દેશભરમાં 87માં એરફોર્સ દિવસની ઉજવણી, SWAC દ્વારા સાઇકલ યાત્રાનું આયોજન

વડોદરાઃ સમગ્ર દેશમાં એરફોર્સ દિવસની ઉજવણી કરવામાં આવી રહી છે, ત્યારે 87માં એરફોર્સ દિવસ નિમિત્તે SWAC દ્વારા સાયકલ યાત્રાનું આયોજન કરવામાં આવ્યું હતું. આ યાત્રામાં 50થી વધુ એરફોર્સના કર્મચારીઓ જોડાયા હતા. સોમવારે સવારે ગાંધીનગર સ્વાકના મુખ્યાલયથી નીકળેલી સાયકલ યાત્રા વડોદરાના દરજીપુરા સ્થિત કાર્યાલય ખાતે પહોંચી હતી. આ યાત્રાનું 'ફિટ ઇન્ડિયા મુવમેન્ટ'ના સંદેશાનો પ્રચાર અને પ્રસાર કરવા માટે આયોજન કરવામાં આવ્યું હતું. જે કેવડિયા કોલોની સ્થિત સ્ટેચ્યુ ઓફ યુનિટી સુધી યોજાશે. આ ટીમમાં SWACના કાર્યક્ષેત્રમાં સામેલ વિવિધ એરબેઝમાંથી આશરે 55 અધિકારીઓ પણ સામેલ હતા. આ સમગ્ર ટીમનું નેતૃત્વ એર માર્શલ બી.આર. ક્રિષ્ના, સીનિયર એર સ્ટાફ ઓફસર કરી રહ્યા હતા. આ ટીમમાં 25થી 57 વર્ષની વિવિધ વય જૂથના એર વોરિયર્સ, વિમેન ઓફિસર્સ અને ટીમના પરિવારના સભ્યો પણ સામેલ થયા હતા.