વાપીમાં મામલતદાર કચેરીએ ફોર્મ માટે ભીડ ઉમટી, પોલીસે સોશિયલ ડિસ્ટન્સ જાળવ્યું

વાપી તાલુકાની મામલતદાર કચેરી ખાતે પરપ્રાંતીય લોકો વતન જવાના ફોર્મ લેવા ઉમટી પડતા પોલીસે તમામને સોશિયલ ડિસ્ટન્સ જાળવવા તાકીદ કરી ફોર્મ વિતરણ કર્યા હતા. આ તબક્કે લોકોમાં ભારે નારાજગી પણ જોવા મળી હતી.

વાપી : બલિઠામાં આવેલી મામલતદાર કચેરી ખાતે વહેલી સવારથી જ પરપ્રાંતીય લોકો મોટી સંખ્યામાં આવી પહોંચ્યા હતા. મોટી સંખ્યામાં લોકોને એકત્ર થતા જોતા કચેરીના મુખ્ય ગેટને બંધ કરી તમામને અટકાવ્યા હતા અને પોલીસની મદદથી તમામ લોકોને વતન જવા માટેના ભરવાપત્ર ફોર્મનું વિતરણ કર્યું હતું.

કામદારોએ આ સમયે ઉગ્ર આક્રોશ પણ વ્યકત કર્યો હતો. મોટાભાગે બિહાર, ઉત્તરપ્રદેશ, રાજસ્થાન, હરિયાણા, મધ્યપ્રદેશ અને દક્ષિણ ભારતમાંથી હજારો કામદારો વાપીમાં રોજગારી માટે સ્થાયી થયા છે. હાલમાં કોરોના મહામારીને કારણે લોકડાઉન જાહેર થતા આ કામદારો અહીંથી વતન જવાની જીદ પકડી બેઠા છે. એટલે રાજ્ય સરકારે વતન વાપસીની પહેલ કરતા મામલતદાર કચેરીએ પાસ પરમીટ માટે ઘાડેધડા આવી રહ્યા છે.મામલતદાર કચેરી ખાતે આ લોકોને એક કતારમાં સોશિયલ ડિસ્ટન્સ સાથે ઉભા રાખી પોલીસ કર્મચારીઓએ ફોર્મનું વિતરણ કર્યું હતું. ઉનાળાની કાળઝાળ ગરમીમાં લોકોએ પરસેવે રેબઝેબ થઈ ફોર્મ લઈ તેમાં જરૂરી વિગતો ભરી કચેરીમાં સુપ્રત કર્યા હતા.