયરિંગ કર્યું તેને પોલીસ પકડતી નથી અને નિર્દોષ લોકોને પોલીસ હેરાન કરે છે.